“Ko e Melinó ʻE Hulu Fau” ʻi he Malumalu ʻo e Puleʻanga ʻo e ʻOtuá

Ko e Puleʻanga ʻo e ʻOtuá naʻe tatali fuoloa ki aí​—ko ha founga-pule ʻoku fokotuʻu ʻe he ʻOtuá​—ʻoku vavé ni ke ne ʻomai ʻa e melino mo e fāʻūtaha ki he māmaní takatakai. “Ko e melinó ʻe hulu fau,” hangē ko ia naʻe talaʻofaʻaki ʻi he Saame 72:7. Ka ʻe kamata fakakū ʻa e pule ʻa e Puleʻangá ki he māmaní? ʻE anga-fēfē ʻene fakahoko iá? Pea ʻe lava fēfē ke ke maʻu ʻaonga mei he pule ʻa e Puleʻangá?

ʻE HOKO FAKAKŪ MAI ʻA E PULEʻANGA ʻO E ʻOTUÁ?

Naʻe tomuʻa tala ʻe he Tohi Tapú ʻa e ngaahi meʻa fakaofo lahi ʻe hoko ʻa ia te ne ʻomai ʻa e fakaʻilonga ko e Puleʻanga ʻo e ʻOtuá ʻoku vavé ni ke hoko mai. ʻOku hoko ʻa e ngaahi meʻa ko iá ko ha “fakaʻilonga” fetuiaki ʻo kau ki ai ʻa e tau fakavahaʻapuleʻanga, honge, mahaki, ngaahi mofuike, mo ha fakautuutu ʻi he maumau-laó.​—Mātiu 24:3, 7, 12; Luke 21:11; Fakahā 6:2-8.

ʻOku fakahaaʻi ʻe ha kikite ʻe taha: “ʻI he ngaahi ʻaho fakaʻosí ʻe ʻi heni ai ʻa e ngaahi taimi fakalilifu ʻa ia ʻe faingataʻa ke fekuki mo ia. He ko e tangatá te nau hoko ko e kau ʻofa kiate kinautolu pē, ko e kau ʻofa ki he paʻangá, . . . talangataʻa ki he mātuʻá, kau taʻehoungaʻia, taʻemateaki, ʻikai maʻu ʻa e ʻofa fakanatulá, lotolotokehe, kau laukovi loi, ʻikai maʻu ʻa e mapuleʻi-kitá, anga-kakaha, ʻikai ʻofa ki he leleí, . . . fakafuofuolahi ʻi he hīkisia, kau ʻofa ki he mālié kae ʻikai ʻofa ki he ʻOtuá.” (2 Tīmote 3:1-4) Ko e ngaahi tōʻonga hangē ko ení kuo fakahāhā maʻu pē ia ʻo aʻu ki ha tuʻunga. Ka ʻoku mātuʻaki failahia ia ʻi he ʻahó ni.

Ko e ngaahi kikite ko iá naʻe kamata fakahoko ia ʻi he taʻu 1914. Ko e moʻoni, ko e kau faihisitōliá, kau taki fakapuleʻangá, mo e kau faʻutohí kuo nau fakamatala ki he anga ʻo e liliu ʻa e māmaní ʻi he hili ʻa e taʻu ko iá. Ko e fakatātaá, naʻe tohi ʻa e faihisitōlia Tenimaʻake ko Peter Munch: “Ko e hoko fakafokifā ʻa e taú ʻi he 1914 ko e liliuʻanga ia ʻi he hisitōlia ʻa e faʻahinga ʻo e tangatá. Mei he ʻēpoki foʻou ʻo e fakalakalaká, . . . kuo tau hū atu kitautolu ki ha taʻu ʻo e fakatamaki, taimi fakamanavahē, fetāufehiʻaʻaki, fakataha mo e ongoʻi ʻikai ke malu ʻi he feituʻu kotoa.”

ʻI he tafaʻaki leleí, ʻe ʻi ai ʻa e nonga ʻi he hili ʻa e hoko ʻa e ngaahi meʻá ni. ʻOku nau fakahaaʻi ʻoku ofi ke pule ʻa e Puleʻangá ki he kotoa ʻo e māmaní. Ko hono moʻoní, naʻe fakakau ʻe Sīsū ʻa e fakamatala lelei ko ʻení ʻi heʻene ʻomai ʻa e fakaʻilonga ʻo e ngataʻangá: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai ʻa e ngataʻangá.”​—Mātiu 24:14.

Ko e ongoongo lelei ko iá ko ha kaveinga tefito ia ʻo e pōpoaki ʻa e Kau Fakamoʻoni ʻa Sihová. Ko hono moʻoní, ko ʻenau makasini tefitó ʻoku fakakaveinga Ko e Taua Leʻo ʻOku Fanongonongo Ai ʻa e Puleʻanga ʻo Sihová. ʻOku lāulea maʻu pē ai ki he ngaahi meʻa fakaofo ʻe fai ʻe he Puleʻanga ʻo e ʻOtuá ki he faʻahinga ʻo e tangatá mo e māmaní.

ʻE ANGA-FĒFĒ ʻA E KAMATA KE PULE ʻA E PULEʻANGA ʻO E ʻOTUÁ KI HE MĀMANÍ?

Ko e talí ʻoku kau ki ai ʻa e meʻa mahuʻinga ʻe fā ko ení:

1. Ko e Puleʻangá ʻe ʻikai ke ngāue ia ʻo fakafou pe fakafofongaʻi ʻe he kau taki fakapolitikale ʻo e māmani lolotongá.

2. Ko e kau taki fakapolitikale ʻo e māmaní, ʻi ha feinga ke puke maʻanautolu ʻa e mafaí, te nau fai fakavalevale ʻo fakafepaki ki he pule ʻa e Puleʻanga ʻo e ʻOtuá.​—Saame 2:2-9.

3. ʻE fiemaʻu ki he Puleʻanga ʻo e ʻOtuá ke ne fakaʻauha ʻa e ngaahi puleʻanga fakapolitikale ʻoku nau loto ke kei hokohoko atu ʻenau puleʻi ʻa e faʻahinga ʻo e tangatá. (Taniela 2:44; Fakahā 19:17-21) Ko e fepaki fakaʻosi ko ení ʻoku ui ia ko ʻĀmaketone.​—Fakahā 16:14, 16.

4. Ko e faʻahinga kotoa ʻoku nau talangofua loto-lelei ki he Puleʻanga ʻo e ʻOtuá te nau hao atu ʻi ʻĀmaketone pea hū ki ha māmani foʻou mo melino. Ko kinautolu ʻe faʻuʻaki ʻa e faʻahinga ʻoku ui ʻe he Tohi Tapú ko e “fuʻu kakai lahi,” ngalingali ʻe aʻu honau tokolahí ki he laui milioná.​—Fakahā 7:9, 10, 13, 14.

ʻE LAVA FĒFĒ KE KE MAʻU ʻAONGA MEI HE PULE ʻA E PULEʻANGÁ?

Ko e ʻuluaki sitepu ke kau ʻi he malumalu ʻo e Puleʻanga ʻo e ʻOtuá ko e ako. Ko hono moʻoní, naʻe pehē ʻe Sīsū ʻi heʻene lotu ki he ʻOtuá: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.”​—Sione 17:3.

ʻI he taimi ʻoku hoko ai ʻa e kakaí ʻo ʻiloʻi ʻa Sihova ko e ʻOtuá ko e Tokotahá, ʻoku nau maʻu ʻaonga ʻi he ngaahi founga lahi. Fakakaukau ki ha meʻa ʻe ua: ʻUluakí, ʻoku nau fakatupulekina ʻa e tui mālohi kiate ia. Ko e tui ko iá, ʻa ia ʻoku makatuʻunga ʻi he fakamoʻoní, ʻokú ne fakatuipauʻi kinautolu ko e Puleʻanga ʻo e ʻOtuá ʻoku moʻoni pea ʻoku vavé ni ke hoko mai ʻene pulé. (Hepelū 11:1) Ko e uá, ʻoku tupulaki ʻenau ʻofa ki he ʻOtuá pea ki he kaungāʻapí. ʻOku ueʻi kinautolu ʻe he ʻofa ki he ʻOtuá ke nau talangofua loto-lelei kiate ia. ʻOku ueʻi kinautolu ʻe he ʻofa ki he kaungāʻapí ke nau ngāueʻaki ʻa e lea ʻa Sīsū ʻoku faʻa ui ko e Lao Koulá. ʻOku pehē: “Hangē tofu pē ko ia ʻoku mou loto ke fai atu ʻe he kakaí kiate kimoutolú, fai pehē pē kiate kinautolu.”​—Luke 6:31.

ʻI he hangē ko ha tamai ʻofá, ko hotau Tokotaha-Fakatupú ʻokú ne fiemaʻu ʻa e lelei tahá maʻa kitautolu. ʻOkú ne loto ke tau maʻu ʻa e moʻui ʻoku ui ʻe he Tohi Tapú ko e “moʻui moʻoní.” (1 Tīmote 6:19) Ko e moʻui ʻi he ʻaho ní ʻoku ʻikai ko e “moʻui moʻoní” ia. Ki he laui miliona, ko ʻenau moʻuí ʻoku mātuʻaki faingataʻa pea ʻoku nau fāinga ke moʻui. Ke ʻoatu kiate koe ha fakalika ki he “moʻui moʻoní,” fakakaukau ki he niʻihi ʻo e ngaahi meʻa fakaofo ʻe fai ʻe he Puleʻanga ʻo e ʻOtuá maʻa hono kakaí.