Fakahoko ha Ako Tohi Tapu ʻe Taki Atu ki he Papitaisó​—Konga Ua

1. ʻOku anga-fēfē ʻetau ʻiloʻi ko e ngāue ngaohi ākongá ko ha ngāue fakahaofi moʻui?

KO E ngāue ngaohi ākongá ko ha ngāue fakahaofi moʻui! ʻOku anga-fēfē ʻetau ʻiloʻi iá? ʻI he taimi naʻe ʻomai ai ʻe Sīsū ʻa e fekau ʻoku hiki ʻi he Mātiu 28:19, 20, naʻá ne pehē: “Mou ō ʻo ngaohi . . . ākonga . . . , ʻo papitaiso kinautolu.” Ko e hā ʻoku tau ʻiloʻi fekauʻaki mo e mahuʻinga ʻo e papitaisó? Ko ha fiemaʻu pau ia ki he faʻahinga ʻoku nau kumi ki he fakamoʻuí. Ko e tokotaha teu papitaisó kuo pau ke ne tui ko e fakamoʻuí ʻoku malava pē ia koeʻuhi ko e pekia fakaefeilaulau ʻa Sīsū pea toetuʻú. Ko e ʻuhinga ia naʻe tala ange ai ʻe he ʻapositolo ko Pitá ki hono kaungā-Kalisitiané: “Ko e papitaisó [ʻokú ne] fakahaofi foki kimoutolu he taimí ni . . . fakafou ʻi he toetuʻu ʻa Sīsū Kalaisí.” (1 Pita 3:21) Ko ia ʻi he taimi ʻoku papitaiso ai ha ākonga foʻou, ʻokú ne maʻu ai ʻa e ʻamanaki ki he fakamoʻuí.

2. Ko e hā ʻoku ueʻi kitautolu ʻe he 2 Tīmote 4:1, 2 ke tau fai ʻi he tuʻunga ko e kau faiakó?

² Ke ngaohi ākongá, ʻoku fiemaʻu ke tau fakatupulekina ʻa e “pōtoʻi fakafaiako.” (Lau ʻa e 2 Tīmote 4:1, 2.) Ko e hā hono ʻuhingá? Koeʻuhi naʻe fekau mai ʻe Sīsū: “Mou ō ʻo ngaohi . . . ākonga . . . , pea akoʻi kinautolu.” Naʻe pehē ʻe he ʻapositolo ko Paulá ke “kītaki” ʻi he ngāue ko iá, “he ʻi hono fai ení te ke fakatou fakahaofi ai koe mo e faʻahinga ko ia ʻoku nau fanongo atu kiate koé.” Pea ʻi he ʻuhinga lelei, naʻe pehē ʻe Paula: “Tokanga maʻu ai pē . . . ki hoʻo faiako ʻoku faí.” (1 Tīm. 4:16) Koeʻuhi ʻoku fekauʻaki ʻa e faiakó mo e ngaohi ākongá, ʻoku tau fiemaʻu ke aʻu ʻetau founga faiakó ki he lelei tahá.

3. ʻI he kupu ko ení, ko e hā te tau lāulea ki ai fekauʻaki mo hono fakahoko ʻo e ngaahi ako Tohi Tapú?

³ ʻOku tau akoʻi ʻa e kakai ʻe laui miliona fekauʻaki mo e moʻoni ʻi he Tohi Tapú. Kae hangē ko ia naʻe lave ki ai ʻa e kupu ki muʻá, ʻoku tau loto ke ʻiloʻi ʻa e founga ke tokoniʻi ai ʻa e faʻahinga tokolahi ange ke nau hoko ko e kau ākonga ʻosi papitaiso ʻa Sīsū Kalaisi. ʻI he kupu ko ení, te tau lāulea ai ki ha toe meʻa ʻe nima ʻoku fiemaʻu ki he faiako kotoa ke ne fai ke tokoniʻi ai ha tokotaha ako ke fakalakalaka ki he papitaisó.

TUKU KI HE TOHI TAPÚ KE NE FAI ʻA E FAIAKÓ

4. Ko e hā kuo pau ke mapuleʻi-kita ai ha faiako ʻi heʻene fakahoko ha ako Tohi Tapu? (Sio foki ki he fakamatala ʻi lalo.)

⁴ ʻOku tau ʻofa ʻi he meʻa ʻoku tau ako mei he Folofola ʻa e ʻOtuá. Ko ia te tau hehema nai ke talanoa lōloa fekauʻaki mo e meʻa ʻoku tau ʻofa aí. Kae kehe, tatau ai pē pe ko hono fakahoko ʻa e Ako Taua Leʻo, Ako Tohi Tapu ʻa e Fakatahaʻangá pe ko ha ako Tohi Tapu ʻi ʻapi, ʻoku ʻikai totonu ki he tokotaha faiakó ke lahilahi fakamatala. Ke tuku ki he Tohi Tapú ke ne fai ʻa e faiakó, kuo pau ki he faiakó ke ne mapuleʻi-kita pea ʻoua ʻe feinga ke fakamatalaʻi ʻa e meʻa kotoa ʻokú ne ʻiloʻi fekauʻaki mo ha konga Tohi Tapu pe kaveinga pau.b (Sione 16:12) Fakahoa ʻa e ʻilo Fakatohitapu naʻá ke maʻu ʻi hoʻo papitaisó mo ia kuó ke maʻu ʻi he taimi ní. ʻOku ngalingali ki muʻá, naʻá ke mahinoʻi pē ʻa e ngaahi tokāteline tefitó. (Hep. 6:1) Naʻe fiemaʻu ʻa e laui taʻu ke ke ako ai ʻa e meʻa ʻokú ke ʻiloʻi he ʻaho ní, ko ia ʻoua ʻe feinga ke akoʻi fakaʻangataha ʻa e meʻa kotoa ki ha tokotaha ako foʻou.

5. (a) ʻI he fehoanaki mo e 1 Tesalonaika 2:13, ko e hā ʻoku tau loto ke mahinoʻi ʻe heʻetau tokotaha akó mei heʻene akó? (e) ʻE lava fēfē ke tau fakalototoʻaʻi ha tokotaha ako ke talanoa fekauʻaki mo e meʻa ʻokú ne akó?

⁵ ʻOku tau loto ke mahinoʻi ʻe heʻetau tokotaha akó ko e meʻa ʻokú ne akó ko e haʻu mei he Folofola fakamānavaʻi ʻa e ʻOtuá. (Lau ʻa e 1 Tesalonaika 2:13.) ʻE lava fēfē ke tau fai ia? Fakalototoʻaʻi ʻa e tokotaha akó ke talanoa fekauʻaki mo e ngaahi meʻa ʻokú ne akó. ʻI he ʻikai ke fakamatalaʻi maʻu pē ʻa e ngaahi konga Tohi Tapú ki he tokotaha akó, kole ange kiate ia ke ne fakamatalaʻi atu ia kiate koe. Tokoniʻi ʻa e tokotaha akó ke sio ki he anga ʻo e kaunga ʻa e Folofola ʻa e ʻOtuá kiate ia fakafoʻituituí. ʻEke ʻa e ngaahi fehuʻi taki mo fakatupu fakakaukau ke tohoakiʻi mai ʻa e anga ʻene fakakaukaú mo e ongoʻi fekauʻaki mo e ngaahi konga Tohi Tapu ʻokú ne laú. (Luke 10:25-28) Ko e fakatātaá, ʻeke ange kiate ia: “ʻOku anga-fēfē hono tokoniʻi koe ʻe he konga Tohi Tapu ko ení ke vakai ki he taha ʻo e ngaahi ʻulungaanga ʻo Sihová?” “ʻE lava fēfē ke ke maʻu ʻaonga mei he moʻoni Fakatohitapu ko ení?” “ʻOku fēfē hoʻo ongoʻi fekauʻaki mo e meʻa kuó ke toki akó?” (Pal. 20:5) ʻOku ʻikai ko e meʻa ʻoku mahuʻinga tahá, ko e lahi ʻo e meʻa ʻoku ʻiloʻi ʻe ha tokotaha ako, ka ko e lahi ʻene ʻofa ʻi he meʻa ʻokú ne ʻiloʻí pea ngāueʻaki ia.

6. Ko e hā ʻe lelei nai ai ke ʻalu mo ha faiako taukei ki ha ako Tohi Tapu?

⁶ ʻI hono fakahoko ha ako Tohi Tapu, kuó ke ʻalu ki ai mo ha tokotaha malanga ʻa ia ko ha faiako taukei? Kapau ko ia, ʻe lava ke ke ʻeke kiate kinautolu pe ko e hā ʻa e anga ʻenau vakai ki hoʻo founga faiakó pea ʻokú ke tuku nai ki he Tohi Tapú ke ne fai ʻa e faiakó. Kuo pau ke ke anga-fakatōkilalo kapau ʻokú ke loto ke fakaleleiʻi hoʻo pōtoʻi fakafaiakó. (Fakafehoanaki mo e Ngāue 18:24-26.) Hili iá, ʻeke ange ki he tokotaha malanga taukeí pe ʻokú ne pehē ʻoku mahinoʻi ʻe he tokotaha akó ʻa e moʻoní. ʻE lava ke ke toe kole ki he tokotaha malanga tatau ke ne fakahoko ʻa e akó kapau te ke mavahe ʻi ha uike ʻe taha pe lahi ange. ʻE kei hokohoko atu pē ai ʻa e akó pea ʻe fakamamafaʻi ai ki he tokotaha akó ʻa e mahuʻinga ʻo ʻene akó. ʻOua ʻaupito te ke ongoʻi ko “hoʻo” ako toko taha pē eni pea heʻikai lava ʻe ha taha ke fakahoko ia. He ko ē, ʻokú ke fiemaʻu ʻa e lelei tahá maʻa hoʻo tokotaha akó kae lava ke fakalakalaka ʻene ako ʻa e moʻoní.

FAIAKO ʻAKI ʻA E FAIVELENGA MO E TUIPAU

7. Ko e hā te ne tokoniʻi ha tokotaha ako ke fiefia ʻi he meʻa ʻokú ne akó?

⁷ ʻOku fiemaʻu ki ha tokotaha ako ke ne sio ki hoʻo faivelengá pea fanongo ki hoʻo tuipau ki he ngaahi moʻoni ʻoku maʻu ʻi he Tohi Tapú. (1 Tes. 1:5) Pea ʻoku ngalingali te ne fiefia ange ʻi he meʻa ʻokú ne akó. Tala ange ʻa e anga hono tokoniʻi fakafoʻituitui koe ʻe he moʻuiʻaki ʻa e ngaahi tefitoʻi moʻoni Fakatohitapú, ʻo ka feʻungamālie. Pea te ne ʻiloʻi leva ʻoku maʻu ʻi he Tohi Tapú ʻa e tataki ʻaonga ʻe lava ke ne maʻu ʻaonga foki mei ai.

8. Ko e hā ʻe lava ke ke toe tānaki atu ki he ako Tohi Tapú, pea ko e hā nai hono ʻuhingá?

⁸ Lolotonga ʻa e ako Tohi Tapú, tala ange ki hoʻo tokotaha akó ʻa e ngaahi faʻifaʻitakiʻanga moʻoni ʻa e faʻahinga naʻa nau fekuki mo e ngaahi pole tatau mo ia ʻokú ne maʻú pea naʻa nau ikuʻi ia. ʻE lava ke ke ʻalu ki he akó mo ha taha ʻi he fakatahaʻangá ʻa ia ko ʻene faʻifaʻitakiʻangá ʻe maʻu ʻaonga nai mei ai ʻa e tokotaha akó. Pe ʻe lava ke ke maʻu ʻa e ngaahi hokosia fakaueʻiloto ʻi he jw.org ʻi he kupu hokohoko “Liliu ʻe he Tohi Tapú ʻa e Moʻuí.”c Ko e ngaahi kupu mo e vitiō ko iá te ne tokoniʻi hoʻo tokotaha akó ke vakai ki he fakapotopoto ko ia hono ngāueʻaki ʻa e ngaahi tefitoʻi moʻoni Fakatohitapú ʻi heʻene moʻuí.

9. ʻE lava fēfē ke ke fakalototoʻaʻi ha tokotaha ako ke vahevahe atu ʻa e meʻa ʻokú ne akó ki hono fāmilí mo e kaungāmeʻá?

⁹ Kapau ʻoku ʻosi mali ʻa e tokotaha akó, ʻoku ako mo hono malí? Kapau ʻoku ʻikai, fakaafeʻi hono hoá ke kau ʻi he akó. Fakalototoʻaʻi hoʻo tokotaha akó ke vahevahe atu ʻa e meʻa ʻokú ne akó ki hono fāmilí mo e kaungāmeʻá. (Sione 1:40-45) Anga-fēfē? Te ke ʻeke nai: “ʻE anga-fēfē haʻo fakamatalaʻi ʻa e moʻoni ko ení ki ho fāmilí?” pe “Ko e hā ʻa e konga Tohi Tapu te ke ngāueʻaki ke fakamoʻoniʻi eni ki ha kaungāmeʻa?” ʻI he founga ko ení, te ke akoʻi ai ʻa e tokotaha akó ke hoko ko ha faiako. Pea ʻi he taimi ʻokú ne taau aí, ʻe lava ke ne kamata kau ʻi he ngāue fakafaifekaú ko ha tokotaha malanga teʻeki papitaiso. ʻE lava ke ke ʻeke ki he tokotaha akó pe ʻokú ne ʻiloʻi ha toe tokotaha te ne saiʻia ke ako ʻa e Tohi Tapú. Kapau ʻokú ne ʻiloʻi ha tokotaha, fetuʻutaki he taimi pē ko iá ki he tokotahá pea tuʻuaki ange ha ako Tohi Tapu. Fakahaaʻi ange kiate ia ʻa e vitiō Ko e Hā ʻOku Fai ʻi ha Ako Tohi Tapu?d

FAKALOTOTOʻAʻI ʻA E TOKOTAHA AKÓ KE MAʻU HA KAUNGĀMEʻA ʻI HE FAKATAHAʻANGÁ

10. Hangē ko ia ʻoku fakamatalaʻi ʻi he 1 Tesalonaika 2:7, 8, ʻe lava fēfē ke faʻifaʻitaki ha faiako kia Paula?

¹⁰ Ko e kau faiakó kuo pau ke nau fakahāhā ʻa e mahuʻingaʻia fakafoʻituitui loto-moʻoni ʻi heʻenau kau akó. Vakai kiate kinautolu ʻe lava ke nau hoko ko e fanga tokoua pe fanga tuofāfine fakalaumālie ʻi he kahaʻú. (Lau ʻa e 1 Tesalonaika 2:7, 8.) ʻOku ʻikai ke faingofua ke tuku ange ʻa e ngaahi kaungāmeʻa ʻi he māmaní pea fai ʻa e ngaahi liliu kotoa ʻoku fiemaʻú ke tauhi kia Sihova. ʻOku fiemaʻu ke tau tokoniʻi kinautolu ke maʻu ʻa e ngaahi kaungāmeʻa moʻoni ʻi he fakatahaʻangá. Hoko ko ha kaumeʻa ki hoʻo tokotaha akó ʻaki ʻa e vaheʻi ha taimi ke feohi mo ia ʻo ʻikai ʻi he lolotonga pē ʻa e ako Tohi Tapú kae pehē foki ki he ngaahi taimi kehé. Ko ha tā ki ai, ʻave ha kiʻi pōpoaki pe ʻaʻahi taimi nounou ʻi he hili ʻa e akó ʻokú ke fakahaaʻi ai ʻokú ke tokanga moʻoni kiate ia.

11. Ko e hā ʻoku tau loto ke maʻu ʻe heʻetau kau akó ʻi he fakatahaʻangá, pea ko e hā hono ʻuhingá?

¹¹ ʻOku ʻi ai ʻa e lea ʻoku pehē: “ʻOku fiemaʻu ki ha kolo ke nau tauhi ha kiʻi tama.” ʻE lava ke tau pehē: “ʻOku fiemaʻu ki ha fakatahaʻanga ke ngaohi ha ākonga.” Ko e ʻuhinga ia ʻoku fakafeʻiloaki ai ʻe he kau faiako Tohi Tapu ola leleí ʻenau kau akó ki he niʻihi kehe ʻi he fakatahaʻangá ʻa ia ʻe lava ke nau tākiekina lelei kinautolu. ʻE fiefia leva ʻa e kau akó ʻi he feohi mo e kakai ʻa e ʻOtuá, ʻa ia te nau poupouʻi fakalaumālie mo fakaeongo kinautolu. ʻOku tau loto ke ongoʻi ʻe he tokotaha ako taki taha ʻokú ne kau ʻi he fakatahaʻangá pea ko ha konga ia hotau fāmili fakalaumālié. ʻOku tau loto ke tohoakiʻi mai ia ki heʻetau fetokouaʻaki faka-Kalisitiane fakalotomāfana mo ʻofá. Pea ʻe faingofua ange ai ke ne taʻofi ʻa e feohi vāofi mo e kakai ʻoku ʻikai ke nau tokoniʻi ia ke ʻofa kia Sihová. (Pal. 13:20) Kapau ʻe siʻaki ia ʻe hono ngaahi kaungāmeʻa ki muʻá, te ne ʻiloʻi ʻoku lava ke ne maʻu ʻa e ngaahi kaungāmeʻa moʻoni ʻi he kautaha ʻa Sihová.​—Mk. 10:29, 30; 1 Pita 4:4.

FAKAMAMAFAʻI ʻA E TAUMUʻA ʻO E FAKATAPUÍ MO E PAPITAISÓ

12. Ko e hā ʻoku totonu ai ke tau talanoa fekauʻaki mo e fakatapui mo e papitaiso faka-Kalisitiané mo ʻetau tokotaha akó?

¹² Talanoa tauʻatāina fekauʻaki mo e fakatapui mo e papitaiso faka-Kalisitiané. He ko ē, ko ʻetau taumuʻa ki hono fakahoko ha ako Tohi Tapú ke tokoniʻi ha tokotaha ke hoko ko ha ākonga ʻosi papitaiso. ʻI he hili pē ha ngaahi māhina siʻi ʻo ha ako Tohi Tapu tuʻumaʻu pea tautefito ʻi he hili ʻa e kamata maʻu ʻe he tokotaha akó ʻa e ngaahi fakatahá, ʻoku totonu ke ne mahinoʻi ko e taumuʻa ʻo e ako Tohi Tapú ke tokoniʻi ia ke kamata tauhi kia Sihova ko e taha ʻEne Kau Fakamoʻoní.

13. Ko e hā ʻa e ngaahi sitepu ʻoku fou ai ha tokotaha ako ʻi heʻene fakalakalaka ki he papitaisó?

¹³ ʻOku ʻi ai ʻa e ngaahi sitepu ke fou ai ha tokotaha ako Tohi Tapu loto-moʻoni ke aʻusia ʻa e taumuʻa ki he papitaisó! ʻUluakí, ko e tokotaha akó ʻokú ne hoko ʻo ʻiloʻi pea ʻofa kia Sihova pea tui kiate Ia. (Sione 3:16; 17:3) ʻOku fakatupulekina leva ʻe he tokotaha akó ha vahaʻangatae mo Sihova pea kamata ke feohi mo e fakatahaʻangá. (Hep. 10:24, 25; Sēm. 4:8) Faai atu pē, ʻoku talitekeʻi ʻe he tokotaha akó ʻa e ngaahi tōʻonga koví pea fakatomalaʻi ʻene ngaahi angahalá. (Ngā. 3:19) ʻI he taimi tatau, ʻoku ueʻi ia ʻe heʻene tuí ke vahevahe atu ʻa e moʻoní ki he niʻihi kehé. (2 Kol. 4:13) ʻOkú ne fakatapui leva ia kia Sihova pea fakaʻilongaʻi ʻene fakatapuí ʻaki ʻene papitaiso. (1 Pita 3:21; 4:2) Pea he ʻaho fakafiefia ē ko ia ki he tokotaha kotoa! ʻI he fou ʻa e tokotaha akó ʻi he sitepu taki taha ke aʻusia ʻene taumuʻá, hokohoko atu hono fakaongoongoleleiʻi mo fakalototoʻaʻi loto-moʻoni ia ke laka ki muʻa ai pē ʻi he ʻalunga totonú.

SIVISIVIʻI MEI HE TAIMI KI HE TAIMI ʻA E FAKALAKALAKA ʻA E TOKOTAHA AKÓ

14. ʻE lava fēfē ke sivisiviʻi ʻe ha faiako ʻa e fakalakalaka ha tokotaha ako?

¹⁴ ʻOku fiemaʻu ke tau anga-kātaki ʻi he taimi ʻoku tau tokoniʻi ai ha tokotaha ako ke fakalakalaka ki he fakatapuí mo e papitaisó. Ka ʻe aʻu ki ha tuʻunga, ʻoku fiemaʻu ke tau vakaiʻi pe ʻokú ne maʻu ʻa e holi ke tauhi kia Sihova ko e ʻOtuá. ʻOkú ke sio ki ha ngaahi fakaʻilonga ʻoku feinga ʻa e tokotaha akó ke talangofua ki he ngaahi fekau ʻa Sīsuú? Pe ko ʻene akó pē ke maʻu ʻa e ngaahi moʻoniʻi meʻa mei he Tohi Tapú?

15. Ko e hā ʻa e ngaahi fakaʻilonga ʻoku fakahaaʻi ai ki ha faiako ʻoku fakalakalaka ha tokotaha ako?

¹⁵ Sivisiviʻi maʻu pē ʻa e fakalakalaka ʻa e tokotaha akó. Ko e fakatātaá, ʻokú ne fakahaaʻi ʻene ngaahi ongoʻi fekauʻaki mo Sihová? ʻOkú ne lotu kia Sihova? (Saame 116:1, 2) ʻOkú ne saiʻia ʻi hono lau ʻa e Tohi Tapú? (Saame 119:97) ʻOkú ne maʻu maʻu pē ʻa e ngaahi fakatahá? (Saame 22:22) Kuó ne fai ha liliu ʻi heʻene founga moʻuí? (Saame 119:112) Kuó ne vahevahe atu ʻa e meʻa ʻokú ne akó ki hono fāmilí mo e ngaahi kaungāmeʻá? (Saame 9:1) Ko e meʻa mahuʻinga tahá, ʻokú ne loto ke hoko ko e taha ʻo e Kau Fakamoʻoni ʻa Sihová? (Saame 40:8) Kapau ʻoku ʻikai ke fai ʻe he tokotaha akó ha fakalakalaka ʻi he ngaahi tafaʻaki ko ení, feinga fakapotopoto ke ʻiloʻi ʻa e ʻuhingá pea lāulea leva ki ai mo ia ʻi he anga-lelei kae hangatonu.e

16. Ko e hā te ne fakahaaʻi nai ʻoku totonu ke taʻofi ha ako Tohi Tapu?

¹⁶ Sivisiviʻi mei he taimi ki he taimi pe ʻoku totonu ke kei hokohoko atu hoʻo ako mo ha tokotaha. ʻEke hifo kiate koe: ‘ʻOku taʻeteuteu ʻe he tokotaha akó ʻene akó? ʻOku ʻikai ke ne mahuʻingaʻia ʻi he maʻu ʻa e ngaahi fakatahá? ʻOkú ne kei fai nai ha ngaahi tōʻonga kovi? ʻOkú ne kei hoko ko ha konga ʻo ha lotu loi?’ Kapau ko e talí ko e ʻio, ʻe hangē ia ha feinga ke akoʻi ha taha ke poto he kakaú ka ʻoku ʻikai ke loto ia ke pā ki he vai! Kapau ʻoku ʻikai ke houngaʻia moʻoni ʻa e tokotaha akó ʻi he meʻa ʻokú ne akó pea ʻikai loto-lelei ke fai ha liliu, ko e hā ke kei hokohoko atu ai ʻa e ako mo iá?

17. Fakatatau ki he 1 Tīmote 4:16, ko e hā kuo pau ke fai ʻe he kotoa ʻo e kau faiako Tohi Tapú?

¹⁷ ʻOku tau tokanga fakamātoato ki hotau fatongia ke ngaohi ākongá, pea ʻoku tau loto ke tokoniʻi ʻetau kau ako Tohi Tapú ke fakalakalaka ki he papitaisó. Ko e ʻuhinga ia te tau tuku ai ʻa e Tohi Tapú ke ne fai ʻa e faiakó pea te tau faiako ʻaki ʻa e faivelenga mo e tuipau. Te tau fakalototoʻaʻi ʻa e tokotaha akó ke maʻu ʻa e ngaahi kaungāmeʻa ʻi he fakatahaʻangá. Pea te tau fakamamafaʻi ʻa e taumuʻa ʻo e fakatapuí mo e papitaisó, ʻo sivisiviʻi mei he taimi ki he taimi ʻa e fakalakalaka ʻa e tokotaha akó. (Sio ki he puha “Meʻa ke Fai ʻe he Kau Faiakó ke Taki Atu ʻa e Kau Akó ki he Papitaisó.”) ʻOku tau fiefia ʻi he lava ke tau kau ki he ngāue fakahaofi moʻui ko ení! ʻOfa ke tau fakapapauʻi ke fai hotau lelei tahá ke fakahoko ʻa e ngaahi ako Tohi Tapu fakalakalaka ʻe taki atu ki he papitaisó.