Fokotuʻu ha Ngaahi Taumuʻa Fakalaumālie
1 Ko ha monū moʻoni ia ke fakahīkihikiʻi ʻa Sihova ʻi he kotoa ʻo ʻitānití! Ke tokoniʻi kitautolu ke lavaʻi ʻa e taumuʻa ko iá, ʻe lava ke tau fokotuʻu ha ngaahi taumuʻa fakalaumālie lahi ange he taimí ni pea ngāue ke aʻusia kinautolu. ʻOku ʻai ʻe he meʻá ni ke tau malava ai ʻo ngāue fakapotopoto ʻaki hotau iví. (1 Kol. 9:26) Ko e hā ʻa e ngaahi taumuʻa ʻe lava ke ke aʻusiá?
2 Ako Tohitapu: ʻOkú ke teuteu ki he fakataha taki taha ʻa e fakatahaʻangá? Kapau ko ia, ʻokú ke fakaʻatā ha taimi ke fekumi ai mo fakalaulauloto ʻi he taimi ʻokú ke ako aí? Ko e fakatātaá, ʻi he teuteu ki he Ako Taua Leʻo fakauiké, mo e Ako Tohi ʻa e Fakatahaʻangá, ʻokú ke laineʻi pē ʻa e ngaahi talí pe ʻokú ke sio ki he ngaahi konga Tohitapu ʻoku hā aí pea toe fakakaukauloto ki he ngaahi ʻuhinga ʻo e fakamatala ʻoku ʻomaí? ʻE lava ke ke ʻai ko hoʻo taumuʻá ia ke fai ha fekumi ʻi ha ngaahi poini ʻi he uike taki taha mei he lau Tohitapu kuo vaheʻi ki he Ako Fakafaifekau Fakateokalatí? Ko e keli fakalaumālie peheé ʻoku fiemaʻu ki ai ʻa e taimi mo e feinga, ka ʻoku ʻomai ai ʻa e pale lahi.—Pal. 2:4, 5.
3 Ngaahi Fakataha ʻa e Fakatahaʻangá: Ko e toe taumuʻa ʻe taha ko hono maʻu tuʻumaʻu ʻa e fakataha kotoa ʻe nima ʻa e fakatahaʻangá. Ko e aʻu tōmuʻa feʻunga ke feohi mo e kaungātuí pea ke kau ʻi he hiva kamatá mo e lotú ʻoku tokoni ia ke langa hake ai ʻa e laumālie ʻo e fakatahaʻangá. Te tau toe feinga nai ke tali ʻi he fakataha taki taha pea ngāue ki hono fakaleleiʻi ʻetau ngaahi talí. Mahalo pē ʻe lava ke ke fakahaaʻi ʻa e anga ʻo e kaunga ʻa ha konga Tohitapu ʻi he palakalafí ki he lāuleá pe fakahaaʻi ʻa e anga ʻo hono ngāueʻaki ʻa e fakamatalá ʻi he moʻui fakaʻahó.—Hep. 10:24, 25.
4 Malaʻe Ngāué: ʻOku fakalakalaka lahi ʻetau ngāue fakafaifekaú ʻi he taimi ʻoku tau fokotuʻu ai ʻa e ngaahi taumuʻá. ʻOkú ke maʻu ha taumuʻa fakafoʻituitui ʻo ha ngaahi houa ʻokú ke palani ke fakamoleki ʻi he ngāué ʻi he māhina taki taha? ʻOku ʻiloʻi ʻe he niʻihi ʻa e ʻaonga ʻo e meʻa ko iá. Pe ʻe lava ke ke fakalakalaka ʻi ha tafaʻaki ʻo hoʻo ngāue fakafaifekaú, hangē ko hono ngāueʻaki ʻa e Tohitapú ʻi he ngāue fale-ki-he-falé, fai ha ngaahi toe ʻaʻahi mohu ʻuhinga ange, feinga ke kamata ha ako Tohitapu, pe ko e faiako ola lelei ange ʻi he ngaahi akó?
5 Ngaahi mātuʻa, ʻoku mou fakaʻaiʻai hoʻomou fānaú ke nau fokotuʻu ha ngaahi taumuʻa ʻi he ngāue ʻa Sihová? Tokoniʻi kinautolu ke nau sio ko e ngāue ʻi he tuʻunga ko ha tāimuʻá, ko ha misinalé, pe ko ha mēmipa ʻo e fāmili Pētelí ko ha founga lelei ʻaupito ia ke fakahaaʻi ai ʻa e loloto ʻo ʻenau houngaʻia kia Sihová.—Koh. 12:1.
6 ʻI heʻetau sivisiviʻi ʻetau ngaahi ngāué, fokotuʻu ʻa e ngaahi taumuʻa fakalaumālié, pea ngāue leva ke aʻusia kinautolú, te tau maʻu ai ʻa e fiefia lahi ange ʻi heʻetau ngāué pea hoko ai ko ha matavai ʻo e fakalototoʻa ki he niʻihi kehé.—Loma 1:12.