Ko e Hiki ʻa e Fāmilí ki ʻIsipité

NAʻE ʻikai ke kei malava ʻe Siosifa ke matuʻuaki ʻene ngaahi ongoʻí. Naʻá ne fakahā ki heʻene kau sevānití kotoa pē ke nau ʻalu ki tuʻa. Pea toe pē ʻa Siosifa mo hono ngaahi tokouá, naʻá ne kamata ke tangi. ʻE lava ke tau fakakaukau atu ki he fuʻu ʻohovale ʻa hono ngaahi tokouá, koeʻuhi he naʻe ʻikai te nau ʻilo ʻa e ʻuhinga ʻokú ne tangi aí. Pea faifai atu naʻá ne pehē: ‘Ko Siosifa au. ʻOku kei moʻui ʻa ʻeku tamaí?’

Naʻe fuʻu ʻohovale lahi fau hono ngaahi tokouá, naʻe ʻikai lava ke nau toe lea. Naʻa nau ilifia. Ka naʻe pehē atu ʻe Siosifa: ‘Kātaki ʻunuʻunu mai ke ofi.’ ʻI heʻenau ʻunuʻunu atú, naʻá ne pehē: ‘Ko homou tokoua au ko Siosifá, ʻa ia naʻa mou fakatau ki ʻIsipité.’

Naʻe hoko atu ʻa e lea ʻa Siosifá ʻi ha founga anga-ʻofa: ‘ʻOua naʻa mou pehē ko kimoutolu ʻoku koví koeʻuhi ko hoʻomou fakatau mai au ki hení. Ko e ʻOtuá naʻá ne ʻomai au ki ʻIsipité ni ke fakahaofi ʻa e moʻui ʻa e kakaí. Kuo fokotuʻu au ʻe Felo ke u hoko ko e pule ʻo e fonuá ni kotoa. Ko ia foki fakavavevave ki heʻeku tamaí pea fakahā ki ai ʻa e meʻá ni. Pea tala ki ai ke hiki mai ʻo nofo ʻi heni.’

Pea naʻe toki fāʻofua ʻa Siosifa ʻi hono ngaahi tokouá, peá ne kuku mo ʻuma kiate kinautolu kotoa. ʻI he fanongo ai ʻa Felo naʻe haʻu ʻa e ngaahi tokoua ʻo Siosifá, naʻá ne tala kia Siosifa: ‘ʻOange kiate kinautolu ha saliote pea ʻomai ʻenau tamaí pea mo honau ngaahi fāmilí pea nau foki mai ki heni. Pea te u ʻoange kiate kinautolu ʻa e konga fonua lelei taha ʻi he fonua kotoa ʻo ʻIsipité.’

Ko e meʻa ia naʻa nau faí. ʻOkú ke sio heni ki he feʻiloaki ʻa Siosifa mo ʻene tamaí ʻi heʻene haʻu ki ʻIsipite mo hono fāmilí hono kotoa.

Naʻe tupu ʻa e fāmili ʻo Sēkopé ʻo fuʻu tokolahi. Ko hono lau fakakātoa ko e toko 70 ʻi heʻenau hiki ki ʻIsipité, ko hono lau ia ʻo Sēkope mo ʻene fānaú mo e ngaahi makapuná. Ka naʻe ʻi ai foki mo honau ngaahi uaifi, pea mo e kau sevāniti foki. Naʻa nau nofo kotoa ʻi ʻIsipite. Naʻe ui kinautolu ko e kau ʻIsileli, koeʻuhi he naʻe ʻosi liliu ʻe he ʻOtuá ia ʻa e hingoa ʻo Sēkopé ko ʻIsileli. Naʻe hoko ʻa e kau ʻIsilelí ko e kakai mātuʻaki makehe ki he ʻOtuá, ʻo hangē ko ia te tau sio ki ai ʻamui angé.