Naʻe Kamata ʻa e Moʻui Faingataʻaʻia

ʻI TUʻA he ngoue ko ʻĪtení, naʻe aʻusia ai ʻe ʻĀtama mo ʻIvi ha ngaahi faingataʻa lahi. Naʻe fiemaʻu kiate kinaua ke na ngāue mālohi kae maʻu haʻana meʻakai. ʻI he ʻikai ko ha fuaʻiʻakau fakaʻofoʻofa, naʻá na sio ki he ʻakau talatala mo e talatalaʻāmoa naʻe tupu takatakai ʻiate kinaua. Ko e meʻa eni naʻe hoko ʻi he taimi naʻe talangataʻa ai ʻa ʻĀtama mo ʻIvi ki he ʻOtuá pea ʻikai te na toe hoko ko Hono kaumeʻá.

Ka ko e meʻa naʻe kovi ange aí, naʻe kamata leva ʻa ʻĀtama mo ʻIvi ke na mate. Manatuʻi, naʻe fakatokanga ʻe he ʻOtuá kiate kinaua te na mate ʻo kapau te na kai mei he fuʻu ʻakau ʻe taha. ʻI he ʻaho pē ko ia naʻá na kai aí ne kamata leva ke na mate. Ko e vale ē ko ʻena taʻefiefakaongo ki he ʻOtuá!

Naʻe fanauʻi ʻa e fānau kotoa pē ʻa ʻĀtama mo ʻIví hili hono tuku ʻe he ʻOtuá ʻa e ongo mātuʻá ni ki tuʻa mei he ngoue ko ʻĪtení. Naʻe ʻuhinga leva ia naʻe toe pau ke tupu ʻo motuʻa pea mate ʻa e fānaú.

Ka ne talangofua pē ʻa ʻĀtama mo ʻIvi kia Sihova, naʻe mei fakafiefia pē ʻa e moʻuí ia kiate kinaua mo ʻena fānaú. Naʻa nau mei lava pē ʻo moʻui taʻengata mo fiefia ʻi he māmaní. Naʻe ʻikai mei ʻi ai ha taha ia ʻe tupu ʻo motuʻa, pea puke mo mate.

ʻOku fiemaʻu ʻe he ʻOtuá ʻa e kakaí ke moʻui taʻengata ʻi he fiefia, pea ʻokú Ne talaʻofa ʻe ʻi ai ha ʻaho ʻe pehē ai. ʻE ʻikai ngata pē ʻi he hoko ʻa e māmaní kotoa ʻo fakaʻofoʻofá, ka ʻe toe moʻui lelei ʻa e kakai kotoa pē. Pea ʻe hoko ʻa e tokotaha kotoa pē ʻi he māmaní ko e kaumeʻa lelei ia mo e tokotaha kotoa pē pea pehē mo e ʻOtuá.

Ka naʻe ʻikai ke kei hoko ʻa ʻIvi ko ha kaumeʻa ʻo e ʻOtuá. Ko ia ʻi heʻene fanauʻi ʻa ʻene fānaú, naʻe ʻikai ko ha meʻa faingofua kiate ia. Naʻá ne mamahiʻia. Naʻe ʻomai kiate ia ʻe heʻene talangataʻa kia Sihová ha ngaahi mamahi lahi, ʻikai ko ia?

Naʻe maʻu ʻe ʻĀtama mo ʻIvi ʻa e ngaahi foha mo e ngaahi ʻofefine tokolahi. ʻI hono fanauʻi hona ʻuluaki fohá, naʻá na fakahingoa ia ko Keini. Naʻá na fakahingoa hona foha fika uá ko ʻĒpeli. Ko e hā ʻa e meʻa naʻe hoko kiate kinauá? ʻOkú ke ʻiloʻi?