Vakai ʻa e Tohi Tapú

ʻOku Totonu ke Faifekau ʻa e Kakai Fefiné?

“KUÓ U ʻohovale mo ʻita ʻi he moʻoniʻi meʻa ko ia ʻo e ʻikai liliu ha meʻa ki he kakai fefiné, ʻi he fekauʻaki mo hono fakanofo kinautolú,” ko e tohi ia ʻa ha fefine Katolika ki he nusipepa USA Today. ʻOku fakakaukau tatau mo ia ʻa e kakai tokolahi. He ko ē, ʻi he ngaahi lotu kehé ʻoku ngāue ai ʻa e kakai fefiné ko e kau faifekau, kau taulaʻeiki, kau pīsope mo e kau lāpai.

Ko e ngaahi lotu ʻi he ongo tafaʻaki fepakí fakatouʻosi—ʻa e lotu ko ia ʻoku tapui ai ʻa e faifekau ʻa e kakai fefiné mo ia ʻoku fakaʻatā ai ke nau malanga ʻi he tuʻunga-malangá—ʻoku nau taukaveʻi ʻoku nau pipiki ʻi he Tohi Tapú. Kae kehe, ʻoku ʻikai ke poupouʻi ʻe he Tohi Tapú ha taha ʻi he ongo fakakaukaú. ʻOku lava fēfē ke peheé? Ke tali iá, kuo pau ke tau ʻuluaki fakakaukau ki he anga hono ngāueʻaki ʻe he Tohi Tapú ʻa e foʻi lea “faifekau.”

Kau Faifekau he ʻUluaki Senitulí

Ko e hā ʻene ʻuhinga kiate koe ʻa e foʻi lea “faifekau”? ʻE fakakaukau hake pē ʻa e tokolahi ki ha taki lotu, tangata pe fefine, ʻa ia ʻokú ne tokangaʻi ha fakatahaʻanga ki he lotú. Ka ʻoku ngāueʻaki ʻe he Tohi Tapú ʻa e foʻi leá ʻi ha ʻuhinga mata-lahi ange. Fakakaukau ki he fefine Kalisitiane ko Fīpē, ʻa ia naʻe fakafeʻiloaki ʻe he ʻapositolo ko Paulá “ko ho tau tuofefine, aia koe tauhi [pe faifekau] i he jiaji oku i Senikelea.”—Loma 16:1, PM.

ʻOkú ke sioloto atu kia Fīpē ʻokú ne tuʻu ʻi muʻa ʻi he fakatahaʻanga ʻi Senikeleá, ʻo tataki ha ouau fakalotu? Ko e moʻoni, ko e hā ʻa e ngāue naʻe fakahoko ʻe Fīpeé? ʻI heʻene tohi ki he kau Filipaí, ʻoku tohi ai ʻa Paula ʻo pehē ko e kakai fefine ʻe niʻihi “nae gaue mo au i he [“fakamafola ʻa e,” NW] ogoogolelei.”—Fakaʻītali ʻamautolu; Filipai 4:2, 3, PM.

Ko e founga tefito naʻe fakamafola ai ʻe he kau Kalisitiane he ʻuluaki senitulí ʻa e ongoongo leleí ko hono fai “ʻi he ʻao ʻo e kakai, pea ʻi he fale taki taha.” (Ngāue 20:20) Ko e faʻahinga naʻe kau ʻi he ngāue ko iá ko e kau faifekau. Naʻe kau ai ʻa e kakai fefine hangē ko Pīsilá. Ko ia fakataha mo hono husepānití, naʻá na ‘fakamatala ʻa e ʻalunga ʻo e lotu ʻa e ʻOtuá ke mahuʻinga malie’ ki ha tangata manavahē-ʻOtua ʻa ia naʻe teʻeki ai ke ne papitaiso ʻo hoko ko ha Kalisitiane. (Ngāue 18:25, 26) ʻI he hangē ko Fīpeé, ʻoku hā mahino ko Pīsilá ko ha faifekau ola lelei—ʻo hangē ko e kakai fefine tokolahi.

Ko ha Ngafa Lāngilangiʻia

Ko e ngāue fakafaifekau ki he kakaí ko ha ngāue māʻulalo ia, ko ha ngāue ʻikai loko mahuʻinga ke vaheʻi ki he kakai fefiné lolotonga ia naʻe fai ʻe he kakai tangatá ʻa e ngāue mahuʻinga ko hono tokangaʻi ʻa e fakatahaʻangá? ʻIkai ʻaupito, pea ʻi he ʻuhinga ʻe ua. ʻUluakí, ʻoku fakamahinoʻi ʻe he Tohi Tapú ko e kau Kalisitiane kotoa pē—ʻo kau ai ʻa e kakai tangata ʻoku ʻi ai honau ngaahi fatongia mafatukituki ʻi he fakatahaʻangá—naʻe pau ke nau kau ʻi he ngāue fakafaifekau ki he kakaí. (Luke 9:1, 2) Uá, ko e ngāue fakafaifekau ki he kakaí naʻe hoko pea ʻoku kei hoko ko e founga tefito ia ʻa ia ʻoku fakahoko ai ʻe he kau Kalisitiané ʻa e tangata mo e fefine fakatouʻosi ʻa e fekau ʻa Sīsū ke ‘ngaohi ʻa e ngāhi kakai kotoa pe ko e kau ako pea akoʻi kinautolu.’—Mātiu 28:19, 20.

ʻOku toe ʻi ai ha ngafa mātuʻaki mahuʻinga ʻe taha ʻoku maʻu ʻe he kakai fefine ʻe niʻihi ʻi he fakatahaʻangá. Naʻe tohi ʻe Paula: “Ke pehe foki mo e kau finemātutuʻa . . . ko e akoʻanga meʻa lelei, koeʻuhi ke nau kiēʻi ʻa e kau fefine ʻoku mālōlō ke nau ʻofa ki honau ngaahi husepaniti, pea ʻofa ki heʻenau fānau.” (Taitusi 2:3, 4) Ko ia ai, ko e kakai fefine matuʻotuʻa ʻoku nau maʻu ʻa e taukei ʻi he moʻui faka-Kalisitiané ʻoku nau maʻu ʻa e monū ko hono tokoniʻi ʻa e kau finemuí mo e kakai fefine ʻoku siʻi ʻenau taukeí ke nau hoko ʻo matuʻotuʻa. Ko e meʻá ni foki ko ha ngafa lāngilangiʻia mo mafatukituki.

Faiako ʻi he Fakatahaʻangá

Kae kehe, ʻoku ʻikai ha feituʻu ʻi he Tohi Tapú ʻoku tala ai ke tuʻu ʻa e kakai fefiné ʻi muʻa ʻi he fakatahaʻangá ke faiako. ʻI hono kehé, ko e ʻapositolo ko Paulá naʻá ne fakahinohino ke nau “longo pe ʻi he ngaahi fakataha.” Ko e hā hono ʻuhingá? Ko e ʻuhinga ʻe taha, ko ʻene tohí ia, koeʻuhi ke fai ʻa e ngaahi meʻá ʻi he founga “tāu mo māu.” (1 Kolinito 14:34, 40) Ke lele lelei ʻa e fakatahaʻangá, kuo vaheʻi ʻe he ʻOtuá ʻa e ngafa faiakó ki he kulupu ʻe taha. Kae kehe, fakatokangaʻi ʻoku ʻikai tuku ki ha tokotaha ʻa e monū ko hono tokangaʻi ʻa e fakatahaʻangá koeʻuhí pē ko ha tangata ia; ʻoku tuku pē ia ki he kau tangata ko ia ʻoku nau taau moʻoní.a—1 Timote 3:1-7; Taitusi 1:5-9.

Ko e ngafa kuo vaheʻi ʻe he ʻOtuá ki he kakai fefiné ʻoku māʻulalo? ʻIkai. Manatuʻi, ʻoku fakanofo kinautolu ʻe he ʻOtua ko Sihová ki ha ngāue mahuʻinga—ʻa ia ko e faifakamoʻoni ki he kakaí fekauʻaki mo ia. (Sāme 68:11) ʻI he haʻohaʻonga ʻo e Kau Fakamoʻoni ʻa Sihova he ʻaho ní, ko e kakai tangata mo e kakai fefine ʻoku nau hoko ko e kau faifekau ki he kakaí kuo nau tokoniʻi ʻa e laui miliona ke nau hoko ʻo fakatomala pea maʻu ʻa e fakamoʻuí. (Ngāue 2:21; 2 Pita 3:9) ʻOku ʻikai ko ha ngāue taʻemahuʻinga ia!

Ko e fokotuʻutuʻu ki he kakai tangatá mo e kakai fefiné ʻoku pouaki ai ʻa e melino lolotonga ia hono fakahāhā ʻa e fakaʻapaʻapa ki he ongo tafaʻakí fakatouʻosi. Ke fakatātaaʻi: Ko e matá mo e telingá ʻokú na fakahoko fakataha ʻa e ngāue ke tokoniʻi ha tokotaha lue lalo ke ne kolosi ʻi ha hala femoʻuekina. ʻI he founga tatau, ʻi he taimi ʻoku fakahoko ai ʻe he kakai tangatá mo e kakai fefiné ʻa e finangalo ʻo e ʻOtuá ʻo fakatatau ki he ngaahi ngafa kuo vaheʻi taki taha kia kinautolú, ʻoku tāpuakiʻi ʻe he ʻOtuá ʻa e fakatahaʻangá ʻaki ʻa e melino.—1 Kolinito 14:33; Filipai 4:9.b

[Fakamatala ʻi lalo]

KUÓ KE FIFILI?

● Naʻe anga-fēfē ʻa e faiako ʻa e kakai fefine ʻi he muʻaki fakatahaʻanga Kalisitiané?—Ngāue 18:26.

● Ko hai kuo fakanofo ke ne tokangaʻi ʻa e fakatahaʻangá?—1 Timote 3:1, 2.

● ʻOku anga-fēfē vakai ʻa e ʻOtuá ki he ngāue fakafaifekau ʻa e kakai fefine Kalisitiane he ʻaho ní?—Sāme 68:11.

[Fakamatala ʻi he peesi 29]

“ʻOmai ʻa e tala ʻe Atonai—Ko e kau fefine tala ongoongo lelei ko e hosite lahi.”—SĀME 68:11