Pelepaʻangá—Ko ha Meʻa Fakamānako ʻi Māmani Lahi
O John, ʻa ia naʻe tupu hake ia ʻi Sikotilani, naʻá ne fakaʻānaua ki hano ikunaʻi ʻa e lulú. “Naʻá ku fakatau ha tikite lulu ʻi he uike kotoa pē,” ko ʻene leá ia. “Naʻá ku fakamoleki ai ha kiʻi paʻanga siʻisiʻi pē, ka ko e tikite ko iá naʻá ne ʻomai kiate au ʻa e ʻamanaki ki hono maʻu ʻa e meʻa kotoa pē naʻá ku loto ke maʻú.”
Ko Kazushige, ʻa ia ʻoku nofo ʻi Siapani, ʻokú ne manako ʻi he lova hōsí. “Ko e pelepaʻanga ʻi he lovaʻangá mo hoku ngaahi kaumeʻá ko ha meʻa fakaoli lahi ia, pea naʻá ku ikunaʻi ai ʻi he taimi ʻe niʻihi ha fuʻu paʻanga lahi,” ko ʻene manatú ia.
“Ko e pingikoú ʻa ʻeku vaʻinga manakó,” ko e lau ia ʻa Linda, ʻa ia ʻoku nofo ʻi ʻAositelēlia. “Ko e tōʻonga ko ení ʻoku ou fakamoleki nai ai ha $30 (U.S.) he uike, ka ʻoku ou manako he ongoʻi fiefialoto ʻi he ikuná.”
Ko John, Kazushige, mo Linda naʻa nau vakai ki he pelepaʻangá ko ha founga ia ʻo e fakafiefiá ʻoku ʻi he tuʻunga taʻehanomaumau. Ko e kakai ʻe laui teau miliona takatakai ʻi he foʻi kolopé ʻoku nau maʻu ʻa e fakakaukau tatau. Ko ha pāloti Gallup ʻi he 1999 naʻe fakahaaʻi ai ko e vahe tolu ʻe ua ʻo e kau ʻAmeliká naʻa nau tali lelei ʻa e pelepaʻangá. ʻI he 1998, naʻe fakamoleki ai ʻe he kau pelepaʻanga ʻAmeliká ʻa e $50 piliona ʻi he pelepaʻanga fakalaó—ʻo laka ange ia ʻi he meʻa naʻa nau fakamoleki ʻi hono fakatahaʻi ʻa e ngaahi tikite heleʻuhilá, fasi kuo hikí, ngaahi sipoti ʻoku manakoa ʻe he kau mamatá, ngaahi paʻake vaʻingá, mo e ngaahi keimi vitioó.
Fakatatau ki ha fakatotolo ki muí ni, ʻi he lolotonga ʻo e vahaʻa taimi taʻu ʻe tahá, kuo laka hake ʻi he peseti ʻe 80 ʻo e kakai ʻo ʻAositelēliá naʻa nau pelepaʻanga ʻo ʻikai siʻi hifo he tuʻo tahá, pea naʻe pelepaʻanga ʻa e peseti ʻe 40 ʻi he uike taki taha. Ko e kakai lalahi ʻi he fonua ko iá, ʻi hono fakaʻavalisí, ʻoku nau fakamoleki fakataʻu ʻo laka hake ʻi he $400 (U.S.) ʻi he pelepaʻangá, ko e meimei liunga ua ia ʻo e lahi ʻoku fakamoleki ʻe he kau ʻIulopé pe kau ʻAmeliká, ʻo ʻai ai ʻa ʻAositelēlia ke ʻi he lotolotonga ʻo e kau pelepaʻanga mānumanu taha ʻi he māmaní.
ʻOku maʻunimā ʻa e kau Siapani tokolahi ʻe he pachinko, ko ha vaʻinga hangē ko ia ʻi he mīsini keimí, pea ʻoku nau fakamoleki ai ʻa e laui piliona he taʻu ʻi he peti he keimí. ʻI Pelēsila, ʻoku ʻikai siʻi hifo he $4 piliona ʻoku fakamoleki he taʻu taki taha ʻi he pelepaʻangá, ko e lahi aí ʻi he ngaahi tikite lulú. Ka ʻoku ʻikai ko e kau Pelēsilá pē ʻa e faʻahinga ʻoku manako he ngaahi lulú. Ko e makasini Public Gaming International naʻá ne fakafuofua ki muí ni ʻoku ʻi ai ʻa e “faiʻanga lulu ʻe 306 ʻi he fonua ʻe 102.” Ko e pelepaʻangá ko ha meʻa fakamānako moʻoni ia ʻi māmani lahi—ko ha meʻa fakamānako, ʻa ia ʻoku pehē ʻe he niʻihi ʻoku ʻomai ai ʻa e ngaahi ʻaonga lahi.
Ko Sharon Sharp, ko ha fakafofonga ʻo e Akoʻanga Fakatotolo Fakaekeimi Maʻá e Kakaí, ʻokú ne pehē, ʻi he ʻIunaite Seteté mei he 1964 ki he 1999, ʻoku fakalaka ai ʻa e lulú “ʻo maʻu mei ai ʻa e $125 piliona nai ʻo e paʻanga patiseti ʻa e puleʻangá, ʻa ia ko e konga lahi taha ʻo e paʻanga hū mai ko ení naʻe haʻu ia talu mei he 1993.” Ko e lahi ʻo e paʻanga ko ení naʻe vaheʻi ia ki he ngaahi polokalama ako maʻá e kakaí, ngaahi paʻake fakapuleʻangá, mo e langa ʻo e ngaahi fale sipotí. Ko e ngāueʻanga pelepaʻangá ko ha toe meʻa lahi ia ʻoku fai ʻa e ngāue ai, pea ʻi ʻAositelēlia pē, ʻokú ne fakangāueʻi ai ʻa e kakai ʻe toko 100,000 nai ʻi he ngaahi pisinisi laka hake he 7,000.
Ko ia ai, ko e kau poupou ʻo e pelepaʻangá ʻoku nau fakaʻuhinga ʻo pehē ʻi he tānaki atu ki hono ʻomai ʻa e fakafiefiá, ko e ngaahi pelepaʻanga fakalaó ʻoku tupu mei ai ʻa e ngaahi ngāue, tokonaki mai ʻa e paʻanga hū mai tukuhau, pea fakaleleiʻi ʻa e ngaahi ʻekonōmika fakafeituʻu ʻoku tōlaló.
Ko ia ai, ʻe ʻeke ʻe he kakai tokolahi, ‘Ko e hā hono hala ʻo e pelepaʻangá?’ Ko e tali ki he fehuʻi ko ení, ʻa ia ʻoku lāulea ki ai ʻi he ongo kupu hoko maí, ʻoku ngalingali te ne liliu hoʻo vakai ki he pelepaʻangá.
[Fakatātā ʻi he peesi 3]
John
[Fakatātā ʻi he peesi 3]
Kazushige
[Fakatātā ʻi he peesi 3]
Linda