Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻOku maʻu ʻe he Kau Fakamoʻoni ʻa Sihová ha founga ʻaonga ʻe lava ke ke ako ai ʻa e meʻa ʻoku leaʻaki ʻe he Tohi Tapú. Ko ʻemau polokalama ako Tohi Tapú ʻe lava ke ne tokoniʻi koe ke:
Maʻu ha moʻui fiefia
Hoko ko e kaumeʻa ʻo e ʻOtuá
Ako fekauʻaki mo e talaʻofa ʻa e Tohi Tapú ki he kahaʻú
ʻI he peesi ko ení
Ko e hā ʻoku fai ʻi ha ako Tohi Tapu?
ʻE ʻi ai ha faiako te ne tokoniʻi koe ke ʻiloʻi lelei ange ʻa e Tohi Tapú, fakafoʻikaveinga. Ko hono ngāueʻaki ʻa e polokalama ako Tohi Tapu fetalanoaʻaki ʻi he Fiefia ʻi he Moʻuí ʻo Taʻengata! te ke ako ai ʻa e pōpoaki ʻo e Tohi Tapú pehē foki ki he founga ʻe lava ke ne tokoniʻi ai koé. Ke ako lahi ange, sio ʻi he vitiō ko ení.
ʻOku fiemaʻu ke u totongi ʻa e akó?
ʻIkai. ʻOku muimui ʻa e Kau Fakamoʻoni ʻa Sihová ki he tataki naʻe ʻoange ʻe Sīsū ki heʻene kau ākongá: “Kuo mou maʻu taʻetotongi, foaki taʻetotongi.” (Mātiu 10:8) ʻIkai ko ia pē, ʻoku ʻikai ke totongi ʻa e ngaahi naunau ki he akó, ʻa ia ʻoku kau ai ha tatau ʻo e Tohi Tapú pea mo e tohi ʻoku fakakaveinga Fiefia ʻi he Moʻuí ʻo Taʻengata!
Ko e hā ʻa e lōloa ʻo e akó?
Ko e akó ʻoku feʻunga mo e lēsoni fakakātoa ʻe 60. ʻOku makatuʻunga pē ʻiate koe ʻa e lahi ʻo e meʻa ke akó, ka ko e kau ako tokolahi ʻoku nau saiʻia ke fakakakato ha lēsoni ʻe taha pe lahi ange ʻi he uike.
ʻE anga-fēfē haʻaku kamata ʻa e akó?
1. Fakafonu ʻa e tohi kole ʻi he ʻinitanetí. Te mau ngāueʻaki pē ʻa e fakamatala fakafoʻituitui ʻokú ke ʻomaí ke fakahoko ʻaki hoʻo kole ke fetuʻutaki atu ha taha ʻo e Kau Fakamoʻoni ʻa Sihová kiate koe.
2. ʻE fetuʻutaki atu ha faiako kiate koe. Ko hoʻo faiakó te ne fakamatalaʻi atu ʻa e meʻa ke ke ʻamanekina ʻi hoʻo ako Tohi Tapu fetalanoaʻakí pea te ne tali ha fehuʻi pē ʻokú ke maʻu.
3. Ko koe mo hoʻo faiakó te mo fai ʻa e ngaahi fokotuʻutuʻu ki he akó. Ko e akó ʻe lava ke fakahoko ia ʻi ha feituʻu mata ki he mata pe ʻi he telefoní, tā vitiō, faitohi pe ʻīmeili. Ko e akó ʻoku faʻa feʻunga mo e houa nai ʻe taha, ka ʻe lava ke nounou ange ai pe lōloa ange ʻo fakatatau ki hoʻo taimi-tēpilé.
ʻE lava ke u ʻuluaki fai ha kiʻi ako ʻahiʻahi?
ʻIo. Ke fai iá, fakafonu ʻa e tohi kole ʻi he ʻinitanetí. ʻI he fetuʻutaki atu ha faiako kiate koe, fakahā kiate ia ʻokú ke loto ke ʻahiʻahiʻi ʻa e akó pea sio pe te ke saiʻia ai. Te ne ngāueʻaki ʻa e polosiua Fiefia ʻi he Moʻuí ʻo Taʻengata! ʻa ia ʻoku ʻi ai ʻa e lēsoni talateu ʻe tolu, ke tokoniʻi koe ke sio pe te ke saiʻia ʻi he akó.
Kapau te u tali ha ako Tohi Tapu, ʻe kounaʻi ai au ke u hoko ko ha taha ʻo e Kau Fakamoʻoni ʻa Sihová?
ʻIkai. ʻOku fiefia ʻa e Kau Fakamoʻoni ʻa Sihová ʻi hono akoʻi ʻa e kakaí fekauʻaki mo e Tohi Tapú, ka ʻoku ʻikai ʻaupito ke mau kounaʻi ha taha ke kau ʻi heʻemau lotú. ʻI hono kehé, ʻoku mau fakahaaʻi anga-fakaʻapaʻapa ʻa e meʻa ʻoku leaʻaki ʻe he Tohi Tapú, ʻo ʻiloʻi ko e tokotaha taki taha ʻokú ne maʻu ʻa e totonu ke fili ʻa e meʻa te ne tui ki aí.—1 Pita 3:15.
ʻE lava ke u ngāueʻaki pē ʻeku Tohi Tapú?
ʻIo, ʻe lava ke ke ngāueʻaki ha faʻahinga liliu Tohi Tapu pē ʻokú ke loto ki ai. Neongo ʻoku mau fiefia ʻi hono ngāueʻaki ʻa e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní ʻa ia ʻoku māʻalaʻala mo tonú, ʻoku mau ʻiloʻi ko e kakai tokolahi ʻoku nau saiʻia ke ngāueʻaki ha liliu ʻoku nau maheni mo ia.
ʻE lava ke u fakaafeʻi ha niʻihi kehe ke kau ʻi he akó?
ʻIo. ʻE lava ke ke fakaafeʻi mai ho fāmilí kotoa pe ko ha kaumeʻa.
Fēfē kapau naʻá ku ako ʻa e Tohi Tapú mo e Kau Fakamoʻoni ʻa Sihová he kuohilí? ʻE lava ke u toe ako?
ʻIo. Ko hono moʻoní, te ke saiʻia ange nai ʻi heʻemau polokalama ako ko ení koeʻuhi kuo fakaleleiʻi ke fehoanaki mo e fiemaʻu lolotonga ʻa e kakaí. ʻOku lahi ange ai ʻa e ngaahi tokoni ki he mamatá pea anga-fakafetalanoaʻaki ange ʻi hono fakahoa atu ki he ngaahi polokalama ako Tohi Tapu ki muʻá.
ʻOku ʻi ai haʻamou polokalama ako Tohi Tapu ʻo ʻikai ke fakahoko ia ʻe ha faiako?
ʻIo. Neongo ko e tokolahi taha ʻo e kau akó ʻoku lelei ange ʻenau akó ʻi he tokoni ʻa ha faiako, ko e niʻihi ʻoku nau saiʻia ke ako ʻiate kinautolu pē ʻi he kamatá. Ko ʻetau peesi Meʻangāue ki he Ako Tohi Tapú ʻoku lisi ai ʻa e ngaahi meʻangāue mo e fakamatala taʻetotongi ʻe lava ke ne tokoniʻi koe ʻi hoʻo ako ʻa e Tohi Tapú. Ko e ngaahi meʻangāue eni ʻe ʻaonga kiate koe:
Ngaahi Vitiō Fakatohitapu. Ko e ngaahi lēsoni ʻi he vitiō nounou ko ení ʻokú ne fakamatalaʻi ʻa e ngaahi akonaki Fakatohitapu tefitó.
Tali ʻo e Ngaahi Fehuʻi Fakatohitapú. Ko e ngaahi kupu ko ení ʻoku ʻomai ai ʻa e tali ki he ngaahi fehuʻi Fakatohitapu lahi.
LAIPELI Taua Leʻo ʻI HE ʻINITANETÍ. ʻI hono ngāueʻaki ʻa e meʻangāue fakaefekumi ko ení ʻe lava ke ke fekumi ai ʻi he ʻū tohi ʻa e Kau Fakamoʻoni ʻa Sihová.