Mei he Fakatupú ʻo Aʻu ki he Lōmakí

Naʻe hoko mei fē ʻa e ngaahi langí mo e māmaní? Naʻe hoko fēfē mai ʻa e laʻā, māhina, mo e ngaahi fetuʻú, pea pehē ki he ngaahi meʻa lahi ʻi he māmaní? ʻOku ʻomai ʻe he Tohitapú ʻa e tali moʻoní ʻi heʻene pehē naʻe fakatupu ʻa kinautolu ʻe he ʻOtuá. Ko ia ʻoku kamataʻaki ʻetau tohí ni ʻa e ngaahi talanoa faka-Tohitapu ʻo fekauʻaki mo e fakatupú.

ʻOku tau ako ʻo ʻilo ko e ʻuluaki ngaahi fakatupu ʻa e ʻOtuá ko e faʻahinga laumālie ʻo hangē ko iá. Ko e kau ʻāngeló ia. Ka naʻe fakatupu ʻa e māmaní maʻá e kakai ʻo hangē ko kitautolú. Ko ia naʻe ngaohi ʻe he ʻOtuá ʻa e tangata mo e fefine naʻe fakahingoa ko ʻĀtama mo ʻIvi pea tuku kinaua ki ha ngoue fakaʻofoʻofa. Ka naʻá na talangataʻa ki he ʻOtuá pea mole ai ʻa e totonu ke hokohoko atu ʻi he moʻuí.

Ko e vahaʻa taimi mei he fakatupu ʻo ʻĀtamá ʻo aʻu ki he fuʻu Lōmakí, naʻe feʻunga mo e taʻu ʻe 1,656. Lolotonga ʻa e taimi ko ʻení naʻe moʻui ai ha kakai kovi tokolahi. ʻI hēvani, naʻe ʻi ai ʻa e faʻahinga laumālie taʻe hā mai, ko Sētane mo ʻene kau ʻāngelo kovi. ʻI he māmaní, naʻe ʻi ai ʻa Keini mo e kakai kovi tokolahi kehe, kau ai mo e kau tangata mālohi angakehe. Ka naʻe toe ʻi ai foki mo e kakai lelei ʻi he māmaní​—⁠ko ʻĒpeli, ʻĪnoke mo Noa. ʻI he Konga ʻULUAKÍ te tau lau ai ʻo kau ki he kakai mo e ngaahi meʻa kotoa ko ʻeni naʻe hokó.