KAVEINGA TEFITO | TE KE SAIʻIA KE AKO ʻA E TOHI TAPÚ?

Polokalama Ako Tohi Tapu ki he Kakai Kotoa

ʻOku ʻiloa ʻa e Kau Fakamoʻoni ʻa Sihová ʻi heʻenau malanga ki he kakaí. Ka naʻá ke ʻiloʻi ʻoku mau toe fai mo ha polokalama ako Tohi Tapu ʻi māmani lahi?

Ko ha tangata ʻokú ne ako Tohi Tapu ʻi hono ʻapi ngāué

ʻI he 2014, ko e Kau Fakamoʻoni ʻa Sihova laka hake he toko 8,000,000 ʻi he fonua ʻe 240 naʻa nau fakahoko ha ako Tohi Tapu ʻe 9,500,000 nai ʻi he māhina taki taha.a Ko e moʻoni, ko e tokolahi ʻo e kakai ʻoku ako Tohi Tapu mo kimautolú ʻoku fakalaka ia ʻi he tokolahi ʻo ha fonua ʻe 140!

Ke fakahoko ʻa e ngāue fakaeako ko ení, ʻoku pulusi ai ʻe he Kau Fakamoʻoni ʻa Sihová ʻa e Tohi Tapu, ʻū tohi, makasini mo e ngaahi tohi tokoni fakaeako Tohi Tapu ofi ki he taha mo e konga pilioná ʻi he taʻu taki taha—ʻi he lea ʻe 700 nai! ʻOku fakaʻatā ʻe he ngāue fakaepulusi taʻehanotatau ko ení ʻa e kakaí ke nau ako ʻa e Tohi Tapú ʻi heʻenau leá tonu.

“Naʻe ʻikai ʻaupito ke u saiʻia ʻi he ako ʻi he ʻapiakó, ka ko e ako ko ení naʻe fakalata ʻaupito. Pea ko e meʻa naʻá ku akó naʻe fakafiemālie ʻaupito!”—Katlego, ʻAfilika Tonga.

“Naʻe tali ʻe he akó ʻa e kotoa ʻo ʻeku ngaahi fehuʻí mo e ngaahi meʻa kehe.”—Bertha, Mekisikou.

“Naʻe fai ʻa e ako Tohi Tapú ʻi hoku ʻapí ʻi he taimi naʻe feʻungamālie kiate aú. Naʻá ku fiemālie lahi!”—Eziquiel, Pelēsila.

“Ko e ngaahi lēsoní naʻe miniti ʻe 15 ki he 30 hono lōloá ʻi he taimi ʻe niʻihi—naʻe toe lōloa ange ʻi ha ngaahi taimi—ʻo fakatatau pē ki heʻeku fiemaʻú.”—Viniana, ʻAositelēlia.

“Naʻe taʻetotongi ʻa e akó—naʻe tōtōatu!”—Aimé, Penini.

“Naʻe anga-kātaki mo anga lelei lahi ʻeku faiako Tohi Tapú. Naʻá ma fakatupulekina ha vahaʻangatae vāofi.”—Karen, ʻAilani Tokelau.

“ʻOku tokolahi ʻa e kakai ʻoku nau ako ʻa e Tohi Tapú ka ʻoku ʻikai ke nau hoko ko e Kau Fakamoʻoni.”—Denton, ʻIngilani.

TALI KI HE NGAAHI FEHUʻI ʻOKU FAʻA ʻEKE FEKAUʻAKI MO ʻEMAU POLOKALAMA AKO TOHI TAPÚ

Ko e hā ʻa e founga ʻoku fai ai ʻa e akó?

ʻOku mau fili ʻa e ngaahi kaveinga Fakatohitapu kehekehe pea sivisiviʻi ʻa e ngaahi veesi Tohi Tapu ʻoku felāveʻi mo e kaveinga ko iá. Ko e fakatātaá, ʻoku tali ʻe he Tohi Tapú ʻa e ngaahi fehuʻi hangē ko ení: Ko hai ʻa e ʻOtuá? Ko e tokotaha fēfē ia? ʻOku ʻi ai hano huafa? ʻOkú ne ʻafio ʻi fē? ʻE lava ke tau ʻunuʻunu ofi kiate ia? Ko e meʻa faingataʻá ko hono ʻiloʻi pe ko fē ʻi he Tohi Tapú ʻe maʻu mei ai ʻa e talí.

Ke tokoniʻi ʻa e kakaí ke maʻu ʻa e talí, ʻoku mau faʻa ngāueʻaki ʻa e tohi Ko e Hā ʻOku Akoʻi Moʻoni ʻe he Tohi Tapú?b ʻoku peesi ʻe 224. ʻOku fakatefito hono faʻu ʻa e tohi ko ení ke tokoniʻi ʻa e kakaí ke nau mahinoʻi ʻa e ngaahi akonaki tefito ʻa e Tohi Tapú. ʻOku kau ai ʻa e ngaahi lēsoni fekauʻaki mo e ʻOtuá, Sīsū Kalaisi, faingataʻaʻia ʻa e tangatá, ko e toetuʻú, lotú mo e ngaahi kaveinga kehekehe.

Ko fē ʻa e taimi mo e feituʻu ʻe lava ke fai ai ʻa e akó?

ʻOku lava ke fai ʻa e akó ʻi he taimi mo e feituʻu ʻoku feʻungamālie kiate koé.

Ko e hā hono fuoloa ʻo e ako taki taha?

ʻOku vaheʻi ʻe he kakai tokolahi ha houa ʻe taha pe lahi ange ʻi he uike taki taha ke ako ʻa e Tohi Tapú. Ka ko e fuoloa ʻo e akó ʻoku kehekehe. Te mau feʻunuʻaki ia ke feʻunga mo hoʻo taimi-tēpilé. ʻOku ako ʻa e niʻihi ʻi he miniti pē ʻe 10 pe 15 ʻi he uike taki taha.

ʻOku totongi ʻa e ako Tohi Tapú?

Ko e akó mo e naunau fakaeakó ʻoku taʻetotongi. ʻOku fehoanakimālie eni mo e fakahinohino ʻa Sīsū ki heʻene kau ākongá: “Kuo mou maʻu taʻetotongi, foaki taʻetotongi.”—Mātiu 10:8.

Ko e hā ʻa e lōloa ʻo e akó?

ʻOku fakatuʻunga pē ʻa e lōloa ʻo e akó ʻiate koe. Ko e tohi Ko e Hā ʻOku Akoʻi Moʻoni ʻe he Tohi Tapú? ʻoku ʻi ai ha lēsoni ʻe 19. ʻOku lava ke ke ako kotoa ʻa e ngaahi lēsoní pe ko ha konga ʻo fakatatau pē ki hoʻo malavá.

Kuo pau ke u hoko ko e taha ʻo e Kau Fakamoʻoni ʻa Sihová?

ʻIkai. ʻOku mau fakaʻapaʻapaʻi ʻa e totonu ʻa e tokotaha kotoa ke fili ʻa e meʻa te ne tui ki aí. Ko e kakai ʻoku nau maʻu ʻa e ʻilo tefito ʻa e Tohi Tapú ʻoku lava pē ke nau fai ha fili ʻo fakatatau ki heʻenau ʻiló.

Ko fē ʻe lava ke u maʻu mei ai ha fakamatala lahi ange?

ʻOku tokonaki mai ʻe he Uepisaiti jw.org ʻa e fakamatala totonu ʻo fekauʻaki mo e ngaahi tui mo e ngāue ʻa e Kau Fakamoʻoni ʻa Sihová.

ʻE lava fēfē ke u kole ha ako Tohi Tapu?

Ko e kakaí ʻoku nau kole ha ako Tohi Tapu ʻi he ngaahi founga kehekehe: ʻInitanetí, faitohi pea fakafou ʻi he ngaahi fika telefoni fakalotofonuá

Fakafonu ʻa e foomu kole ʻi he ʻinitanetí ʻi he www.jw.org.
Tohi ki he tuʻasila ofi taha atú ʻa ia ʻoku hā ʻi he peesi ua ʻo e makasini ko ení.
Fetuʻutaki ki he Kau Fakamoʻoni ʻa Sihova ʻoku ofi atú. ʻOku lava ke ke sio ki he “Jehovah’s Witnesses” ʻi he lisi ʻo e ngaahi fika telefoni fakalotofonuá.

a ʻOku faʻa fakahoko ʻa e ako Tohi Tapú ʻi he tuʻunga tāutaha pe ʻi ha kiʻi kulupu tokosiʻi.

b Pulusi ʻe he Kau Fakamoʻoni ʻa Sihová. Laka hake ʻi he tatau ʻe 230 miliona ʻo e tohi ko ení kuo pulusi ʻi he lea ʻe 260 tupu.

TOKONI KI HE NGAAHI FĀMILÍ

“ʻI he taimi naʻe kamata ako Tohi Tapu ai hoku uaifí, naʻá ku fakatokangaʻi ʻa e ngaahi liliu lahi ʻi heʻene moʻuí. Naʻe fakalakalaka ʻema moʻui fakafāmilí. ʻI he fieʻilo ki he meʻa naʻá ne akó, naʻá ku kamata ako mo au. Naʻe ʻai ʻe he meʻa naʻá ku akó ke u hoko ko ha tokotaha lelei ange. Ko hono ako ʻa e Tohi Tapú naʻá ne fakafāʻūtahaʻi ai homa fāmilí.”—Eziquiel.

“Hili ʻeku kamata ako ʻa e Tohi Tapú, naʻá ku taʻofi ai hono tōʻongaʻaki ʻa e faitoʻo kona tapú, ngāuekoviʻaki ʻa e ʻolokaholó pea ako ke mapuleʻi ʻeku ʻitá. Naʻe maʻa mo maau ange hoku ʻapí. Naʻá ku houngaʻia lahi ange ʻi hoku fāmilí pea fiefia ʻi hono fai ha ngaahi meʻa ke ʻai kinautolu ke nau fiefia. ʻOku ou fiefia lahi ange.”—Karen.

“Naʻe fakaangaʻi au ʻe he kakai ʻe niʻihi ʻi heʻeku ako ʻa e Tohi Tapú. Ka naʻe poupouʻi ʻe hoku husepānití ʻeku filí, ʻo pehē: ‘ʻOku ʻikai ke u tokanga au ki he meʻa ʻoku leaʻaki ʻe he kakaí. Ko e vakai atu kiate koe ʻokú ke liliu ʻo lelei angé—ko e meʻa ia ʻoku mahuʻinga kiate aú. Hokohoko atu pē hoʻo akó.’ Kuo teʻeki ai ke lelei peheni homa fāmilí!”—Viniana.