ʻE Malava Fēfē Ke U Fiefia ʻi Hono Ako ʻa e Tohi Tapú?

Ko e hā ke toe ako ai ʻa e Tohi Tapú? Fakakaukau ki ai ʻi he founga ko ení:

ʻE malava ke tokoniʻi koe ʻe he Tohi Tapú ke ke maʻu ha koloa. Ko e tohi fakataua lahi taha ko ení ʻe malava ke ne

● Fakahaaʻi atu kiate koe ʻa e founga ke mateuteu atu ai ki he moʻui lelei taha ʻe faifai ange peá ke maʻú

● Tala atu kiate koe ʻa e ngaahi meʻa fekauʻaki mo e kahaʻú—pea mo e kuohilí—ʻa ia naʻe ʻikai mei lava ke ke ʻiloʻi

● Tokoniʻi koe ke ke ʻilo fekauʻaki mo koe pea hoko ko ha tokotaha lelei angea

KO HONO ako ʻa e Tohi Tapú ʻoku fiemaʻu ki ai ʻa e feinga, ka ko e totongí ko e lahi atu! ʻOkú ke fieʻilo ki he founga ʻoku fai ai ia ʻe he toʻutupu ʻe niʻihi? Kosiʻi pea pelu ua ʻa e peesi ko ení. Te ke maʻu ai ha maʻuʻanga fakamatala ʻaonga peesi-fā ʻa ia te ne fakahaaʻi atu kiate koe ʻa e founga ʻoku ikuʻi ai ʻe ho toʻumeʻá ʻa e ngaahi fakafaingataʻaʻiaʻangá pea mo hono maʻu ʻa e ʻaonga lahi taha mei heʻenau ako fakafoʻituitui ʻa e Tohi Tapú.

“ʻOku ʻi ai ha meʻa ʻi he Tohi Tapú maʻá e tokotaha kotoa pē. ʻOku ʻikai hano ngataʻanga ʻa e ngaahi meʻa ʻoku malava ke akó!”—Velolia.b

ʻOku malava ke maʻu hokohoko ha ngaahi kupu lahi ange mei he “Young People Ask” ʻi he Uepisaiti www.jw.org

[Fakamatala ʻi lalo]

[Puha/Fakatātā ʻi he peesi 25, 26]

FOUNGA KE AKO AI ʻA E TOHI TAPÚ

Ko e palopalemá: ʻIKAI HA FAKAUEʻILOTO

“Ko e tangutu hifo ke ako ʻi ha houa ʻe tahá ʻoku hā ngali ʻoku ʻikai maʻu pē ko ha meʻa ia ʻoku ou fie fai.”—Lena.

Meʻa ʻoku fiemaʻu kiate koé: ʻUHINGA ʻOKÚ NE UEʻI KOÉ

Ke fiefia ʻi hono ako ʻa e Tohi Tapú ʻoku fiemaʻu ke ke tali ʻa e fehuʻi ko ení, Ko e hā ʻa e meʻa te u maʻu aí? Te ke fie kaumeʻa mo e ʻOtuá? ʻai ke loloto hoʻo mahinoʻi ʻa e ngaahi meʻa ʻoku hoko ʻi he māmaní? fakaleleiʻi ho angaʻitangatá? ʻOku malava ke tokoniʻi koe ʻe he Tohi Tapú ke ke fai ʻa e ngaahi meʻa ko iá—mo ha toe meʻa lahi ange!

“ʻOua ʻe fakakaukau ki ai ko ha ngāue pe fakakaukau ki ai ʻoku hangē ia ha ako ʻi he ʻapiakó. ʻI hono kehé, vakai ki he ako Tohi Tapú ko ha founga ia ke hoko ai ʻo ofi ange ki he Kaumeʻa lelei taha ʻe faifai ange peá ke maʻú—ʻa Sihova ko e ʻOtuá.”—Petinī.

“Ko ha vahaʻa taimi ako ko ho taimi fakafoʻituitui ia mo Sihova ko e ʻOtuá. Kapau te ke feohi mo ha taha ʻi he taimi pē ʻoku ʻi ai ai hoʻo ongo mātuʻá, ko e tokotaha ko iá ko ho kaumeʻa moʻoni ia pe ko e kaumeʻa pē ia hoʻo ongo mātuʻá? Kapau te ke ako pē ʻiate koe, ʻe lava ke hoko ʻa Sihova ko ho kaumeʻa.”—Pina.

Manatuʻi: “Ko e meʻa kotoa ʻi he Tohi Tapú ko e Folofola ʻa e ʻOtuá ia. ʻOku ʻaonga kotoa ia ki he akonaki mo hono tokoniʻi ʻa e kakaí pea mo hono fakatonutonu kinautolú pea fakahaaʻi kia kinautolu ʻa e founga ke moʻui aí.” (2 Tīmote 3:16, Contemporary English Version) ʻOku malava ke tokoniʻi koe ʻe he Tohi Tapú ʻi he ngaahi founga foki ko iá!

“ʻOku ou feinga ke tokangataha ki he ngaahi palé. Kapau ʻoku ʻi ai ha tafaʻaki ʻoku fiemaʻu ke u fakaleleiʻi, ko e akó ko e faingamālie ia ke u fai ai ha ngāue ki he meʻá ni pea ʻai ai au ke u fakalakalaka.”—Meki.

Ke fakakaukau ki ai:

Ko e hā ʻe lava ke hoko ko e ʻuhinga ia ʻokú ne ueʻi ai koe ke ke akó?

Ko e palopalemá: PIPIKOʻIA

“Hili ʻa e miniti ʻe 10 ʻo e akó, ʻoku kamata ke u ongoʻi helaʻia; ʻi he miniti ʻe 20 ʻoku ou mateuteu ke fai ha meʻa kehe; ʻi he miniti ʻe 30, ʻoku ou fuʻu pipikoʻia ʻaupito!”—ʻĀlisi.

Meʻa ʻoku fiemaʻu kiate koé: FAKAKAUKAUʻI HA FOUNGA FOʻOU

Ngāueʻaki hoʻo fakakaukaú, pe ʻoku kau ki ai ʻa e meʻa ʻokú ke akó, founga hoʻo akó, pe ko e ʻātakai ʻokú ke filí.

“Vaheʻi ha taimi ke fekumi ai ki he ngaahi fehuʻi ʻokú ke maʻú. ʻI hoʻo ako ʻo kau ki ha meʻa naʻá ke fakakaukau ki ai, ʻoku ʻosi angé ʻokú ke maʻu ha ongoʻi fiemālie—naʻa mo e fiefia.”—Lisiate.

“ʻI hoʻo lau ʻo fekauʻaki mo ha meʻa ʻoku hoko, ʻai tonu koe ki ai. Fakangalingali ko koe ʻa e tokotaha tefitó pe ko ha tokotaha ʻoku tuʻu ʻo mamata ʻi he meʻa ʻoku hokó. Feinga ke sio ki he meʻa ʻoku hokó ʻo hangē pē ʻoku hoko moʻoni ia ʻi muʻa ʻiate koé.”—Sitīveni.

“ʻAi ke fakamānako ʻa e akó. Tangutu ʻi tuʻa ʻi mui ho ʻapí mo ha ipu lēmani. ʻOku ou saiʻia ʻi he fanga kiʻi meʻakai maʻamaʻá he lolotonga ʻeku akó. Ko hai ia ʻe taʻesaiʻia ai?”—Senitulā.

Manatuʻi: Ko e pipikoʻiá ko ha anga ia ʻo e fakakaukaú, ʻo ʻikai maʻu pē ko e tuʻunga moʻoní ia. Ko ia ʻi he ʻikai pehē “ko e akó ʻoku fakapipikó,” pehē “ko au ʻoku fakapipikó.” Ko koe pē ke tukuakiʻi ki he anga hoʻo vakaí. Te ne ʻai ai koe ke ke puleʻi ʻa e tuʻungá pea ʻe fakamafeia ai koe ke ke fai ha meʻa fekauʻaki mo ia.—Palōveepi 2:10, 11.

“Ko e ako fakafoʻituituí ʻoku ʻikai fiemaʻu ia ke fakapipiko. ʻOku malava ke hoko ia ki ha meʻa pē ʻokú ke loto ke hoko ki aí.” —Vānesa.

Ke fakakaukau ki ai:

ʻE lava fēfē ke ke fakakaukauʻi ha founga foʻou ki hoʻo akó?

Ko e palopalemá: ʻIKAI HA TAIMI

“ʻOku ou saiʻia ke ako lahi ange ʻa e Tohi Tapú, ka koeʻuhí ko e moʻumoʻua ʻeku taimi-tēpilé, ʻoku hoko ai ko e pole lahi taha kiate aú ʻa hono maʻu ʻa e taimi ke tangutu hifo ai ʻo fakahoko iá!”—Malia.

Meʻa ʻoku fiemaʻu kiate koé: NGAAHI MEʻA KE FAKAMUʻOMUʻÁ

Ko e konga ʻo e hoko ko ha tokotaha lahí ko hono ʻiloʻi ʻa e founga ke “fakapapauʻi ai ʻa e ngaahi meʻa ʻoku mahuʻinga angé.”—Filipai 1:10.

“Naʻe tokoniʻi au ʻe heʻeku faʻeé ke u ʻiloʻi ʻe ʻikai ʻaupito pē te u maʻu ha taimi lahi ange. Naʻe pau ke u ʻai ha taimi. ʻI he taimi pē naʻá ku fai ai ha ngāue ki heʻeku holi ke akó, naʻá ku ʻai ai ha taimi ki ai.”—Neta.

“ʻI heʻeku fuʻu lahi angé, naʻá ku ʻilo ai naʻe pau ke u fokotuʻutuʻu ha taimi ki he akó, pea ko e toki taimi ia ʻoku ou ako aí, neongo ai pē pe ko e hā ha meʻa kehe ʻoku hoko.”—Lani.

“Kapau te ke fakamuʻomuʻa ʻa e akó ʻi he fakafiefiá, ʻoku ou fakapapauʻi atu ʻe fakamānako lahi ange kiate koe ʻa e akó—pea ʻe ʻikai te ke ongoʻi halaia ai ʻi hoʻo fai ʻa e fakafiefiá.”—Taiana.

Manatuʻi: Kapau heʻikai te ke fokotuʻu ʻa e ngaahi meʻa ke fakamuʻomuʻá, ʻe ʻikai ai te ke puleʻi ho taimí pea te ke hoko ai ko ʻene tamaioʻeiki. ʻOku lelei mamaʻo ange kapau te ke tamuʻomuʻa ʻo vaheʻi ha taimi ki he akó.—ʻEfesō 5:15, 16.

“ʻI he tuʻunga ko ha tamasiʻi ako ʻi he kolisí, ʻoku malavangofua ke u fuʻu femoʻuekina ʻi he ngaahi meʻa kehé! Kae kehe, ko hono fai ha feinga tōtōivi ke fakakau ʻa e ako Tohi Tapu fakafoʻituituí ʻi heʻeku taimi-tēpilé ko ha meʻa ia ʻoku muʻomuʻa kiate au.”—Sionatane.

Ke fakakaukau ki ai:

Ko e hā ʻa e taimi-tēpile ako ʻe lava ke ke fokotuʻú?

[Puha/​Fakatātā ʻi he peesi 25]

NGAAHI TOKONI MEI HO TOʻUMEʻÁ

Zachary​—ʻOua ʻe ako pē ʻa e meʻa ʻoku ako ʻe hoʻo ongo mātuʻá pe ko e niʻihi kehé. Ko e ako fakafoʻituitui moʻoni ia kapau ko e meʻa ʻokú ke loto ke ako fekauʻaki mo ia.

Kaley​—Kamataʻaki ha kiʻi taimi nounou. Kapau ʻoku fiemaʻu, ʻai pē ha miniti ʻe nima, kae fai ia ʻi he ʻaho kotoa pē. Pea ʻe malava leva ke ke fakalahi māmālie ʻa hoʻo taimí ki he miniti ʻe 10, miniti ʻe 15 . . . Faai atu pē te ke fiefia ai!

Daniela—Ko e fanga kiʻi meʻa kehé ʻe lava ke toe tokoni lahi ia. ʻAi ha ngaahi peni kehekehe pea mo ha kiʻi pepa nouti lelei, pe ko hano ʻai ha faile ʻi hoʻo komipiutá ʻo fakahingoa ko e Ako Fakafoʻituitui.

Jordan​—Kapau te u fili ha kaveinga ʻoku ou saiʻia aí, ʻoku malava ai ke u ako ʻi ha taimi lōloa ange. Pehē foki, ʻoku ou fiemaʻu ha feituʻu lōngonoa. ʻOku ʻikai malava ke u ako kapau ko e ʻātakaí ʻoku lahi ai ʻa e longoaʻá.

[Saati ʻi he peesi 26]

(Ki he fakamatala kakato, sio ki he tohí)

Kosiʻi

Pelu ua