Ko ha Ngoue Fakaʻofoʻofa

SIO ki he māmaní ʻi he fakatātā ko ení! ʻOku fakaʻofoʻofa hono meʻa kotoa pē! Sio ki he musie mo e ngaahi ʻakau, ko e ngaahi matalaʻiʻakau pea mo e fanga manu kotoa pē. Te ke lava ʻo tala ʻa e ʻelefānité mo e fanga laioné?

Naʻe hoko fēfē mai ʻa e fuʻu ngoue fakaʻofoʻofá ni? Tau vakai ange ki he anga hono teuteu ʻe he ʻOtuá ʻa māmani maʻatautolu.

ʻUluaki, naʻe ngaohi ʻe he ʻOtuá ʻa e musie lanu mata ke ne ʻufiʻufi ʻa e funga ʻo e fonuá. Peá ne ngaohi leva ʻa e faʻahinga kehekehe ʻo e ngaahi ʻakau iiki mo e vao mo e ngaahi ʻakau. ʻOku tokoni ʻa e ngaahi meʻa ʻoku tupu ko ʻení ki hono ʻai ke fakaʻofoʻofa ʻa e māmaní. Ka ʻoku lahi ange ʻa e meʻa ʻoku nau faí. Ko e lahi ʻo e ngaahi meʻá ni ʻoku nau ʻomai maʻatautolu ha ngaahi meʻakai ʻoku mātuʻaki ifo moʻoni.

Naʻe ngaohi ki mui mai ai ʻe he ʻOtuá ha ika ke lele holo ʻi he vaí pea mo e fanga manupuna ke puna holo ʻi he ʻataá. Naʻá ne ngaohi ʻa e fanga kulī, mo e fanga pusi mo e fanga hoosi; ko e fanga manu lalahi mo e fanga manu iiki. Ko e hā ʻa e faʻahinga fanga manu ʻoku nofo ofi atu ki homou ʻapí? ʻIkai ʻoku totonu ke tau fiefia ʻi hono ngaohi ʻe he ʻOtuá ʻa e ngaahi meʻa kotoa ko ʻení maʻatautolu?

Faifai atu, naʻe ngaohi ʻe he ʻOtuá ʻa e konga ʻe taha ʻo e māmaní ko e feituʻu mātuʻaki makehe. Naʻá ne ui ʻa e feituʻu ko ʻení ko e ngoue ko ʻĪteni. Naʻe mātuʻaki haohaoa ia. Naʻe fakaʻofoʻofa ʻa e meʻa kotoa pē ʻo fekauʻaki mo ia. Pea naʻe fiemaʻu ʻe he ʻOtuá ke hoko ʻa e māmaní kotoa ʻo hangē ko e ngoue fakaʻofoʻofa ko eni naʻá ne ngaohí.

Kae toe sio ange ki he fakatātā ʻo e ngoué ni. ʻOkú ke ʻilo ʻa e meʻa naʻe vakai ki ai ʻe he ʻOtuá ʻoku ʻikai ke ʻi he ngoué ni? Tau sio ange.