ʻOua ʻe Taʻofi Koé—Feangainga mo ha Taimi-Tēpile Femoʻuekina
1. Ko e hā ʻoku toumoua ai ʻa e niʻihi ke tuʻuaki ha ako Tohi Tapú?
1 ʻOku toumoua ʻa e niʻihi ke tuʻuaki ha ako Tohi Tapú koeʻuhi ʻoku nau maʻu ha taimi-tēpile femoʻuekina. Ko hono tokangaʻi ha ako Tohi Tapú ʻoku fiemaʻu ki ai ha taimi. ʻOku fiemaʻu ha taimi ke teuteu ki he akó, taimi ke fai aí mo tokoniʻi ʻa e tokotaha akó ke ikuʻi ʻene ngaahi fakafaingataʻaʻiaʻanga fakafoʻituituí. Naʻe pehē ʻe he ʻapositolo ko Paulá naʻá ne ʻoatu ʻene moʻuí ke tokoni ki he faʻahinga ʻi Tesalonaiká ke nau hoko ʻo ʻilo ʻa Sihova. (1 Tes. 2:7, 8) ʻE anga-fēfē haʻatau fakahoko ha ako Tohi Tapu neongo kapau ʻoku tau maʻu ha taimi-tēpile moʻumoʻua?
2. ʻOku anga-fēfē hono tākiekina ʻe he ʻofa kia Sihová ʻa e founga ʻetau ngāueʻaki hotau taimí?
2 Vaheʻi ha Taimi ki he Lotú: Ko hono moʻoní ko e lotú ʻoku fiemaʻu ki ai ha taimi. Ko e fakatātaá, ʻoku fiemaʻu ʻa e taimi tuʻumaʻu ke maʻu ai ʻa e ngaahi fakatahá, ke kau ʻi he ngāue fakafaifekaú, ke lau ʻa e Tohi Tapú mo lotu ai. Ko ha tokotaha femoʻuekina ʻosi mali te ne fiefia ke fakamoleki ha taimi mo hono hoá. He lahi ange ē ʻa e fiefia ʻoku totonu ke tau maʻu ʻi hono “ngāue lelei taha ʻaki” ʻo e taimí ke lotu kia Sihova koeʻuhi ʻoku tau ʻofa ki ai. (ʻEf. 5:15-17; 1 Sio. 5:3) Fakatatau kia Sīsū, ko ha konga mahuʻinga ʻetau lotú ko e ngāue ngaohi ākongá. (Māt. 28:19, 20) Ko e fakakaukauloto ki hení te ne tokoniʻi kitautolu ke ʻoua ʻe toumoua ʻi hono tali ʻa e fatongia ke fakahoko ha ako Tohi Tapú.
3. ʻE anga-fēfē haʻatau tokangaʻi ha ako Tohi Tapu neongo kapau ko e ngaahi tuʻungá ʻokú ne fakafeʻātungiaʻi ʻetau taimi-tēpile ki he ngāue fakafaifekaú?
3 Kae fēfē kapau ko ʻetau taimi-tēpilé ʻoku fakafeʻātungiaʻi ʻe he ngāué, mahaki tauhi pe ngaahi ngāue fakateokalatí? Ko e kau malanga ʻe niʻihi ʻoku pau ke nau faʻa mavahé ʻoku nau fakahoko ʻa e akó ʻi he telefoní pe ʻInitanetí. Ko e faʻahinga ko ia ʻoku fakafeʻātungiaʻi ʻe ha mahaki tauhí kuo nau fokotuʻutuʻu ki he tokotaha akó ke haʻu ki hono ʻapí ke na ako ai. Ko e niʻihi kuo nau fokotuʻutuʻu ki ha tokotaha malanga falalaʻanga ke fakahoko ʻa e akó kapau te nau moʻua.
4. Ko e hā ʻa e ngaahi tāpuaki ʻoku maʻu mei he kau atu ʻi he ngāue ako Tohi Tapú?
4 Naʻe maʻu ʻe Paula ha fiefia lahi mei hono ʻoatu hono taimí mo e iví ke tokoniʻi ʻa e niʻihi kehé ke ako ʻa e moʻoní. (Ngā. 20:35) ʻI heʻene fakakaukauloto atu ki he fua ʻo ʻene ngāue ʻi Tesalonaiká, naʻe ueʻi ia ke fakamālō kia Sihova. (1 Tes. 1:2) Ko ʻetau fiefia mo e fiemālie ʻi he ngāue fakafaifekaú ʻe lava ke tupulekina kapau ʻe ʻikai ke tau fakaʻatā ha taimi-tēpile femoʻuekina ke ne taʻofi kitautolu mei he kau atu ʻi he ngāue ako Tohi Tapú.