Loto-Mamahí, Movete e Tuí
“NAʻE fola ʻi he feituʻu kotoa e sino e kakai maté, pea naʻe ʻikai ke mau toe ʻiloʻi e feituʻu naʻe tuʻu ai homau falé,” ko e lea ia ʻa ha tangata Suli Langikā hili hano fakaʻauha hono koló ʻe ha peau kula ʻi Tīsema ʻo e 2004. ʻI ha kupu fekauʻaki mo e fakatamakí, naʻe pehē ai ʻe ha ʻētita fakalotu ko e taimi e niʻihi ʻ“okú ne lotu ʻūtaki nifo ai ʻi ha ongoʻi ʻita.”
ʻOku vakai ʻa e tokolahi ki he ngaahi fakatamaki fakanatulá ko ha tautea fakaʻotua. Naʻe fakamatalaʻi ʻe ha tokotaha-faʻu-kōlomu ha afā fakaʻauha ko e “toʻukupu ia ʻo e ʻOtuá.” ʻI ʻAmelika, naʻe fakamatalaʻi ai ʻe he kau taki lotu ʻe niʻihi ʻa e ngaahi meʻa naʻe hoko hangē ko e Afā ko Katrina ko e “houhau ia ʻa e ʻOtuá” ki he “ngaahi kolo faiangahalá.” ʻI Suli Langikā, naʻe tukuakiʻi ai ʻe ha tokotaha Lotu-Puta anga-fītaʻa ʻa e kau Kalisitiané ki he peau kula naʻe hokó, ʻo toe fakalahi ai e māvahevahe fakalotú. Naʻe tui ʻa e tangata tauhi ʻo ha temipale Hinitū ʻoku ʻita lahi ʻa e ʻotua ko Sivá koeʻuhí ko e ʻikai ke moʻui ʻa e kakaí ʻi he ʻalunga totonú. Naʻe pehē ʻe ha taki Lotu-Puta ʻi ʻAmelika fekauʻaki mo e ngaahi fakatamaki fakanatulá: “ʻOku ʻikai ke mau ʻilo pe ko e hā ʻoku hoko ai e ngaahi meʻá ni. ʻOku ʻikai ke mau teitei ʻiloʻi pe ko e hā ʻoku mau ʻi he māmani ai ko ení.”
ʻI he taimi ʻokú ke sio ai ki he ngaahi ʻata ʻo e ngaahi ʻapi kuo moveté, ngaahi moʻui kuo molé, pea mo e ngaahi loto-mamahí, ʻokú ke faʻa fifili nai, ‘Ko e hā ʻoku fakangofua ai ʻe he ʻOtuá e faingataʻaʻia lahi faú?’ Pe ʻokú ke fakakaukau, ‘Pau pē ʻoku ʻi ai ha ʻuhinga lelei ʻa e ʻOtuá ki heʻene kei fakangofua ʻa e ngaahi meʻá ni ke hokó ka ʻoku teʻeki ke ne fakahā mai’? Ko e ngaahi kupu hoko maí ʻe sivisiviʻi ai ʻa e ʻīsiú ni. ʻE toe lāulea foki ai ki ha ngaahi ngāue fakapotopoto ke fai ʻe he kakaí ke fakasiʻisiʻi ʻaki e hoko ʻa e lavelaveá mo e maté ʻo ka maluʻaki mai pe hoko ha fakatamaki fakanatula.
[Fakatātā ʻi he peesi 3]
Ko e kau taki lotu tokolahi ʻoku ʻikai ke nau ʻilo pe ko e hā ʻoku fakangofua ai ʻe he ʻOtuá ʻa e ngaahi fakatamaki fakanatulá