ʻOku ʻi Ai ha Kau Faifekau Fefine ʻa e Kau Fakamoʻoni ʻa Sihová?

ʻIo. Ko e kotoa ʻo e Kau Fakamoʻoni ʻa Sihová ko e kau faifekau—kau ai ʻa e laui miliona ʻo e kau fefine. Hangē ko ia naʻe tomuʻa tala ʻe he Tohi Tapú, “ko e kau fefine tala ongoongo lelei ko e hosite lahi.”​—Saame 68:11.

Ko e kau fefine ʻoku nau hoko ko e Kau Fakamoʻoni ʻa Sihová ʻoku nau muimui ʻi he faʻifaʻitakiʻanga ʻa e kau fefine ʻi he Tohi Tapú. (Palōveepi 31:10-​31) Neongo ʻoku ʻikai ke nau pehē ko e kau taki kinautolu ʻi he fakatahaʻangá, ʻoku nau kau kakato ʻi he ngāue fakafaifekau ki he kakaí. ʻOku nau toe akoʻi ʻa e ngaahi tefitoʻi moʻoni Fakatohitapú ki heʻenau fānaú. (Palōveepi 1:8) ʻI heʻenau leá mo e ngāué, ko e kau fefine Fakamoʻoní ʻoku nau ngāue mālohi ke hoko ko ha kau tākiekina lelei.​—Taitusi 2:​3-5.