Puha Fehuʻi

◼ Ko e hā ʻoku totonu ke tau manatuʻí kapau ʻoku tau loto ke ʻave ha niʻihi pe kotoa ʻetau ngaahi koloá ki he kautaha ʻa Sihová ʻi heʻetau maté?

ʻI he mate ʻa e tangatá, ʻoku ʻikai te nau kei pule ki heʻenau ngaahi koloa fakamatelié. (Koh. 9:5, 6) Ko ia kuo fai tokamuʻa ʻe he tokolahi ha tohi-tuku pe talāsiti ʻo fakamatalaʻi ai ʻenau ngaahi fakaʻamu ki hono vahevahe ʻenau ngaahi koloá. (2 Tuʻi 20:1) Ko e pepa fakalao ko ení ʻoku toe faʻa fakahaaʻi ai ko hai ʻoku loto ʻa e tokotahá ke hoko ko e tokotaha-talāsití pe tokotaha-tokangaʻi ʻo e tohi-tukú. Kapau kuo teʻeki ai ke maau ʻa e pepa fakalaó, ʻi he ngaahi fonua lahi ʻe fakapapauʻi ʻe he kau maʻu mafaí ʻa e founga ke vahevahe ai ʻa e ngaahi koloa ʻa e pekiá. Ko ia ai, kapau ʻoku ʻi ai haʻatau ngaahi fakaʻamu pau fekauʻaki mo ʻetau ngaahi koloá, hangē ko e niʻihi pe kotoa ʻetau koloá ke ʻave ki he kautaha ʻa Sihová, ʻoku mahuʻinga ke tau ʻai ha pepa fakalao ke fakahaaʻi ai eni pea ke tau fili fakalelei ʻa e tokotaha-talāsití pe tokotaha-tokangaʻi ʻo e tohi-tukú.

Ko e tokotaha-talāsití pe tokotaha-tokangaʻi ʻo e tohi-tukú ʻoku ʻi ai hono fatongia mafatukituki. Fakatuʻunga he lahi ʻo e koloá, ko ʻene fakatahatahaʻi pea vahevahe leva ʻa e ngaahi koloá ʻe lava ke fakakau ai ʻa e ngaahi fakaikiiki lahi pea ʻe lava ke fuʻu fakamole taimi. Tānaki atu ki ai, ko e kau maʻu mafai fakamāmaní ʻoku nau faʻa maʻu ʻa e ngaahi fakahinohino kuo pau ke muimui ki ai. ʻOku ʻikai ko e tokotaha kotoa pē ʻoku mēmipa ʻi he fakatahaʻangá ʻe ʻotomētiki pē ʻene hoko ko ha tokotaha lelei ia ke talāsiti pe tokangaʻi ʻo e tohi-tukú. Ko e tokotaha te tau filí ʻoku totonu ko e tokotaha ʻoku tau ʻilo ʻoku lavameʻa, alafalalaʻanga, pea loto-lelei ke muimui ʻi heʻetau ngaahi fakaʻamú—Sio ki he kupu “Ko e Fakapotopoto mo e ʻAonga ʻo e Palani Fekauʻaki mo e Koloá,” ʻi he ʻīsiu ʻo e Awake! ʻo Tīsema 8, 1998. Pehē foki, kātaki tohi ki he ʻōfisi vaʻa ʻi Nuʻu Silá ʻo kole ʻa e “Information Regarding Gifts, Trusts and Wills.”

Kapau ʻOku Kole Atu Ke Ke Hoko ko ha Tokotaha-Talāsiti pe Tokotaha-Tokangaʻi ʻo e Tohi-Tukú: Kapau ʻoku kole atu pe te ke loto-lelei ke tokangaʻi ha koloa ʻa ha taha ʻi haʻanau mate, ʻuluaki fakapapauʻi ke fikaʻi ʻa e totongí pea fakapapauʻi ʻi he faʻa lotu kapau ʻoku malava ke ke fakahoko ʻa e fatongia ko ení. (Luke 14:28-32) Hili e mate ʻa e tokotahá, ʻe fiemaʻu koe ke fakahā ki he faʻahinga kotoa kuo ʻai hingoa ko e kau kaungatonú. ʻI hoʻo maʻu pē ʻa e mafai ke fai iá, ko ho fatongiá ia ke vahevahe ʻa e ngaahi koloá ʻo fakatatau ki he laó pea tatau tofu pē mo ia kuo fakahinohino ʻi he tohi-tukú pe talāsití. Ko ha tokotaha-talāsiti pe tokotaha-tokangaʻi ʻo e tohi-tukú ʻoku totonu ke ne lāuʻilo pe ʻoku lahi pe siʻisiʻi ʻa e koloá, ʻoku totonu ke ʻoua te ne fai ha faʻiteliha ki he ngaahi koloá. Ko ha ngaahi meʻaʻofa pē ki ha kautaha fakalao ʻoku ngāueʻaki ʻe he Kau Fakamoʻoni ʻa Sihová ko e ngaahi paʻanga fakatapui ia ʻoku ʻa e kautaha ʻa Sihová.—Luke 16:10; 21:1-4.