FEKUKI MO E HIKIHIKI ʻA E TOTONGI ʻO E KOLOÁ
Tali ʻa e Tuʻunga Moʻoní
ʻI he taimi ʻoku hikihiki ai ʻa e totongi ʻo e koloá, ʻoku ʻikai nai ke tau fakatokangaʻi, tautefito kapau ʻoku hiki pē mo e vāhengá. Kae kehe, ʻi he taimi ʻoku ʻalu ai ʻi he ʻataá ʻa e totongi ʻo e koloá pea kei tatau pē ʻa e vāhengá, ʻe lava ke tau loto-moʻua mo loto-mafasia, tautefito kapau ʻoku ʻi ai hotau fāmili ke tokangaʻi.
ʻOku ʻikai malava ke tau taʻofi ʻa e hikihiki ʻa e totongi ʻo e koloá. Ka ʻi hono tali ko e tuʻunga moʻoní eni, ʻe lava ke tau maʻu ʻaonga moʻoni mei ai.
ʻUHINGA ʻOKU MAHUʻINGA AÍ
Ko e kakai ʻoku nau maʻu ha vakai pau ki he hikihiki ʻa e totongi ʻo e koloá ʻe faingofua ange nai . . .
ke nau nofoʻaki nonga. ʻI he taimi ʻoku tau nonga aí, ʻoku tau fakakaukau fakalelei ange pea fai ʻa e ngaahi fili lelei ange.
ke nau fakaʻehiʻehi mei he ngaahi tōʻonga taʻefakapotopotó. Ko e fakatātaá, ʻe taʻefakapotopoto ke ʻikai ke tau totongi ʻa e ngaahi moʻuá pe ke fakamoleki noaʻia ʻa e paʻangá.
ke fakaʻehiʻehi mei he fakafekiki mo e ngaahi mēmipa ʻo e fāmilí ʻi he paʻangá.
ke ʻiloʻi ʻa e ngaahi founga ke fekuki ai, ʻa ia ʻe kau nai ki ai ʻa hono feʻunuʻaki ʻa e ngaahi meʻa ke fakamuʻomuʻá mo ʻetau fakamolé.
MEʻA ʻE LAVA KE KE FAÍ
Loto-lelei ke feʻunuʻaki. Lolotonga ʻa e hiki tō ʻa e totongi ʻo e koloá, ʻoku fakapotopoto ke fakasiʻisiʻi ʻa e fakamolé, ʻo ka malava. ʻOku feinga ʻa e niʻihi ke tuli ki ha founga moʻui ʻoku fakalaka ia ʻi heʻenau maʻuʻanga paʻangá, ʻa ia ʻoku hangē ia ha feinga ke kakau ʻo fakafepaki ki he ʻau ʻi ha vaitafe ʻoku tafe mālohi! Ko e meʻa pē ʻe iku atu ki aí ko ʻenau mate helaʻia. Kapau ʻoku ʻi ai hao fāmili, te ke hohaʻa foki ke tokonaki maʻanautolu—pea ʻoku totonu pē ia! Kae manatuʻi eni: ʻOku fiemaʻu ʻe he ngaahi mēmipa ho fāmilí ʻa hoʻo ʻofá, ko ho taimí mo e tokangá ʻo laka ange ia ʻi ha toe meʻa.
ʻI he feinga ke tuli ki ha founga moʻui tuʻumālie ʻoku fakalaka ia ʻi heʻete maʻuʻanga paʻangá ʻoku hangē ia ha feinga ke kakau ʻo fakafepaki ki he ʻau ʻi ha vaitafe ʻoku tafe mālohi