Ngaahi Fehuʻi ʻOku Faʻa ʻEke

Ko e hā ʻoku lau ai ʻa e kakai ʻe niʻihi ki he Kau Fakamoʻoni ʻa Sihová?

Ko e kakai tokolahi ko e maʻuhala ʻataʻatā pē. Ko e niʻihi nai ʻoku ʻikai te nau saiʻia ʻi he ngāue fakaʻevangeliō ʻa e Kau Fakamoʻoní. Kae kehe, ko e moʻoniʻi meʻá, ko hono fai ʻe he Kau Fakamoʻoní ʻa e ngāué ni ko ʻenau ʻofa ki he kaungāʻapí, ko ʻenau ʻilo “ʻilonga ʻa ia ʻe tautapa ki he huafa ʻo e ʻEiki ʻe fakamoʻui.”—Loma 10:13.

Ko e Kau Fakamoʻoni ʻa Sihová ko ha Kau Palotisani, Kau Mamahiʻi Tui Motuʻa, pe ko ha kiʻi lotu mavahe?

Ko e Kau Fakamoʻoni ʻa Sihová ko e kau Kalisitiane, ka ʻoku ʻikai ko e kau Palotisani kinautolu ʻi he ʻuhinga tatau ʻoku ʻikai ko e kau Katolika kinautolu—ʻoku nau ʻilo ko e ngaahi akonaki ʻe niʻihi ʻo e ongo lotu ko iá ʻoku taʻefakatohitapu. Ko e fakatātaá, ʻoku ʻikai ke akoʻi ʻe he Tohi Tapú ko e ʻOtuá—ʻa e fakasino tonu ʻo e ʻofá—te ne fakamamahiʻi taʻengata ʻa e kakaí ʻi ha afi ko heli. Pea ʻoku ʻikai akoʻi ai ʻoku maʻu ʻe he tangatá ha laumālie taʻefaʻamate pe ʻoku totonu ke kaunoa ʻa e kau Kalisitiané ʻi he politikí.—Isikeli 18:4; Sione 15:19; 17:14; Loma 6:23.a

“Ko e Mamahiʻi Tui Motuʻá ko ha ngaʻunu mata-lahi ia ʻi loto ʻi he Tui Fakapalotisani ʻi he ʻIunaite Seteté,” ko e lau ia ʻa e The World Book Encyclopedia. Ko e ngaahi kautaha Tui Fakalotu Motuʻa ʻe niʻihi “kuo nau ohi ʻa e ngaahi tuʻunga fakasōsiale mo fakapolitikale makatuʻunga ʻi ha ngāueʻaki fakafoʻilea ʻo e ngaahi konga tohi Fakatohitapú.” Ko e fakaʻuhinga ko iá ʻoku ʻikai ke feʻunga ia mo e Kau Fakamoʻoni ʻa Sihová. Hangē ko ia naʻe lave ki aí, ʻoku nau fakaʻehiʻehi mei he politikí pea ʻoku ʻikai te nau fakamālohiʻi ʻenau ngaahi fakakaukaú ki he niʻihi kehé ʻaki ʻa e ngaahi founga fakapolitikale pe ko ha founga kehe pē. Ka, ʻoku nau talanoa mo e kakaí, ʻo faʻa fehangahangai tonu, ʻo ngāueʻaki ʻa e fakaʻuhinga mo e fakamoʻoni fakatuipau, ʻi he faʻifaʻitaki ki he muʻaki kau Kalisitiané.—Ngāue 19:8.

Ko ha kiʻi lotu mavahe ko ha kulupu taʻeloto tatau ia ʻi loto pē ʻi ha lotu fakafeituʻu pe ko ha taha ʻoku mavahe ke fokotuʻu ha lotu foʻou. Ko e Kau Fakamoʻoni ʻa Sihová kuo ʻikai te nau mavahe mei ha faʻahinga siasi. ʻOku ʻikai ko ha kiʻi lotu mavahe kinautolu.

Ko e hā ʻoku hoko ʻi he ngaahi fakataha ʻa e Kau Fakamoʻoní?

Ko ʻenau ngaahi fakatahá, ʻa ia ʻoku ʻatā ia ki he kakaí, ʻoku ako tefito ai ʻa e Tohi Tapú, ʻa ia ʻoku faʻa fakaʻatā ai ke tali ʻa e kau fanongó. Ko e taha ʻo ʻenau ngaahi fakataha fakauiké, ʻa e Ako Fakafaifekau Fakateokalatí, ʻokú ne tokoniʻi ʻa e kau mēmipa ʻo e fakatahaʻangá ke nau fakatupulekina ha ngaahi pōtoʻi fakafaiako, lautohi, mo e fekumi. Ko e taha ko ha malanga Fakatohitapu ia miniti ʻe 30 ʻi ha kaveinga ʻa ia ʻe mahuʻinga makehe nai kia kinautolu ʻoku ʻikai ko ha Kau Fakamoʻoní. ʻOku angamaheniʻaki ʻa e hoko atu ai ha ako ʻo e Tohi Tapú fakafou ʻi hono ngāueʻaki ʻa e makasini Taua Leʻó. Ko e ngaahi fakatahá ʻoku kamata mo fakaʻosi ʻaki ʻa e hiva mo e lotu, pea ʻoku ʻikai ha kole paʻanga pe paasi takai holo ha peleti tānaki paʻanga.—2 Kolinito 8:12.

ʻOku fakapaʻanga fēfē ʻa e Kau Fakamoʻoni ʻa Sihová?

Ko ʻenau ngāué ʻoku fakapaʻanga ia ʻaki ʻa e ngaahi tokoni loto-fiefoaki. Ko e Kau Fakamoʻoní ʻoku ʻikai te nau totongi ʻa hono fakahoko ʻo e papí, malí, putú, pe ko ha ngāue fakalotu kehe. Pea ʻoku ʻikai te nau vahe hongofulu. Ko ha taha ʻoku loto ke fai ha foaki ʻe lava ke ne fai ia ʻaki hono lī ʻi ha puha meʻaʻofa kuo ʻosi tuku fakapotopoto ʻi he Fale Fakatahaʻangá. ʻOku faʻu ʻe he Kau Fakamoʻoni ʻa Sihová ʻa e ʻū tohi Fakatohitapu ʻoku nau ngāueʻakí, ʻa ia ʻoku tauhi ai ke siʻisiʻi ʻa e ngaahi fakamolé, pea ko honau ngaahi Fale Fakatahaʻanga mo e ngaahi fale ʻōfisi vaʻa fakanānaá, ʻoku meimei langa kotoa pē ia ʻe he kau ngāue pole.

ʻOku tali ʻe he Kau Fakamoʻoni ʻa Sihová ha ngāue fakafaitoʻo?

ʻIo. Ko hono moʻoní, ʻoku nau kumi ki ha tokangaʻi lelei taha ʻe ala lavá maʻa kinautolu mo e faʻahinga ʻoku nau ʻofa aí. ʻIkai ko ia pē, ko e tokolahi ʻo e Kau Fakamoʻoní ʻoku nau ngāue ʻi he malaʻe fakafaitoʻó ko e kau neesi, kau ngāue tokoni fakafaitoʻo, kau toketā, mo e kau toketā faitafa. Kae kehe, ko e Kau Fakamoʻoni ʻa Sihová ʻoku nau fakafisingaʻi ʻa e huhu totó. ‘Fakaʻehiʻehi mei he totó,’ ko e lau ia ʻa e Tohi Tapú. (Ngāue 15:28, 29) ʻOku mālié, ko ha kau toketā tokolahi ʻaupito ʻoku nau vakai ki he tokangaʻi fakafaitoʻo ʻikai ha totó ko ha “tuʻunga koula,” fakafou hení naʻe kalofi ai ʻa e ngaahi fakatuʻutāmaki fekauʻaki mo hono ngāueʻaki ʻo e ngaahi faitoʻo ʻoku kau ai ʻa e totó.

[Fakamatala ʻi lalo]

[Puha/Fakatātā ʻi he peesi 7]

FEITUʻU ʻOKU LOTOLOTOI AI E KĀTAKÍ

Ko e kolo ko Bejucal de Ocampo ʻi he fakatonga ʻo Mekisikoú ʻoku kiʻi anga-kehe. “Ko e tokolahi taha ʻo e nofo aí ko e Kau Fakamoʻoni ʻa Sihova,” ko e lau ia ʻa ha līpooti ʻi he nusipepa ko e Excélsior, tānaki atu ki ai: “Ko ha ʻātakai ʻoku lotolotoi ai e kātaki fakalotú mo e kātaki fakapuleʻangá. . . . Ko e kau nofo aí kuo nau fakafetongi ʻa e inu longoaʻá mo e ifi sikaletí ʻaki ʻa e ngaahi hiva mo e lau Tohi Tapu. ʻOku nau toe fakaʻapaʻapaʻi foki ʻa e kau maʻu mafaí.”

Neongo e ʻi ai ʻa e ngaahi lotu kehekehe ʻi he koló, “kuo ʻikai malanga hake ha ngaahi fepakipaki pe fekīhiaki fakalotu,” ko e lau ia ʻa e līpōtí. ʻOku toe pehē ai: “Ko e fakafilí ʻoku ʻikai hano potu ʻona ai, pea ko e kehekehe fakalotú ʻoku ʻikai te ne taʻofi ai ʻa e ngaahi kaungāʻapí mei heʻenau fefakaleaʻakí . . . Ko e fāmili taki taha ʻoku nau takua tauʻatāina ʻene lotu, pea ʻoku ʻikai ke taʻofi ai heni ʻenau feohi ko ha sōsaietí. ʻOku ʻikai ke hā ngali kehe ki ha taha ʻa e hā tokolahi ʻa e Kau Fakamoʻoni ʻa Sihová ʻi Bejucal.” Ko e toe meʻa ʻoku hulu angé, ko ʻenau fānaú ‘ʻoku nau vala fakanānā, poto he akó, pea ʻoku nau ʻulungaanga lelei ʻi he kalasí,’ ko e lau ia ʻa e faiako ʻi ha ako māʻolunga ʻi ai, ʻa ia ʻoku ʻikai ko ha Fakamoʻoni.