Hoko ko ha Faifekau Fakalakalaka
1 ʻOku fiefia ʻetau Tamai fakahēvaní ʻi he taimi ʻoku laka ki muʻa fakalaumālie ai ʻene kau sevānití. ʻOku kau ki ai ʻa e fakalakalaka ke hoko ko ha tokotaha malanga matuʻotuʻa mo ola lelei ʻo e ongoongo leleí. Naʻe fakalototoʻaʻi ʻe Paula ʻa e ʻovasia ko Tīmoté ke hokohoko atu ʻene tokanga ki he ngaahi akonakí koeʻuhi ke hā ki he kakai kotoa ʻene laka ki muʻá. (1 Tim. 4:13-15) ʻOku totonu ke tau feinga kotoa ke fakaleleiʻi ʻa e tuʻunga ʻo ʻetau ngāue fakafaifekaú, naʻa mo e niʻihi ʻo kitautolu ko e kau malanga taukeí.
2 Fokotuʻu ʻa e Ngaahi Taumuʻa Fakafoʻituitui: Ko hono fai ʻo ha fakalakalaká ʻoku fiemaʻu ki ai hono fokotuʻu ʻa e ngaahi taumuʻa fakafoʻituitui. Ko e hā ha ngaahi taumuʻa ʻe niʻihi ʻe lava ke tau fokotuʻu maʻatautolú? Te tau feinga nai ke tau hoko ʻo pōtoʻi ange ʻi hono ngāueʻaki ʻetau heletā fakalaumālie, ko e Tohi Tapú. (Ef. 6:17) Mahalo ʻoku ʻi ai ha tafaʻaki ʻo e ngāue fakafaifekaú ʻoku fiemaʻu hano fakaleleiʻi, hangē ko e faifakamoʻoni ʻi he halá, faifakamoʻoni ʻi he telefoní, pe ko e ngāue ʻi he ngaahi feituʻu fakapisinisí. Mahalo ʻe lava ke tau ngāue ki hano fai ʻo ha ngaahi toe ʻaʻahi ʻoku ola lelei angé. ʻE lava ke hoko ko ha taumuʻa lelei ʻaupito ʻe taha ʻa hono fakaleleiʻi ʻetau malava ko ia ke kamata pea mo fakahoko ʻa e ngaahi ako Tohi Tapú.
3 Ngaahi Tokonaki: ʻOku fokotuʻutuʻu ʻa e ngaahi fakataha ʻa e fakatahaʻangá, tautautefito ki he Ako Fakafaifekau Fakateokalatí mo e Fakataha Ngāué ke tokoniʻi kitautolu ke tau laka ki muʻa ʻi heʻetau hoko ko e kau faifekaú. Ko e lahi ange ʻa ʻetau feinga ko ia ke teuteu mo maʻu ʻa e ngaahi fakatahá pea ngāueʻaki ʻa e ngaahi fokotuʻu ʻoku ʻomaí, ko e lahi ange ia ʻa e ngaahi ʻaonga te tau maʻu mei aí.—2 Kol. 9:6.
4 ʻOku toe fiemaʻu foki ki he fakalakalaká ʻa ʻetau fetokoniʻakí. (Pal. 27:17) ʻE tokoni ki heʻetau fakalakalaká ʻa e fanongo tokanga ko ia ki he tuʻuaki ʻa e tokotaha ʻokú te ngāue mo ia ʻi he ngāue fakafaifekaú. Tānaki atu ki aí, ʻe lava ke fokotuʻutuʻu ʻe he ʻovasia ako tohí ke tokoniʻi fakafoʻituitui kitautolu. He tāpuaki moʻoni ia ʻa hono tokoniʻi kitautolu ʻe ha tāimuʻa taukei pe ko ha toe tokotaha malanga ʻe taha ke tau hoko ʻo ola lelei ange mo fiefia lahi ange ʻi he ngāue fakafaifekaú! ʻOku ʻi ai ha tokotaha malanga foʻou ʻi heʻetau kulupu ako tohí? Mahalo ʻe lava ke tau tamuʻomuʻa ʻi hono fakaafeʻi ia ke ngāue mo kitautolu.
5 Ko e ngāue mahuʻinga taha ʻoku lolotonga fakahoko ʻi he ʻaho ní ʻa e ngāue fakafaifekau faka-Kalisitiané. ʻI hono ʻoatu kia Sihova ʻetau “feilaulau fakafetaʻi,” ʻoku tau fiemaʻu ke ʻoatu kiate ia hotau lelei tahá. (Hep. 13:15) Kapau ʻoku tau feinga ke tau hoko ʻo fakalakalaka ʻi he ngāue fakafaifekaú, te tau hoko ai ko e kau tangata ngāue “ʻoku ʻikai mā, ko [ʻetau] tofa totonu ʻa e folofola ʻo e moʻoni.”—2 Tim. 2:15.