Manatuʻi ke Lea Mālō!
KO FĒ ʻa e taimi fakamuimui naʻá ke maʻu ai ha kiʻi tohi fakamālō? Ko fē ʻa e taimi fakamuimui naʻá ke ʻave ai ha tohi fakamālō?
ʻI he māmani ko eni ʻo e fetuʻutaki fakakomipiutá, ko e ngaahi pōpoaki tohi-nima ʻo e houngaʻiá kuo hoko ia ko ha meʻa ʻoku tātātaha. Neongo ia, ko e lea “mālō” ʻi he faitohí ko ha founga makehe ia ke ʻai ai ke ʻiloʻi ʻe he kakaí ʻokú ke houngaʻia ʻi heʻenau anga-leleí. ʻOku hoko heni ʻa e ngaahi fokotuʻu ʻe niʻihi ki he founga ke fai ai iá.
1. Tohi-nima ha nouti ke ʻai ke maongo fakafoʻituitui.
2. Ngāueʻaki ʻa e hingoa ʻo e tokotaha ʻokú ke fai ki ai ʻa e fakamāloó.
3. Kapau naʻá ke maʻu ha meʻaʻofa, lave ki he meʻaʻofá pea tala ange ʻa e founga ʻokú ke palani ke ngāueʻaki ai iá.
4. Toe fai ha fakamālō ʻi he ngataʻanga ʻo e tohí.
Ko ha tohi fakamālō ʻokú ne ʻai ke ongoʻi lelei ʻa e tokotaha ʻoku fai ki aí.
Ko ia ko e taimi hoko mai ʻoku anga-talitali kakai atu ai ha taha kiate koe, fai ha ngāue ʻofa, pe ʻoatu kiate koe ha meʻaʻofá, fakahaaʻi ʻoku ʻikai te ke fakasiʻisiʻi ʻa e mahuʻinga ʻo e ngaahi feinga ʻa e tokotahá. Manatuʻi ke lea mālō!
[Puha/Fakatātā ʻi he peesi 22, 23]
Siʻi Mehikitanga Mele, (2)
ʻOku ou fakamālō lahi atu ki he uasi fafangú! (3) Koeʻuhi ʻoku ou faʻa mohe maʻu pē, kuó u ʻosi ngāueʻaki lelei ia. Naʻe fakafiefia ʻa e sio kiate koe he uike kuo ʻosí, pea ʻoku ou fakatau ange pē te ke aʻu lelei ki ʻapi. ʻOku mau fakatuʻotuʻa atu ke sio kiate koe ʻi he kahaʻu vavé ni maí.
ʻOku ou toe fakamālō atu ʻi hoʻo meʻaʻofa ʻaongá! (4)
Mei ho fakafotú,
Sione
[Fakatātā]
(1)
[Puha ʻi he peesi 23]
NGAAHI TOKONI
● Lave ʻo ʻikai fakahangatonu ki he ngaahi meʻaʻofa paʻangá. Ko e fakatātaá, ʻi he ʻikai fakahaaʻi pau ʻa e lahi ʻo e meʻa naʻá ke maʻú, ʻe lava ke ke pehē: “ʻOku ou fakamālō atu ʻi hoʻo meʻaʻofa loto-fiefoakí. ʻOku ou palani ke ngāueʻaki ia ki he . . .”
● Fakakau ai ʻa e fakamatala pē ʻoku felāveʻi mo e meʻaʻofá mo hoʻo houngaʻia aí. ʻOku ʻikai ko ha taimi eni ke ʻoatu ai ha fakamatala fakaikiiki ki hoʻo mālōlō ʻeveʻevá pe ko hoʻo fononga fakamuimui ki he falemahakí.
● ʻOua ʻe lāunga fekauʻaki mo ha faʻahinga palopalema pē naʻe hoko kiate koe ʻi he meʻaʻofá. Ko e fakatātaá, ko ha taʻeʻofa ia ke tohi, “ʻOku ou fakamālō atu ki he meʻa tunu tousí—ka ʻoku ʻikai ke hao ia ʻi he funga laupapa ʻi hoku peitó!”
[Puha ʻi he peesi 23]
ʻOku pouaki ʻe he Tohi Tapú ha laumālie ʻo e fakamālō. (Luke 17:11-19) ʻOku ekinaki mai ai kiate kitautolu ke tau “lotu maʻu pē” ki he ʻOtuá, pea hoko atu: “Fai ʻa e fakafetaʻi ʻi he meʻa kotoa pē.”—1 Tesalonaika 5:17, 18.