Fakahoko ha Ako Tohi Tapu ʻe Taki Atu ki he Papitaisó​—Konga ʻUluaki

1. ʻOku anga-fēfē hono tokoniʻi kitautolu ʻe he 2 Kolinitō 3:1-3 ke houngaʻia ʻi he monū ʻoku tau maʻu ke fakahoko ha ako Tohi Tapu ʻe taki atu ki he papitaisó? (Sio ki he tā ʻi he takafí.)

ʻOKU anga-fēfē hoʻo ongoʻi ʻi he taimi ʻokú ke sio ai ki he papitaiso ha ako Tohi Tapu mei hoʻo fakatahaʻangá? ʻOku ʻikai ha veiveiua ʻoku ʻai ai ho lotó ke fiefia. (Māt. 28:19) Pea kapau ko koe naʻá ke ako mo e ākonga foʻoú, he fiefia ē ko koe ke sio tonu ki he papitaiso ʻa e tokotaha ko iá! (1 Tes. 2:19, 20) Ko e kau ākonga toki papitaiso foʻoú ʻoku ʻikai ngata pē ʻenau hoko ko e “ngaahi tohi fakaongoongolelei” ʻa e faʻahinga naʻe ako mo kinautolú kae pehē foki ki he fakatahaʻangá kotoa.​—Lau ʻa e 2 Kolinitō 3:1-3.

2. (a) Ko e hā ʻa e fehuʻi mahuʻinga ʻoku fiemaʻu ke tau fakakaukau ki aí, pea ko e hā hono ʻuhingá? (e) Ko e hā ʻa e ako Tohi Tapu? (Sio ki he fakamatala ʻi lalo.)

² ʻI he taʻu ʻe fā kuo maliu atú, ʻoku lelei ʻaupito ke sio ki he ʻavalisi ʻo e kau ako Tohi Tapub naʻe līpooti ʻi he māhina taki taha ʻi māmani lahí ko e toko 10,000,000. Pea ʻi he lolotonga ʻa e ngaahi taʻu ko iá, ʻoku fakaʻavalisi ko e toko 280,000 tupu naʻe papitaiso ʻi he taʻu taki taha, ko e Kau Fakamoʻoni ʻa Sihova mo e kau ākonga foʻou ʻa Sīsū Kalaisi. ʻE lava fēfē ke tau tokoniʻi ha faʻahinga tokolahi ange ʻi he kau ako Tohi Tapu ʻe laui miliona ko iá ke nau papitaiso? ʻI he lolotonga ko ia ʻa e kei kātaki ʻa Sihova ʻo fakaʻatā ʻa e taimi mo e faingamālie ki he kakaí ke nau hoko ko e kau ākonga ʻa Kalaisi, ʻoku tau loto ke fai ʻa e kotoa ʻoku tau malavá ke tokoniʻi kinautolu ke fakalakalaka ki he papitaisó ʻi he vave taha ʻe ala lavá. Ko e taimi ʻoku toé ʻoku tātāiʻi!​—1 Kol. 7:29a; 1 Pita 4:7.

3. Ko e hā te tau lāulea ki ai ʻi he kupu ko ení fekauʻaki mo hono fakahoko ʻa e ngaahi ako Tohi Tapú?

³ Koeʻuhi ko e fiemaʻu fakavavevave ko ia ke ngaohi ākongá, naʻe fai ha savea ʻi he ngaahi ʻōfisi vaʻá ke ʻiloʻi ʻa e founga ʻe lava ke tau tokoniʻi ai ʻa e kau ako Tohi Tapu tokolahi ange ke fakalakalaka ki he papitaisó. ʻI he kupu ko ení mo e kupu hono hokó, te tau vakai ai ki he meʻa ʻe lava ke tau ako mei he kau tāimuʻa, kau misinale mo e kau ʻovasia sēketi taukeí.c (Pal. 11:14; 15:22) ʻOku nau fakamatala ki he meʻa ʻe lava ke fai ʻe he kau faiako Tohi Tapú mo ʻenau kau akó ke ʻai ke lavameʻa ange ʻa e ako Tohi Tapú. ʻI he kupu ko ení, te tau lāulea ai ki he meʻa ʻe nima ʻoku fiemaʻu ke fai ʻe he tokotaha ako taki taha ke fakalakalaka ai ki he papitaisó.

AKO ʻI HE UIKE KOTOA

4. Ko e hā ʻoku totonu ke tau ʻiloʻi fekauʻaki mo e ako Tohi Tapu ʻi he matapaá?

⁴ Ko e tokolahi hotau fanga tokouá mo e fanga tuofāfiné ʻoku nau fakahoko ʻa e ngaahi ako Tohi Tapú ʻi he matapā ʻo e tokotaha-ʻapí. Neongo ko e kamataʻanga lelei eni ki hono fakatupulekina ʻa e mahuʻingaʻia ʻi he Tohi Tapú, ko e ngaahi fetalanoaʻaki ko ení ʻoku faʻa taimi nounou pea ʻikai nai ke fakahoko ʻi he uike kotoa. Ke fakatupulekina ha mahuʻingaʻia lahi ange, ʻe ʻeke nai ʻe he niʻihi ʻa e fika telefoni ʻa e tokotaha mahuʻingaʻiá pea tā ki ai pe ʻave ha kiʻi pōpoaki ʻi he hili ʻa e ʻaʻahi taki taha ke vahevahe ha fakamatala Fakatohitapu nounou. Ko e toutou fetalanoaʻaki peheé ʻe hokohoko atu ʻi ha laui māhina ʻo ʻikai fakahoko ai ha ako Tohi Tapu ola lelei. ʻE fakalakalaka moʻoni ha tokotaha ako ki he fakatapuí mo e papitaisó kapau ko e kotoa pē ia ʻo e taimi mo e feinga ʻokú ne līʻoa ki hono ako ʻa e Folofola ʻa e ʻOtuá? Mahalo pē ʻikai.

5. Fakatatau ki he Luke 14:27-33, ko e hā naʻe fakamamafaʻi ʻe Sīsū ʻa ia ʻe lava ke ne tokoniʻi kitautolu ʻi heʻetau ngāue ngaohi ākongá?

⁵ ʻI he taimi ʻe taha, naʻe fai ʻe Sīsū ha talanoa fakatātā fekauʻaki mo e meʻa ke fai ʻe ha taha ke hoko ai ko haʻane ākonga. Naʻá ne talanoa fekauʻaki mo ha taha naʻá ne loto ke langa ha taua pea mo ha tuʻi naʻá ne loto ke laka atu ʻi he taú. Naʻe pehē ʻe Sīsū ko e tokotaha langá kuo pau ke ne tomuʻa “tangutu hifo ʻo fikaʻi ʻa e fakamolé” ke fakakakato ʻa e tauá pea ko e tuʻí kuo pau ke ne tomuʻa “nofo hifo ʻo aleaʻi” pe ʻe lava koā ʻe heʻene kau taú ʻo fakakakato ʻenau taumuʻá. (Lau ʻa e Luke 14:27-33.) ʻI he tuʻunga meimei tatau, naʻe ʻiloʻi ʻe Sīsū ko ha tokotaha ʻokú ne loto ke hoko ko ʻene ākonga ʻoku totonu ke ne sivisiviʻi fakalelei ʻa e ʻuhinga ʻo e muimui kiate iá. ʻI he ʻuhinga ko iá, ʻoku fiemaʻu ke tau fakalototoʻaʻi ʻa e faʻahinga ʻoku hā ngali te nau hoko ko ha ākongá ke ako mo kitautolu ʻi he uike taki taha. ʻE lava fēfē ke tau fai ia?

6. Ko e hā nai te tau feinga ke fai ke fakalakalaka ai ʻa e ngaahi akó?

⁶ Kamataʻaki hono fakalōloa ʻa e taimi ako ʻi he matapaá. Mahalo ʻe lava ke ke lāulea ki ha toe poini mei he Tohi Tapú ʻi hoʻo ʻaʻahi taki taha. ʻI he alāanga pē ʻa e tokotaha-ʻapí ki he lōloa ange ʻa e ʻaʻahí, kole ange pe ʻoku ʻi ai ha feituʻu ʻe lava ke mo tangutu fakataha ai ʻo hoko atu ʻa e fetalanoaʻakí. Ko e tali ʻa e tokotaha-ʻapí ʻe fakahaaʻi ai pe ʻokú ne mahuʻingaʻia moʻoni ʻi he ako Tohi Tapú. Faai atu pē, ke ʻai ke vave ange ʻene fakalakalaká, te ke ʻeke ange nai ki he tokotaha akó pe te ne loto-lelei ke ako tuʻo ua he uike. Neongo ia, ʻoku fiemaʻu ʻa e meʻa lahi ʻi he ako tuʻo taha pe tuʻo ua he uiké.

TEUTEU KI HE AKO TAKI TAHA

7. ʻE lava fēfē ke teuteu lelei ʻa e faiakó ki he ako Tohi Tapu taki taha?

⁷ ʻI he tuʻunga ko e faiakó, ʻoku fiemaʻu ke ke teuteu lelei ki he ako Tohi Tapu taki taha. ʻE lava ke ke kamata ʻaki hono lau ʻa e fakamatalá pea sio ki he ngaahi konga Tohi Tapú. Feinga ke mahinoʻi lelei ʻa e ngaahi poini tefitó. Fakakaukau ki he kaveinga ʻo e lēsoní, ngaahi kaveinga tokoní, ngaahi fehuʻi ʻi he akó, ko e ngaahi konga Tohi Tapu ke “lau,” ko e fakatātaá pea mo ha vitiō pē ʻe tokoni nai ki hono fakamatalaʻi ʻa e kaveingá. Pea ʻi hoʻo fakakaukau ki hoʻo tokotaha akó, fakalaulauloto ki he anga haʻo fakahaaʻi ʻa e fakamatalá ʻi ha founga faingofua mo māʻalaʻala ʻa ia ʻe mahinongofua ki hoʻo tokotaha akó peá ne ngāueʻaki ia.​—Nehe. 8:8; Pal. 15:28a.

8. Ko e hā ʻoku akoʻi mai ʻe he ngaahi lea ʻa e ʻapositolo ko Paulá ʻi he Kolose 1:9, 10 fekauʻaki mo ʻetau lotu maʻa ʻetau kau ako Tohi Tapú?

⁸ Ko e konga hoʻo teuteú ko e lotu kia Sihova fekauʻaki mo e tokotaha akó pea mo ʻene fiemaʻú. Kole kia Sihova ke ne tokoniʻi koe ke faiako mei he Tohi Tapú ʻi ha founga ʻe aʻu ai ki he loto ʻo e tokotahá. (Lau ʻa e Kolose 1:9, 10.) Feinga ke tomuʻa fakakaukau ki ha meʻa nai ʻe faingataʻa ke mahinoʻi pe tali ʻe he tokotaha akó. Manatuʻi ko hoʻo taumuʻá ke tokoniʻi ia ke fakalakalaka atu ki he papitaisó.

9. ʻE lava fēfē ke tokoniʻi ʻe he faiakó ʻa e tokotaha akó ke teuteu ki heʻene akó? Fakamatalaʻi.

⁹ Fakafou ʻi he ako Tohi Tapu tuʻumaʻu ʻa e tokotaha akó ʻoku tau ʻamanaki te ne houngaʻia ʻi he meʻa kuo fai ʻe Sihova mo Sīsuú pea loto ke ako lahi ange. (Māt. 5:3, 6) Ke maʻu ʻaonga kakato mei he akó, ko e tokotaha akó ʻoku fiemaʻu ke ne tokangataha ki he meʻa ʻokú ne akó. Ke aʻusia ení, fakamatalaʻi kiate ia ʻa e mahuʻinga ke ne teuteu ki he ako taki taha ʻaki hono lau ʻa e lēsoní ki muʻa pea fakakaukauloto ki he kaunga ʻa e fakamatalá kiate iá. ʻE lava fēfē ke tokoni ʻa e faiakó? Teuteu ha lēsoni fakataha mo e tokotaha akó ke fakahaaʻi kiate ia ʻa e founga ke fai ai ení.d Fakamatalaʻi ange ʻa e founga ke maʻu ai ʻa e tali hangatonu ki he fehuʻí, pea fakahaaʻi ange ʻa e tokoni hono fakaʻilongaʻi ʻa e foʻi lea pe kupuʻi lea tefitó ke ne manatuʻi ʻa e talí. Kole ange leva ke ne fai ʻa e talí ʻi he lea pē ʻaʻana. ʻI heʻene fai peheé, ʻe malava ai ke ke fakapapauʻi pe ʻokú ne mahinoʻi lelei ʻa e fakamatalá. Ka ʻoku ʻi ai ʻa e meʻa ʻe taha ʻe lava ke ke fakalototoʻaʻi hoʻo tokotaha akó ke ne fai.

AKOʻI IA KE FETUʻUTAKI MO SIHOVA ʻI HE ʻAHO KOTOA

10. Ko e hā ʻoku mahuʻinga ai ke lau fakaʻaho ʻa e Tohi Tapú, pea ko e hā ʻoku fiemaʻu ke fai ke maʻu ʻaonga kakato ai mei he lau Tohi Tapú?

¹⁰ Tānaki atu ki he ako ʻi he uike kotoa mo e faiakó, ko e tokotaha akó te ne maʻu ʻaonga mei hono fai ʻi he ʻaho taki taha ʻa e ngaahi meʻa ʻe niʻihi ʻiate ia pē. ʻOku fiemaʻu ke ne fetuʻutaki mo Sihova. Anga-fēfē? ʻAki ʻa e fanongo pea talanoa kia Sihova. ʻE lava ke ne fanongo ki he ʻOtuá ʻaki hono lau fakaʻaho ʻa e Tohi Tapú. (Sios. 1:8; Saame 1:1-3) Fakahaaʻi ange ʻa e founga ke ngāueʻaki ai ʻa e “Taimi-Tēpile Lau Tohi Tapu” ʻoku hā ʻi he jw.org.e Ko e moʻoni, ke tokoniʻi ia ke maʻu ʻaonga kakato mei heʻene lau Tohi Tapú, fakalototoʻaʻi ia ke fakalaulauloto ki he meʻa ʻoku akoʻi ʻe he Tohi Tapú fekauʻaki mo Sihová pea mo e founga ʻe lava ke ne ngāueʻaki ai ʻa e meʻa ʻokú ne akó ʻi heʻene moʻuí tonu.​—Ngā. 17:11; Sēm. 1:25.

11. ʻE lava fēfē ke ako ha tokotaha ako ki he founga totonu ke lotu aí, pea ko e hā ʻoku mahuʻinga ai kiate ia ke lotu maʻu pē kia Sihová?

¹¹ Fakalototoʻaʻi hoʻo tokotaha akó ke talanoa kia Sihova ʻaki ʻa e lotu ʻi he ʻaho taki taha. Fai ʻa e ngaahi lotu loto-moʻoni ʻi he kamataʻanga mo e ngataʻanga ʻo e ako taki taha, pea lave ki hoʻo tokotaha akó ʻi he ngaahi lotu ko iá. ʻI heʻene fanongo ki hoʻo ngaahi lotú, te ne ako ai ki he founga ke lotu ai mei hono lotó pea fai loto-moʻoni ʻene ngaahi lotú kia Sihova ko e ʻOtuá fakafou ʻi he huafa ʻo Sīsū Kalaisí. (Māt. 6:9; Sione 15:16) Sioloto atu ki he anga hono tokoniʻi ʻe he lau fakaʻaho ʻo e Tohi Tapú (fanongo kia Sihova) pea mo e lotú (talanoa kia Sihova) ʻa hoʻo tokotaha akó ke ʻunuʻunu ofi ange ki he ʻOtuá! (Sēm. 4:8) Kapau ʻe fai ia ʻe he tokotaha akó ʻi he ʻaho kotoa, ʻe tokoniʻi ai ia ke fakalakalaka atu ki he fakatapuí mo e papitaisó. Ko e hā ha toe meʻa te ne tokoniʻi ia?

TOKONIʻI IA KE FAKATUPULEKINA HA VAHAʻANGATAE FAKAFOʻITUITUI MO SIHOVA

12. ʻE lava fēfē ke tokoniʻi ʻe ha faiako ha tokotaha ako ke fakatupulekina ha vahaʻangatae mo Sihova?

¹² Ko e meʻa ʻoku ako ʻe ha tokotaha ʻi ha ako Tohi Tapu ʻoku totonu ke ʻikai ngata pē ʻene fakamānako ki hono ʻatamaí kae pehē foki ki hono lotó. Ko e hā hono ʻuhingá? Ko hotau lotó​—ʻoku kau ai ʻetau ngaahi holí, ongoʻí mo e fakaueʻilotó​—ʻokú ne ueʻi kitautolu ke fai ha ngāue. Naʻe ngāueʻaki ʻe Sīsū ʻa e ngaahi fakaʻuhinga totonu naʻe fakamānako ki he ʻatamaí. Ka naʻe muimui ʻa e kakaí ʻiate ia koeʻuhí naʻá ne toe ueʻi honau lotó. (Luke 24:15, 27, 32) Ko hoʻo tokotaha akó ʻoku fiemaʻu ke ne vakai kia Sihova ko ha Tokotaha moʻoni, ko ha tokotaha ʻe lava ke ne fakatupulekina ha vahaʻangatae mo ia, pea vakai kiate Ia ko ʻene Tamai, ko hono ʻOtua mo hono Kaumeʻa. (Saame 25:4, 5) Lolotonga ʻa e ako Tohi Tapú, tohoakiʻi ʻa e tokangá ki he ʻulungaanga ʻo e ʻOtuá. (ʻEki. 34:5, 6; 1 Pita 5:6, 7) Tatau ai pē pe ko e hā ʻa e kaveinga ʻokú ke lāulea ki aí, fakamamafaʻi pe ko e faʻahinga Tokotaha fēfē ʻa Sihova. Tokoniʻi ʻa e tokotaha akó ke houngaʻia ʻi he ngaahi ʻulungaanga fakaʻofoʻofa ʻo Sihová​—ʻene ʻofá, anga-leleí mo e manavaʻofá. Naʻe pehē ʻe Sīsū ko e “fekau lahi tahá mo muʻomuʻá” ko e “ʻofa kia Sihova ko ho ʻOtuá.” (Māt. 22:37, 38) Feinga ke tokoniʻi hoʻo tokotaha akó ke ʻofa lahi ki he ʻOtuá mei he lotó.

13. ʻOmai ha fakatātā ʻo e founga ke tokoniʻi ha tokotaha ako ke ako fekauʻaki mo e ʻulungaanga ʻo Sihová.

¹³ ʻI hoʻo fetalanoaʻaki mo hoʻo tokotaha akó, fakahaaʻi kiate ia hoʻo ngaahi ongoʻi loloto fekauʻaki mo Sihová. ʻE tokoni nai eni ki hoʻo tokotaha akó ke ne ʻiloʻi ʻa e fiemaʻu ke ne fakatupulekina ha vahaʻangatae fakafoʻituitui māfana mo e ʻOtuá. (Saame 73:28) Ko e fakatātaá, ʻoku ʻi ai ha kupuʻi lea ʻi he tohi akó pe ʻi ha konga Tohi Tapu ʻoku fakahaaʻi ai ha meʻa fekauʻaki mo Sihova​—ko ʻene ʻofa, poto, fakamaau totonu pe mālohi​—ʻoku maongo ki ho lotó? Tala ange ia ki hoʻo tokotaha akó pea ʻai ke ne ʻiloʻi ko e taha eni ʻi he ngaahi ʻuhinga lahi ʻokú ke ʻofa ai ʻi heʻetau Tamai fakahēvaní. ʻOku toe ʻi ai mo e meʻa ʻe taha ʻoku fiemaʻu ke fai ʻe he tokotaha ako Tohi Tapu kotoa koeʻuhi ke fakalakalaka ai ki he papitaisó.

FAKALOTOTOʻAʻI IA KE MAʻU ʻA E NGAAHI FAKATAHÁ

14. Ko e hā ʻoku tala mai ʻe he Hepelū 10:24, 25 fekauʻaki mo e anga hono tokoniʻi ʻe he ngaahi fakataha ʻa e fakatahaʻangá ha tokotaha ako Tohi Tapu ke fakalakalaka?

¹⁴ Ko kitautolu kotoa ʻoku tau loto ke fakalakalaka ʻetau kau akó ki he papitaisó. Ko e founga mahuʻinga ʻe taha ʻe lava ke tau tokoniʻi ai kinautolú ko hono fakalototoʻaʻi kinautolu ke maʻu ʻa e ngaahi fakataha ʻa e fakatahaʻangá. ʻOku pehē ʻe he kau faiako taukeí ko e kau ako ʻoku nau maʻu ʻa e ngaahi fakatahá ʻoku vave taha ʻenau fakalakalaká. (Saame 111:1) ʻOku fakamatalaʻi ʻe he kau faiako ʻe niʻihi ki heʻenau kau akó te nau ako ʻa e konga pē ʻi heʻenau ako Tohi Tapú pea ko e toengá mei he ngaahi fakatahá. Lau ʻa e Hepelū 10:24, 25 mo hoʻo tokotaha akó pea fakamatalaʻi kiate ia ʻa e ʻaonga te ne maʻu kapau ʻe haʻu ki he ngaahi fakatahá. Huluʻi kiate ia ʻa e vitiō Ko e Hā ʻOku Fai ʻi ha Fale Fakatahaʻanga?f Tokoniʻi hoʻo tokotaha akó ke hoko ʻa hono maʻu ʻa e fakataha fakauiké ko ha konga mahuʻinga ʻene moʻuí.

15. Ko e hā ʻe lava ke tau fai ke fakalototoʻaʻi ha tokotaha ako ke maʻu maʻu pē ʻa e ngaahi fakatahá?

¹⁵ Ko e hā ʻe lava ke ke fai kapau ʻoku teʻeki ai ke maʻu ʻe hoʻo tokotaha akó ha fakataha pe ʻoku ʻikai ke ne maʻu maʻu pē ia? Vahevahe loto-vēkeveke ange ʻa e meʻa naʻá ke ako mei ha fakataha ki muí ni mai. ʻOku fakaueʻiloto ange ia ʻi hono fakaafeʻi pē ʻa e tokotaha akó ke maʻu ʻa e fakatahá. ʻOange kiate ia ʻa e Taua Leʻo pe Polokalama Ngāue ki he Fakataha Moʻuí mo e Ngāue Fakafaifekaú ʻa ia ʻoku fai ai ʻa e ako ʻi he fakatahá. Fakahaaʻi ange ʻa e meʻa ʻe fai ki ai ʻa e lāulea ʻi he fakataha hokó, pea ʻeke ange pe ko fē ʻa e konga ʻoku fakamānako taha kiate iá. Ko e meʻa ʻoku hokosia ʻe hoʻo tokotaha akó ʻi heʻene fuofua maʻu fakatahá ʻe laka mamaʻo ange ia ʻi ha meʻa pē naʻá ne hokosia ʻi ha fakatahataha fakalotu kehe. (1 Kol. 14:24, 25) Te ne fetaulaki mo e niʻihi kehe ʻa ia ʻe lava ke ne faʻifaʻitaki ki heʻenau faʻifaʻitakiʻanga leleí pea te nau tokoni kiate ia ke fakalakalaka ki he papitaisó.

16. ʻE lava fēfē ke tau fakahoko ʻa e ngaahi ako Tohi Tapu ʻe taki atu ki he papitaisó, pea ko e hā te tau ako ʻi he kupu hono hokó?

¹⁶ ʻE lava fēfē ke tau fakahoko ʻa e ngaahi ako Tohi Tapu ʻe taki atu ki he papitaisó? ʻE lava ke tau tokoniʻi ʻa e tokotaha ako taki taha ke mahuʻingaʻia moʻoni ʻi he akó ʻaki hono fakalototoʻaʻi ia ke ako ʻi he uike kotoa pea teuteu ki he ako taki taha. ʻOku tau toe loto ke fakalototoʻaʻi ia ke fetuʻutaki mo Sihova ʻi he ʻaho kotoa pea fakatupulekina ha vahaʻangatae fakafoʻituitui mo Ia. ʻOku tau loto ke ueʻi ʻa e tokotaha akó ke maʻu ʻa e ngaahi fakataha ʻa e fakatahaʻangá. (Sio ki he puha “Meʻa ʻOku Fiemaʻu ke Fai ʻe he Kau Akó ke Fakalakalaka ki he Papitaisó.”) Neongo ia, hangē ko ia ʻe fakamatalaʻi ʻi he kupu hono hokó, ʻoku ʻi ai ha toe meʻa ʻe nima ʻe lava ke fai ʻe he kau faiako Tohi Tapú ke taki atu ai ʻa e kau akó ki he papitaisó.