Ko e Ngata Palasá

ʻOKU hangē mai nai ha ngata moʻoni ʻoku takatakai ʻi he fuʻu poú? Ka ʻoku ʻikai. Ko e ngata ia naʻe ngaohi mei he palasa. Naʻe tala ʻe Sihova kia Mōsese ke fokotuʻu ia ki ʻolunga ʻi ha pou koeʻuhi ke sio ʻa e kakaí ki ai ka nau moʻui pē. Ka ko e fanga ngata kehe ia ʻi he kelekelé ko e fanga ngata moʻoni. Naʻa nau huhu ʻa e kakaí pea ʻai kinautolu ke nau puke. ʻOkú ke ʻilo hono ʻuhingá?

Ko hono ʻuhingá he naʻe lea fakafepaki ʻa e kau ʻIsilelí ki he ʻOtuá mo Mōsese. Naʻa nau lāunga: ‘Ko e hā naʻá ke ʻomi ai kimautolu mei ʻIsipite ke mau mate ʻi he toafá ni? ʻOku ʻikai ha meʻakai pe vai heni. Pea kuo mau pāhia ʻi he kai ʻo e maná.’

Ka ko e maná ko e meʻakai lelei. Naʻe ʻomi ia ʻe Sihova kiate kinautolu ʻo fakafou mai ʻi ha mana. Pea ʻi ha mana naʻá ne toe ʻoange mo e vai kiate kinautolu. Ka naʻe ʻikai ke houngaʻia ʻa e kakaí ki he anga hono tokangaʻi kinautolu ʻe he ʻOtuá. Ko ia naʻe ʻomi ʻe Sihova ʻa e fanga ngata kona ko ʻení ke tauteaʻaki ʻa e kakai ʻIsilelí. Naʻe huhu kinautolu ʻe he fanga ngatá, pea naʻe mate ai ʻa e kakai tokolahi.

Faifai atu pē pea naʻe aʻu ʻa e kakaí kia Mōsese ʻo nau pehē: ‘Kuo mau fai angahala, koeʻuhi kuo mau lea fakafepaki kia Sihova mo koe. Lotu kia Sihova ke ʻave ʻa e fanga ngatá mei heni.’

Ko ia naʻe lotu ʻa Mōsese koeʻuhi ko e kakaí. Pea naʻe tala ʻe Sihova kia Mōsese ke ngaohi ʻa e ngata palasa ko ʻení. Naʻá ne pehē ke ʻai ia ʻi ha pou, pea ke sio ki ai ha taha naʻe huhu ʻe he ngatá. Naʻe fai pē ʻe Mōsese ʻo fakatatau ki he lea ʻa e ʻOtuá. Pea ko e kakai ʻa ia naʻe huhu ʻe he ngatá naʻa nau sio ki he ngata palasá pea naʻa nau toe moʻui lelei.

ʻOku ʻi ai ʻa e meʻa ke tau ako mei heni. Ko kitautolu hono kotoa, ʻoku tau hangē ko e kau ʻIsileli naʻe huhu ʻe he fanga ngatá. Ko kitautolu kotoa ʻoku tau ʻi ha tuʻunga ʻo fakaʻau ki he mate. Vakavakai holo, pea te ke sio ʻoku tupu ʻa e kakaí ʻo motuʻa, pea mahamahaki, pea mate. ʻOku peheé koeʻuhi ko e ʻuluaki tangatá mo e fefiné, ko ʻĀtama mo ʻIvi, naʻá na tafoki meia Sihova, pea ko kitautolu kotoa ko ʻena fānau. Ka kuo ʻai ʻe Sihova ha founga te tau lava ai ʻo moʻui taʻengata.

Naʻe fekau mai ki māmani ʻe Sihova hono ʻAló, ko Sīsū Kalaisi. Naʻe tautau ʻa Sīsū ʻi he ʻakau, koeʻuhi he naʻe fakakaukau ʻa e kakai tokolahi ko e tangata kovi ia. Ka naʻe foaki mai ʻe Sihova ʻa Sīsū ke fakahaofi kitautolu. Kapau te tau hanga kiate ia, pea kapau te tau muimui kiate ia, pea te tau maʻu ʻa e moʻui taʻengatá. Ka te tau toe ako ʻo lahi ange fekauʻaki mo ʻeni ʻamui ange.