Naʻa Nau Moʻui Fuoloa Pehē Moʻoni?
Fakatatau ki he Tohi Tapú, naʻe moʻui ʻa ʻĀtama ʻi he taʻu ʻe 930, ko Seti ʻi he taʻu ʻe 912 pea ko Mētuisela ʻi he taʻu ʻe 969—ʻa ia ko e nounou ʻaki pē ia ʻa e taʻu ʻe 31 mei he taha afé! (Senesi 5:5, 8, 27) Naʻe lōloa tatau nai ʻa e ngaahi taʻu ko iá mo ʻetau ngaahi taʻu he ʻaho ní, pe ko e ngaahi vahaʻa taimi nounou ange ia, ʻo tatau nai ia mo ʻetau ngaahi māhiná ʻo hangē ko ia ko e fakakaukau ʻa e niʻihi?
Ko e fakamoʻoni ʻi loto he Tohi Tapú ʻoku tuhu ai ki he ngaahi taʻu tonu ʻoku tatau hono lōloá mo ʻetau ngaahi taʻú. Fakakaukau angé: Kapau naʻe lōloa tatau pē ʻa e taʻu he kuonga muʻá mo ʻetau māhiná, naʻe mei hoko ʻa e kau tangata ia ko ʻení ko e ngaahi tamai ʻi ha taʻu mātuʻaki siʻi moʻoni: Ko Kēnani ki muʻa ʻi hono taʻu onó, pea ko e toki ʻosi atu pē ia ʻa e taʻu nima ʻa Mahalaleli mo ʻĪnoke.—Senesi 5:12, 15, 21.
ʻIkai ko ia pē, naʻe fakafaikehekeheʻi ʻe he kakai ʻo e kuonga muʻá ʻa e ngaahi ʻahó, māhiná mo e taʻú. (Senesi 1:14-16; 8:13) Ko hono moʻoní, ko e fakahokohoko taimi fakaikiiki ʻo Noá ʻokú ne tokoniʻi kitautolu ke tau fakapapauʻi ʻa e lōloa ʻo ha māhina. Ko hano fakahoa ʻa e Senesi 7:11, 24 mo e Senesi 8:3, 4 ʻoku hā ai ko e māhina ʻe nimá—mei he ʻaho hono 17 ʻo e māhina hono uá ki he ʻaho hono 17 ʻo e māhina hono fitú—ʻoku tatau ia mo e ʻaho ʻe 150. Ko ia ʻoku hā mahino leva, naʻe lau taimi ʻa Noa ʻo ngāueʻaki ʻa e māhina ʻaho ʻe 30, ʻa ia ko e māhina ʻe 12 naʻe tānaki ʻo maʻu ai ha taʻu.—Senesi 8:5-13.a
Ka ʻe lava fēfē ke moʻui ʻa e kakaí ʻi he taʻu ʻe 900 pe lahi ange ai? ʻOku tala mai kiate kitautolu ʻe he Tohi Tapú naʻe faʻu ʻe he ʻOtuá ʻa e faʻahinga ʻo e tangatá ke moʻui taʻengata pea naʻe ʻomi ʻe he angahala ʻa ʻĀtamá ʻa e taʻehaohaoá mo e maté ki he fāmili fakaetangatá. (Senesi 2:17; 3:17-19; Loma 5:12) Ko e faʻahinga naʻe moʻui ki muʻa ʻi he Lōmakí naʻa nau ofi ʻaupito ange kinautolu ki he haohaoá ʻiate kitautolu he ʻaho ní, pea ʻoku ʻikai ha veiveiua ko ha ʻuhinga lahi ʻeni ki heʻenau moʻui fuoloá. Ko e fakatātaá, naʻe moʻui ʻa Mētuisela ʻi ha toʻutangata pē ʻe fitu meia ʻĀtama.—Luke 3:37, 38.
Kae kehe, ʻoku vavé ni ke toʻo atu ʻe Sihova ko e ʻOtuá ʻa e haʻahaʻa kotoa pē ʻo e angahala ʻa ʻĀtamá mei he faʻahinga kotoa ʻoku nau ngāueʻi ʻa e tui ki he taʻataʻa naʻe lilingi ʻo hono ʻAló, ʻa Sīsū Kalaisi. “Koe totogi oe agahala koe mate; ka koe moui taegata koe foaki ofa ia ae Otua ia Jisu Kalaisi ko ho tau Eiki.” (Loma 6:23, PM) ʻIo, ʻoku ene ke hoko mai ʻa e taimi ʻa ia ʻe hā nounou ʻaupito moʻoni ai ʻa e taʻu 969 ʻa Mētuiselá!
[Fakamatala ʻi lalo]
a Sio ki he Insight on the Scriptures, Voliume 2, peesi 1214, pulusi ʻe he Kau Fakamoʻoni ʻa Sihová.
[Kalafi ʻi he peesi 30]
(Ki he konga tohi fokotuʻu kakato, sio ki he tohí)
1000
Mētuisela
ʻĀtama
Seti
900
800
700
600
500
400
300
200
100
Tangata anga-maheni he ʻaho ní