Hanganaki Fakalakalaka ʻi he Tuʻunga ko e Faifekau
1. Ko e hā ʻa e ngaahi faʻifaʻitakiʻanga mei he ʻuluaki senitulí ʻoku fakahaaʻi ai ʻa e totonu ke tau fakalakalaka ʻi he tuʻunga ko e kau faifekaú?
1 ʻOku totonu ke fakalakalaka ʻa e kau Kalisitiané ʻi he tuʻunga ko e kau faifekau. Ko e ʻuhinga ia naʻe akoʻi ai ʻe Sīsū hono kau muimuí ke nau fakalakalaka ʻi he ngāue fakamalangá. (Luke 9:1-5; 10:1-11) Ko e ʻuhinga foki ia naʻe ʻave ai ʻe ʻAkuila mo Pīsila ʻa ʻApolosi ke nau oó peá na “fakamatalaʻi ʻo toe totonu ange ʻa e ʻalunga ʻo e ʻOtuá kiate ia.” (Ngā. 18:24-26) ʻI he ʻuhinga tatau, naʻe fakalototoʻaʻi ʻe Paula ʻa e tokotaha ʻevangeliō taukei ko Tīmoté ke hokohoko atu hono ngāueʻaki ʻene ngaahi akonakí koeʻuhí ke hoko ai ʻene laka ki muʻá ʻo “hā mahino atu ki he tokotaha kotoa.” (1 Tīm. 4:13-15) Tatau ai pē pe ko e hā ʻa e fuoloa ʻetau ngāue fakatamaioʻeiki maʻá e ʻEikí ʻi he tuʻunga ko e kau malangaʻi ʻo e ongoongo leleí, ʻoku fiemaʻu ke tau hokohoko atu ʻi hono fakamāsilaʻi ʻetau pōtoʻi ʻi he ngāue fakamalangá.
2. ʻE lava fēfē ke tau ako mei he niʻihi kehé?
2 Ako mei he Niʻihi Kehé: Ko e founga ʻe taha ke fakaleleiʻi ai ʻetau pōtoʻí ko e ako mei he niʻihi kehé. (Pal. 27:17) Ko ia ai, tokanga ki he taimi ʻoku malanga ai ho kaungā malangá. Kole ki ha ngaahi fokotuʻu pau mei he kau malanga ola leleí, pea fanongo tokanga ki he meʻa ʻoku nau leaʻakí. (Pal. 1:5) ʻOkú ke fakapapauʻi ʻa e founga ke fai ai ha toe ʻaʻahi, kamata ha ako Tohi Tapu pe kau atu ʻi ha tafaʻaki pē ʻo e ngāue fakafaifekaú? Hoko ʻo tamuʻomuʻa, pea kole ki hoʻo ʻovasia kulupú pe ko ha tokotaha malanga taukei ke ne akoʻi koe. Manatuʻi foki, ʻoku lava ʻe he laumālie māʻoniʻoni ʻo Sihová ke ne fakaleleiʻi ʻetau ngaahi malavá, ko ia kole maʻu pē ia ʻi he lotu.—Luke 11:13.
3. ʻOku totonu ke fēfē ʻetau fakafeangaí kapau ʻoku ʻomai ha fokotuʻu naʻe ʻikai nai ke tau kole ki ai?
3 ʻOua te ke ʻita kapau ʻoatu ha fokotuʻu ke ke fakalakalaka ai, neongo naʻe ʻikai te ke kole ki ha tokoni. (Koh. 7:9) Hangē ko ʻApolosí, tali ʻa e tokoní ʻi he anga-fakatōkilalo mo e houngaʻia. ʻI he fai pehē ʻoku fakahaaʻi ai ʻa e potó.—Pal. 12:15.
4. Ko e hā ʻa e ʻuhinga mālohi naʻe ʻomai ʻe Sīsū ke hoko ai ʻo fakalakalaka ʻi he tuʻunga ko ha tokotaha ʻevangeliō?
4 Fakalakalaká ʻOku Fakalāngilangiʻi Ai e ʻOtuá: ʻI he talanoa fakatātaá, naʻe fakalototoʻaʻi ai ʻe Sīsū ʻa hono kau muimuí ke nau fakalakalaka ʻi he tuʻunga ko e kau faifekau. Naʻá ne fakahoa ia ki ha fuʻu kālepi pea ko hono kau muimui paní ki he ngaahi vaʻa. Naʻá ne pehē ko e vaʻa kotoa pē ʻoku fua ʻoku ʻauhani ia ʻe he Tamaí ke maʻa “koeʻuhi ke fua lahi ange.” (Sione 15:2) Hangē pē ko e loto ha tokotaha ʻoku ʻoʻona ha ngoueʻanga ke hoko ʻo toe fua lahi ange ʻa e ngaahi vaʻa ʻi heʻene ngoue kālepí, ʻoku loto ʻa Sihova ke hokohoko atu ʻetau malava ko ia ke fakatupulekina ʻa e “fua ʻo hotau loungutú.” (Hep. 13:15) Ko e hā ʻa e ola fakafiemālie ʻoku tau maʻu ʻi he taimi ʻoku tau fai ai ha fakalakalaka ʻi he tuʻunga ko e kau ʻevangeliō? ʻOku ʻomai ʻe Sīsū kiate kitautolu ʻa e talí: “ʻOku fakalāngilangiʻi ʻeku Tamaí ʻi he meʻá ni, ʻa ia ke hokohoko atu hoʻomou fua lahí.”—Sione 15:8.