Liliu e Fakakaukau ʻa ha Faiako

◼ ʻI ha ngaahi taʻu siʻi he kuohilí, naʻe kole ai ʻe ha faiako ʻi Batumi, ʻi he fonua ko Siōsiá ki heʻene kau akó ke nau fakahokohoko mai ʻa e Fekau ʻe Hongofulú. ʻI he ʻohovale ʻa e faiakó, ko e taha ʻo ʻene kau akó, ko Anna, naʻá ne lau maʻuloto totonu ia. Naʻá ne toe tali foki ʻa e ngaahi fehuʻi kehe Fakatohitapu ʻi ha founga fakaueʻiloto. Ko e faiakó, ʻi heʻene fieʻiló, naʻá ne ʻeke ange ai pe naʻe anga-fēfē ʻene maʻu ʻa e ʻilo lahi peheé. ʻI he tali ange ʻe Anna naʻá ne ako Tohi Tapu mo e Kau Fakamoʻoni ʻa Sihová, naʻe tuʻusi fakavave atu ʻe he faiakó, ʻo ne pehē ʻoku vakai ia kia kinautolu ʻoku nau fuʻu loto-māfana tōtuʻa ʻi heʻenau tuí.

ʻI he taimi ʻe taha, naʻe kole ai ʻe he faiakó ki he kau akó ke nau faʻu ha ʻēsei ki he moʻui ʻi Siōsiá mo e ngaahi palopalema kehekehe kuo fehangahangai mo e fonuá. ʻI he ngataʻanga ʻo ʻene ʻēseí, naʻe tohi ai ʻe Anna: “Ko ha feinga pē ʻa e kakaí ke fakatonutonu ʻi he tuʻunga lahi ʻa e sōsaietí ʻe taʻelavameʻa ia koeʻuhi hangē ko ia ʻoku lau ki ai ʻi he Selemaia 10:23: ‘ʻOku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.’ Ko e kotoa ʻo e ngaahi palopalemá ʻe toki fakaleleiʻi pē ia ʻe he Puleʻanga ʻo e ʻOtuá.”

ʻI he ʻaho hono hokó naʻe fakaongoongoleleiʻi ai ʻi he kalasí ʻe he faiakó ʻa e ʻēsei ʻa Anna peá ne pehē: “Naʻá ku fiefia ʻi he ngāue laulōtaha ʻa Anna, ʻa ia naʻá ne tohi ʻi he lea pē ʻaʻaná. Naʻá ne fakamatalaʻi ai ʻa e founga ʻe malava ke liliu ai ʻa e ngaahi tuʻunga ʻo e māmaní.” Naʻe toe maongo ki he faiakó ʻa e tōʻonga ʻa Anna, ʻo ne fakahīkihikiʻi ʻi he kalasí kotoa ʻa ʻene ʻulungāanga leleí mo e vala tāú.

ʻI he fetuʻutaki ʻa e Kau Fakamoʻoni ʻa Sihová ki he faiakó ʻi hono ʻapí, naʻá ne tala ange kia kinautolu naʻá ne vakai kia kinautolu ki muʻa ʻoku nau loto-māfana tōtuʻa ʻi heʻenau tuí ka kuo liliu ʻene fakakaukaú koeʻuhi ko ʻene taʻahine ako ko Anna. ʻI he 2007, naʻe maʻu ai ʻe he faiakó ʻa e Fakamanatu ʻo e pekia ʻa Sīsū Kalaisí fakataha mo e Kau Fakamoʻoni ʻa Sihová pea naʻá ne fanongo tokanga ki he polokalamá.

Hili e Fakamanatú, naʻe fakahaaʻi ai ʻe he faiako ʻa Anna naʻe maongo lahi kiate ia ʻa e ʻiloʻi lelei ʻe he Kau Fakamoʻoni ʻa Sihová ʻa e Tohi Tapú. ʻI he taimi ní, ʻoku ako Tohi Tapu tuʻumaʻu mo ia ʻa e Kau Fakamoʻoní. ʻOku ʻikai ha veiveiua, ʻi he hangē ko e faiako ko ení, ʻokú ke maʻu ha fakakaukau ʻatā ʻa ia ʻoku ueʻi ai koe ke ke sio ki he meʻa ʻoku tefito ai ʻa e tui mo e tōʻonga ʻa e niʻihi kehé. Fēfē ke kole ki ha taha ʻo e Kau Fakamoʻoni ʻa Sihová ki ha ako Tohi Tapu taʻetotongi ʻi ʻapi.

[Fakatātā ʻi he peesi 29]

Ko Anna ʻi heʻene faʻu ʻene ʻēseí