ʻOfa ki Hotau Kaungā-Faʻahinga ʻo e Tangatá

ʻI he tuʻunga ko e hako ʻo e ʻuluaki tangatá, ʻa ʻĀtama, ʻoku tau hoko ko ha fāmili ʻe taha. Neongo ʻoku ʻamanekina mei he ngaahi mēmipa ʻo e fāmilí ke nau feʻofaʻaki mo fefakaʻapaʻapaʻaki, ʻi he ʻahó ni ʻoku faingataʻa ke maʻu ʻa e ʻofa ko iá. ʻOku ʻikai ko e finangalo ia ʻa hotau ʻOtua ʻofá.

MEʻA ʻOKU LEAʻAKI ʻE HE FOLOFOLÁ FEKAUʻAKI MO E ʻOFÁ

“Kuo pau ke ke ʻofa ki he tokotaha kehé ʻo hangē pē ko hoʻo ʻofa kiate koé.”​—LIVITIKO 19:18.

“Hokohoko atu hoʻomou ʻofa ki homou ngaahi filí.”​—MĀTIU 5:44.

ʻUHINGA ʻO E ʻOFA KI HE KAUNGĀ-FAʻAHINGA ʻO E TANGATÁ

Fakatokangaʻi ʻa e anga hono fakamatalaʻi ʻe he ʻOtuá ʻa e ʻofá ʻi heʻene Folofolá ʻi he 1 Kolinitō 13:4-7:

“Ko e ʻofá ʻoku kātaki mo anga-lelei.”

Fakakaukau angé: ʻOku anga-fēfē hoʻo ongoʻí ʻi he kātaki mo anga-lelei atu ʻa e niʻihi kehé pea ʻikai ke nau ʻita ʻi hoʻo fai ha fehālaaki?

“Ko e ʻofá ʻoku ʻikai te ne meheka.”

Fakakaukau angé: ʻOku anga-fēfē hoʻo ongoʻí ʻi he huʻuhuʻu tōtuʻa mo loto-kovi atu ʻa e niʻihi kehé?

Ko e ʻofá “ʻoku ʻikai te ne kumi ki heʻene lelei pē ʻaʻana.”

Fakakaukau angé: ʻOku anga-fēfē hoʻo ongoʻí ʻi he loto-lelei ʻa e niʻihi kehé ke fakaʻapaʻapaʻi hoʻo fakakaukaú pea ʻikai vilitaki ke tuʻu pē haʻanautolú fakakaukau?

Ko e ʻofá “ʻoku ʻikai te ne hanganaki fakalau ʻa e koví.”

Fakakaukau angé: Ko e ʻOtuá ʻokú ne loto-lelei ke fakamolemoleʻi ʻa e kakai faiangahala fakatomalá. “ʻE ʻikai te ne fakasio hala maʻu ai pē, pe nofoʻaki houhau ai pē.” (Saame 103:9) ʻOku tau houngaʻia ʻi hono fakamolemoleʻi kitautolu ʻe ha taha naʻa tau fakalotomamahiʻi. Ko ia ʻoku totonu ke tau mateuteu ke fakamolemoleʻi ʻa e niʻihi kehé ʻi heʻenau fakalotomamahiʻi kitautolú.​—Saame 86:5.

Ko e ʻofá “ʻoku ʻikai te ne fiefia ʻi he taʻemāʻoniʻoní.”

Fakakaukau angé: ʻI he hoko mai ha faingataʻa kiate kitautolu, ʻoku ʻikai ke tau saiʻia ke fiefia ʻa e niʻihi kehé ʻi heʻetau faingataʻaʻiá. Ko ia ʻoku ʻikai ke tau fiefia ʻi he faingataʻaʻia ʻa e niʻihi kehé, neongo kapau naʻa nau ngaohikoviʻi kitautolu.

Ke maʻu ʻa e tāpuaki ʻa e ʻOtuá, kuo pau ke tau ʻofa ki he niʻihi kehé ʻo hangē ko e ngaahi founga ko ení ʻo tatau ai pē pe ko hai kinautolu. Ko e founga ʻaonga ʻe taha ʻe lava ke tau fai ai eni ko e tokoni ki he faʻahinga ʻoku masivá.