Naʻe Kamata ʻe he ʻOtuá ke Ngaohi ha Ngaahi Meʻa

KO E ngaahi meʻa lelei kotoa pē ʻoku tau maʻu ʻoku mei he ʻOtuá. Naʻá ne ngaohi ʻa e laʻaá ke tau maʻu ai ʻa e maama ʻi he ʻahó, pea mo e māhiná mo e ngaahi fetuʻú koeʻuhi ke tau maʻu ai ha maama ʻi he poʻulí. Pea naʻe ngaohi ʻe he ʻOtuá ʻa e māmaní ke tau nofo ai.

Ka ko e laʻaá, ko e māhiná, ko e ngaahi fetuʻú mo e māmaní naʻe ʻikai ko e ngaahi meʻa ia naʻe ʻuluaki ngaohi ʻe he ʻOtuá. ʻOkú ke ʻiloʻi ʻa e meʻa naʻe ʻuluaki ngaohí? Naʻe ʻuluaki ngaohi ʻe he ʻOtuá ʻa e faʻahinga hangē ko iá. ʻOku ʻikai lava ke tau mamata ki he faʻahinga ko ʻení ʻo hangē tofu pē ko e ʻikai lava ke tau mamata ki he ʻOtuá. ʻI he Tohitapú ʻoku ui ai ʻa e faʻahinga ko ení ko e kau ʻāngelo. Naʻe ngaohi ʻe he ʻOtuá ʻa e kau ʻāngeló ke nau nofo fakataha mo ia ʻi hēvani.

Naʻe mātuʻaki makehe ʻa e ʻuluaki ʻāngelo naʻe ngaohi ʻe he ʻOtuá. Ko e ʻuluaki ʻAlo ia ʻo e ʻOtuá, pea naʻá ne ngāue fakataha mo ʻene Tamaí. Naʻá ne tokoni ki he ʻOtuá ke ngaohi ʻa e ngaahi meʻa kehe kotoa pē. Naʻá ne tokoni ki he ʻOtuá ʻi hono ngaohi ʻa e laʻaá, māhiná, ngaahi fetuʻú pea pehē ki hotau māmaní.

Naʻe fēfē ʻa e māmaní ʻi he taimi ko iá? ʻI he kamataʻangá naʻe ʻikai lava ke moʻui ha taha ʻi he māmaní. Naʻe ʻikai ha meʻa ka ko e tahi lahi pē naʻá ne ʻufiʻufi ʻa e fonuá kotoa. Ka naʻe loto ʻa e ʻOtuá ke moʻui ha kakai ʻi he māmaní. Ko ia naʻá ne kamata leva ke ne teuteu ʻa e ngaahi meʻa maʻatautolu. Ko e hā ʻa e meʻa naʻá ne faí?

Naʻe ʻuluaki fiemaʻu ʻa e maama ki he māmaní. Ko ia naʻe ʻai ʻe he ʻOtuá ʻa e maama mei he laʻaá ke ulo ki he māmaní. Naʻá ne ʻai ke malava fakatouʻosi ʻa e taimi poʻuli mo e taimi ʻaho. Hili iá, naʻe ʻai leva ʻe he ʻOtuá ʻa e fonua ke ʻalu hake ʻo māʻolunga ange ʻi he fukahi vai ʻo e tahí.

ʻI he kamatá naʻe ʻikai ha meʻa ʻi he funga fonuá. Naʻe hangē pē ʻene ʻasí ko e fakatātā ko ʻení. Naʻe ʻikai ke ʻi ai ha ngaahi matalaʻiʻakau pe ha ngaahi ʻakau pe fanga manu. Naʻa mo e fanga ika ʻi he tahí naʻe ʻikai ke ʻi ai. Naʻe kei toe ha ngāue lahi ke fai ʻe he ʻOtuá ke ʻai ʻa e māmaní ko ha feituʻu lelei moʻoni ki he fanga manú mo e kakaí ke nau moʻui ai.