Ngaahi Faʻē Fuʻu Kei Siʻi
“Ko hoku kaumeʻá ko ha tama talavou. Naʻe ʻi ai ʻene paʻanga, pea naʻe lava ke ma ō ki he ngaahi feituʻu kehekehe pea maʻu mo e fiefia. ʻI he ʻikai te u puke fakamāhiná, naʻá ku ʻiloʻi naʻe ʻi ai ʻa e meʻa naʻe fehālaaki. ʻE anga-fēfē haʻaku tala ki heʻeku faʻeé? Naʻe lava fēfē ke hoko eni kiate au? Naʻá ku taʻu 16 pē, pea naʻe ʻikai te u ʻiloʻi pe ko e hā ʻa e meʻa te u faí.”—Nīkolo.
ʻI HE ʻahó ni ko Nīkolo,a ʻi hono taʻu tolungofulu tupú, ko ha faʻē loto-maʻu mo longomoʻui ia ʻa e toko tolu. Ko ʻene tama lahi tahá ʻoku taʻu 20. ʻIo, ʻi he ngaahi taʻu kuohilí ko e tokotaha ia ʻi he haʻohaʻonga ʻo e laui miliona ʻo e kau taʻu hongofulu tupu feitama taʻemali. ʻI he hangē ko e ngaahi faʻē taʻu hongofulu tupu kehé, naʻá ne ongoʻi puputuʻu ai ʻi ha ngaahi tuʻunga faingataʻa taʻealaikuʻi, ngaahi fili mafatukituki ke fai pea mo e ngaahi ʻamanaki taʻepau.
ʻOku ʻikai ke faʻa talanoa ʻa Nīkolo fekauʻaki mo e ʻohovale, ko e fakaʻikaiʻi, ko e manavahē, ko e ʻita, pea mo e siva ʻa e ʻamanakí naʻá ne fakaʻilongaʻi ʻa hono taʻu hongofulu tupu lahí—ko ha taimi ʻa ia naʻe hohaʻa ai ʻa hono ngaahi toʻumeʻá fekauʻaki mo honau valá pea mo e kuleiti ʻi he akó. Ka neongo ia, naʻe ʻikai taʻeʻiai ha ʻamanaki ki he tuʻunga ʻo Nīkoló. Naʻá ne haʻu mei ha fāmili ʻofa ʻa ia naʻe feinga ai ke fakahūhū kiate ia ʻa e ngaahi tefitoʻi moʻoni māʻolunga fakaeʻulungāangá. Neongo naʻá ne fili ʻi ha taimi ke liʻaki ʻa e ngaahi tefitoʻi moʻoni ko iá—pea tofanga ʻi hono ngaahi nunuʻá—ki mui ai, naʻe tataki ia ʻe he ngaahi tefitoʻi moʻoni tatau ki ha moʻui fakafiemālie mo mohu ʻuhinga. Naʻe hoko ai ko ʻene motó ko e “ʻIkai ke mole kotoa ʻa e ʻamanakí.”
Ko hono pangó, ʻoku ʻikai ke maʻu ʻe he faʻē taʻu hongofulu tupu kotoa pē ha fāmili poupou—pe ko ha vakai fakatuʻamelie pehē. ʻOku vave ʻa hono ʻiloʻi ʻe he tokolahi ʻoku nau fihia ʻi ha tuʻunga hā ngali tuēnoa taʻeʻiai ha ʻamanaki. Kuo pau ke fekuki ʻa e niʻihi mo e nunuʻa fakaeongo ʻo e tohotohó mo e fakamālohí.
ʻOku ʻikai ha ola lelei ʻo e meʻá ni ki he fānau ʻa e ngaahi faʻē taʻu hongofulu tupú. ʻOku pehē ʻe he tohi Teen Moms—The Pain and the Promise, ko e fanga kiʻi pēpē ʻa e ngaahi faʻē taʻu hongofulu tupú “ʻoku hoko ʻo nau maʻamaʻa ange ʻi honau fanauʻí, lahi ange ʻa e ngaahi mahaki ʻi he kei siʻí, lahi ange ʻa e mate kei valevalé, tokangaʻi fakafaitoʻo taʻefeʻunga ange, faingataʻaʻia lahi ange ʻi he fiekaiá mo e fasimanavá; ʻoku fakamoʻulaloa kinautolu ki he fakamālohi lahi ange, pea tuai ange ʻenau tupú ʻi he fānau naʻe fanauʻi ʻe he ngaahi faʻē taʻumotuʻa angé.” Ko e moʻoni, ko e fānau fefine ʻa e ngaahi faʻē taʻu hongofulu tupú ʻoku ngalingali lahi ange ke nau hoko ko e ngaahi faʻē taʻu hongofulu tupu ʻo laka ia ʻi he fānau ʻoku fanauʻi ʻe he ngaahi faʻē taʻumotuʻa angé.
ʻOku mafolalahia fēfē ʻa e feitama taʻu hongofulu tupú? ʻE lava fēfē ke fehangahangai lavameʻa ʻa e ngaahi faʻē taʻu hongofulu tupú mo e ngaahi pole ʻo hono tauhi hake ʻenau kau valevalé? ʻOku ʻi ai ha founga ke tokoniʻi ai ʻa e toʻutupú ke nau kalofi ʻa e tō ki he ngaahi tuʻunga fakamamahi peheé ʻi he ʻuluaki taimí? ʻOku fakatotoloʻi ʻe he ngaahi kupu hoko maí ʻa e ngaahi fehuʻi ko ení.
[Fakamatala ʻi lalo]
a Kuo fetongi ʻa e ngaahi hingoa ʻe niʻihi ʻi he hokohoko ko ení.