Ko ha Tohi mei he Kulupu Pulé
Siʻi Fanga Tokoua mo e Tuofāfine:
Ko Sihova, ʻa ʻetau Tamai fakahēvaní ko e faʻifaʻitakiʻanga haohaoa ia ʻo e ʻofá. Ko ia, ʻoku pehē ʻe he Tohi Tapú: “Ko e ʻOtuá ko e ʻofa.” (1 Sio. 4:8) Neongo ko Sihová ʻoku Māfimafi-Aoniu, ko ʻene Folofolá ʻoku ʻikai ʻaupito pehē ai ko e “ʻOtua ko e mālohi” pe ko e “ʻOtua ko e māfimafi.” ʻOku fakatuʻunga ʻene pulé ʻi he ʻofá. ʻOku tohoakiʻi kitautolu ʻe he meʻa ko ení kiate ia!
Ko e fakafiefiá ʻoku ʻikai ke fakamālohiʻi kitautolu ʻe Sihova ke tauhi ange kiate ia. ʻOku ʻikai ko ha tokotaha fakaaoao. ʻOkú ne fiemaʻu ke tau tauhi ia ʻi he ʻofa mei hotau lotó. ʻI heʻetau fai ení, ʻoku fakahāhā ʻoku tau fiemaʻu ʻene tuʻunga-pulé koeʻuhi he ʻoku tau tui ko e founga ʻo ʻene pulé ʻoku totonu mo anga-ʻofa. Kuo hā mahino eni mei he kamataʻanga ʻo e hisitōlia ʻo e tangatá.
ʻI he ʻikai ke kounaʻi ʻa ʻĀtama mo ʻIvi ke talangofua ange kiate iá, naʻe ʻoange ʻe Sihova ʻa e faingamālie ke na fai pē ʻena fili. Kapau naʻá na ʻofa moʻoni ʻia Sihova mo fakamahuʻingaʻi ʻa e meʻa naá ne fai maʻa kinauá, naʻá na mei tali tekeʻi ʻa e ngaahi feinga ʻa Sētane ke na angatuʻú.
Ki mui ai, naʻe pehē ʻe Mōsese ʻi heʻene lea fakaʻosi ki he puleʻanga ʻo ʻIsilelí: “Vakai kuo u tuku ʻi ho ʻao he ʻaho ni ʻa e moʻui mo e lelei, pea mo e mate mo e kovi.” (Teu. 30:15) ʻOku tauʻatāina ʻa e kakaí ke nau fili ki heʻenau founga moʻuí. ʻI he tuʻunga meimei tatau, naʻe tala ʻe Siosiua ki he kau ʻIsilelí: “Kapau ʻoku ha kovi kiate kimoutolu ke tauhi ʻa Sihova, mou fai hoʻomou fili he ʻaho ni pe ko hai te mou tauhi ki ai.” ʻI he talí, naʻe pehē ʻe he kakaí kia Siosiua: “Mole ke mamaʻo haʻamau liʻaki ʻa Sihova.” (Sios. 24:15, 16) ʻOku pehē pē ʻa e anga ʻetau ongoʻi he ʻaho ní. Koeʻuhi ko ʻetau ʻofa kia Sihová ʻoku “mole ke mamaʻo” ke tau liʻaki ia.
ʻI he fakatahaʻanga Kalisitiané, ʻoku tau ʻiloʻi lelei ʻa e ʻuhinga ʻo e tauʻatāina ke filí. Lolotonga ʻoku fakamafaiʻi ʻa e kau mātuʻá ke fai ha faleʻi pea aʻu ʻo tautea, ʻoku ʻikai ke nau feinga ke puleʻi pe fakalele ʻa e moʻui pe tui ʻa e niʻihi kehé. Naʻe tohi ʻe he ʻapositolo ko Paulá: “ʻO ʻikai ko e pehē ko e kau pule kimautolu ki hoʻomou tuí, ka ko e kau kaungāngāue kimautolu ke mou fiefia ai, he ʻoku mou tuʻú ko e meʻa ʻi hoʻomou tuí.”—2 Kol. 1:24.
He fakafiemālie ē ke fai ha meʻa koeʻuhi ʻoku tau loto ke fai ia kae ʻikai ko e fakamālohiʻi ke fai ia! ʻOku fakaafeʻi kitautolu ʻe Sihova ke tau fai ʻa e meʻa ʻoku leleí ʻi he ʻofa. Ko hono mahuʻingá ʻoku hā ia ʻi he tohi fakamānavaʻi ʻa Paula: “Kapau ʻoku ou foaki atu ʻeku ngaahi meʻa kotoa pē ke fafanga ʻa e niʻihi kehé, pea kapau ʻoku ou tuku atu hoku sinó, ke u pōlepole ai, kae ʻikai te u maʻu ʻa e ʻofá, ʻoku ʻikai hano ʻaonga ʻe taha ia kiate au.”—1 Kol. 13:3.
He fakafiefia ē kia Sihova—mo lāngilangiʻia—ke sio ki he laui miliona ʻo hotau fanga tokouá mo e tuofāfiné ʻoku tauhi ange koeʻuhi ko ʻenau ʻofa kiate ia ʻaki honau lotó kotoa!
ʻI he tafaʻaki ʻe tahá, ʻoku ʻofa moʻoni ʻa Sihova ʻi he kotoa ʻo ʻene kau sevānití, kau kotoa ai mo kimoutolu fānau mo e toʻutupu ʻa ē ʻoku mou fakahāhā ʻa e ʻofa kia Sihová kae ʻikai ko e māmaní mo e fakahōhōʻiaʻi-kita ʻokú ne tuʻuaki maí. Fakapapauʻi foki, ʻoku mau ʻofa moʻoni atu kia kimoutolu.—Luke 12:42, 43.
ʻI he ʻofa kia Sihová, ko e taʻu kuo ʻosí ko kimoutolu fanga tokoua, tuofāfine mo e fānau naʻa mou fakamoleki ʻa e houa ʻe 1,748,697,447 ʻi hono talaki ʻa e ongoongo leleí. ʻI hono ueʻi ʻe he ʻofá ko e toko 7,782,346 naʻe kau ʻi he ngāue fakafaifekau ʻi māmaní. ʻOku tau fiefia ʻi he toko 268,777 foʻou, kau ai ʻa e fānau naʻe fakahāhā ʻenau fakatapui kia Sihová fakafou ʻi he papitaiso. ʻOku ʻuhinga iá ko e toko 5,168 nai naʻe papitaiso ʻi he fakaʻosinga uike taki taha. He maongo moʻoni eni ki hotau lotó!
ʻI he taimi ko eni ʻo e ngataʻangá, ko e kakai ʻa e ʻOtuá ʻoku nau fekuki mo e ngaahi palopalema, pole, fakatanga, puke pea ko e niʻihi ʻoku nau fekuki mo e taʻu motuʻá. Ka ʻoku tau fakapapauʻi ke ʻoua ʻe “tauholomui” pe “foʻi.” ʻOku mau ʻofa lahi atu kia kimoutolu kotoa.—Hep. 10:39; 2 Kol. 4:16.
Ko homou fanga tokoua,
Kulupu Pule ʻo e Kau Fakamoʻoni ʻa Sihová