Ko e Kolosi ʻo Fou ʻi he Vaitafe Sioataní

SIO! ʻOku kolosi ʻa e kau ʻIsilelí ʻi he Vaitafe Sioataní! Ka ko e fē ʻa e vaí? Koeʻuhi he naʻe lahi ʻa e ʻuha naʻe tō ʻi he taimi ko ia ʻo e taʻú, pea naʻe fonu ʻa e vaitafé ʻi he ngaahi momeniti siʻi ki muʻa atu. Ka ʻi he taimí ni kuo ʻosi kotoa ʻa e vaí! Pea kuo fononga atu ʻa e kau ʻIsilelí ʻi he fonua mōmoa ʻo hangē pē ko ia naʻe hoko ʻi he Tahi Kulokulá! Naʻe ʻalu kotoa ʻa e vaí ki fē? Tau vakai ange.

ʻI he hoko ʻa e taimi ke kolosi ai ʻa e kau ʻIsilelí ʻi he Vaitafe Sioataní, ko e meʻa eni naʻe fekau ʻe Sihova kia Siōsiua ke tala ki he kakaí: ‘Ko e kau taulaʻeikí ke nau hiki ʻa e puha ʻo e fuakavá pea ʻalu muʻomuʻa ʻiate kitautolu. Pea ʻi he tuʻu honau vaʻé ki he vai ʻo e Vaitafe Sioataní, pea ʻe tuʻu leva ʻa e tafe ia ʻa e vaí.’

Ko ia naʻe fua ʻe he kau taulaʻeikí ʻa e puha ʻo e fuakavá, pea nau muʻomuʻa ʻi he kakaí. ʻI heʻenau aʻu ki he Vaitafe Sioataní, naʻe hopo atu ʻa e kau taulaʻeikí ki he loto vaí. Naʻe tafe mālohi mo loloto. Ka ʻi he taimi pē naʻe aʻu ai honau vaʻé ki he vaí, naʻe kamata ke tuʻu ʻa e tafe ʻa e vaí! Ko ha mana lahi ē! Naʻe taʻofi ʻe Sihova ʻa e vaí. Ko ia, naʻe taimi siʻi pē kuo ʻikai toe ʻi ai ha vai ʻi he vaitafé!

Ko e kau taulaʻeiki naʻa nau toʻo ʻa e puha ʻo e fuakavá naʻa nau ʻalu ki he loto mālie ʻo e vaitafé kuo mōmoa. ʻOkú ke sio ki ai ʻi he fakatātaá? ʻI heʻenau tuʻu ko ʻená, naʻe ʻalu kotoa ʻa e kau ʻIsilelí ʻo kolosi ʻi he Vaitafe Sioataní ʻi he fonua mōmoa!

ʻI he ʻosi ʻa e kolosi ʻa e kakai kotoa pē, naʻe fakahā ʻe Sihova kia Siōsiua ke tala ki he kau tangata mālohi ʻe toko 12: ‘Mou ʻalu ki he loto vaitafé ki he feituʻu ʻoku tuʻu ai ʻa e kau taulaʻeikí mo e puha ʻo e fuakavá. Pea toʻo ha ngaahi maka ʻe 12, pea fokotuʻutuʻu ia ʻi he feituʻu te mou nofo kotoa ai ʻapō. Pea ʻi he kahaʻú, ka ʻeke ʻe hoʻomou fānaú ʻa e ʻuhinga ʻo e ngaahi maka ko ʻení, pea te mou tala ange kiate kinautolu naʻe tuʻu ʻa e tafe ʻa e vaí ʻi he taimi naʻe hiki atu ai ʻa e puha ʻo e fuakava ʻa Sihová ʻo kolosi ʻi Sioataní. Ko e ngaahi maká ko e fakamanatu kiate kimoutolu ʻo e maná ni!’ Naʻe toe fokotuʻutuʻu foki ʻe Siōsiua ʻa e ngaahi maka ʻe 12 ʻi he feituʻu naʻe tuʻu ai ʻa e kau taulaʻeikí ʻi he tafeʻanga ʻo e vaitafé.

Ko hono fakaʻosí naʻe pehē ʻe Siōsiua ki he kau taulaʻeiki naʻa nau fua ʻa e puha ʻo e fuakavá: ‘Mou ʻalu hake mei he Vaitafe Sioataní.’ Pea ʻi he taimi pē naʻa nau ʻalu hake aí, naʻe kamata leva ke toe tafe mai ʻa e vaí.