Ko ha Pī Kainikavea kae ʻAonga

KO E moʻoni, ko e pī ʻikiniumaní ʻoku fōtunga faikehe, ʻo meimei fakailifia. Ka ko e hā ʻoku lau ai ʻoku kainikaveá? Koeʻuhí ʻoku faʻa fanafanau ia ʻaki ʻene fakatō fua ʻi ʻolunga pe ʻi loto he tuʻunga ʻunufe ʻo ha ʻinisēkite kehe, pe ko ha kiʻi hina.

ʻI ʻAmelika Tokelau ʻoku ʻi ai ʻa e faʻahinga laka hake he 3,000 ʻo e fanga pī ʻikiniumani moʻoni ko iá. Ko e fanga pī ko ení, ʻi he tafaʻaki ʻe tahá, ko e konga ia ʻo ha fāmili lahi ʻo e faʻahinga kehekehe ʻo e fanga pī kainikaveá. ʻOku fakafuofua ʻe he kau saienisí ʻi māmani lahi ʻoku kau ʻa e faʻahinga laka hake ʻi he 40,000 ki he fāmili ʻinisēkite ko ení.

Ko e fanga pī ʻikiniumaní ʻoku kehekehe honau lalahí mei he senitimita ʻe 0.3 ki he 5 honau lōloá. Ko honau kete pakiu mo ngaofé, ʻoku lōloa ange ia ʻi hono fakatahaʻi ʻa e ʻulú mo e fatafatá. Ko e fanga ʻikiniumaní ʻoku nau kehe kinautolu mei he fanga pī huhú he ʻoku lōloa ange honau lavé.

Ko e tafaʻaki makehe taha ʻo e fanga ʻikiniumaní ko ha tiupi hangē ha mataʻi huí ʻi he ngataʻanga ʻo honau keté. ʻI hono ui ko ha meʻa fakatō fuá, ko e faʻunga fakatō fua ko ení ʻoku faʻa lōloa ange ia ʻi he sinó. ʻOku fōsiʻi ange ia ʻi ha fulufuluʻi hoosi pea ʻoku ʻi ai hono tuʻoni ʻe tolu hangē ha filó ʻoku fehekeʻaki holo ke tekeʻi mālohi hifo ʻa e fuá ʻi he tiupí.

ʻOku lava fēfē ke ʻiloʻi ʻe he ʻikiniumaní ha ʻunufe ʻe lava ke fakatō ai? Ko e pī fefine Mekalisa, ko ha faʻahinga ʻo e ʻikiniumaní, kuo siofi ʻa ʻene tātaaʻi ha fuʻu ʻakau ʻaki hono lavé ke ʻiloʻi ʻa e ngaungaue holo ʻa ha ʻunufe ʻoku nofo ʻi ha senitimita ʻe ua pe lahi ange ʻi lalo tonu ʻi he kiliʻi ʻakaú. ʻI heʻene ʻiloʻi pē ʻoku ʻi ai ha ʻunufé, ʻoku fakalalahi ʻa ʻene tātāʻí. ʻOku faifai atu pē ʻo ne kamata ke fakahūhū ki he kiliʻi ʻakaú ʻaki ʻa e tiupí, ʻo hangē ʻokú ne viliʻi iá.

Kuo pehē ʻe he kau siofí: “ʻI heʻene aʻu pē ʻa e muiʻi tiupi fakatō fua ʻo e pií ki he ʻunufé, ʻoku fakatō hifo leva ha foʻi fua ʻe taha ki lalo ʻi he tiupí, ke fokotuʻu maʻu ʻo hoko atu, pe ʻi ʻolunga ʻi he ʻunufe kuo teu ke kainikaveá.” ʻI he taimi ʻoku fofoa ai ʻa e fuá, ʻoku kai leva ʻe he ʻunufe foʻoú ʻa e ngako mo e huhuʻa ʻo e sino ʻo e ʻunufe kuo kainikaveá. ʻOkú ne lalanga takai leva ai ha filo silika ʻa ia ʻokú ne tupu ai ʻo hoko ko ha pī kuo fuʻu lahi. ʻI he taimi ʻoku aʻu hake ai ʻa e pií ki tuʻa ʻi he fuʻu ʻakaú, ʻoku mateuteu ia ke ne fakamamahiʻi ha toʻu ʻinisēkite foʻou.

Neongo ʻe fakamatalaʻi nai ʻe ha taha ʻa e kulupu ʻinisēkité ni ko e ngaahi kainikavea anga-fakamamahi, ko e fanga pī ʻikiniumaní ʻoku nau fakahoko ha taumuʻa mahuʻinga. ʻOku kai ʻe honau ʻunufé ʻa e fanga ʻinisēkite ʻa ia ʻoku fakatupu maumau ki he ngoue meʻakaí, ʻo kau ai ʻa e kutu uite, mongomonga vavae, mū ʻāpele, mo e fanga mongomonga lile, ko e niʻihi siʻi pē ia. Ko ia ʻoku hā mahino ʻoku taʻotaʻofi ʻe he fanga ʻikiniumaní ʻa e tupu vave ʻa e fanga ʻinisēkite maumau ki he ngoué.

Neongo ʻoku lahi fau ʻa e fanga ʻikiniumaní, ʻoku tātātaha pē ke sio ki ai ʻa e kakaí koeʻuhí he ʻoku nau meimei kai, fanafanau pea fakatō fua ʻi he ngaahi feituʻu ʻoku tātātaha ke ʻahia ʻe he tangatá. ʻOku hoko ai ʻa e fanga ʻikiniumaní ko ha toe fakatātā ia ʻe taha ʻo e kehekehe mo e palanisi ʻo e ngaahi meʻamoʻui ʻa ia ʻoku teʻeki ai ke mahinoʻi kakato ʻe he tangatá.

[Fakatātā ʻi he peesi 30]

Teuteu ʻa ha pī ʻikiniumani ke fakatō ʻa hono fuá

[Maʻuʻanga]

Scott Bauer/Agricultural Research Service, USDA