Naʻe Hoko ʻa Siōsiua ko e Taki

NAʻE fiemaʻu ʻe Mōsese ke ʻalu mo e kau ʻIsilelí ki Kēnani. Ko ia naʻá ne kole: ‘Sihova, tuku au ke u kolosi ʻi he Vaitafe Sioataní, pea ke u mamata ʻi he fonua leleí.’ Ka naʻe pehē ʻe Sihova: ‘Kuo feʻunga! ʻOua naʻa ke toe lea ʻo kau ki he meʻá ni!’ ʻOkú ke ʻilo hono ʻuhinga naʻe lea pehē ai ʻa Sihová?

Ko hono ʻuhingá ko e meʻa naʻe hoko ʻi hono taaʻi ʻe Mōsese ʻa e maká. Manatuʻi, ko ia mo ʻĒlone naʻe ʻikai te na fakalāngilangiʻi ʻa Sihova. Naʻe ʻikai te na tala ki he kakaí ko Sihova naʻá ne ʻomai ʻa e vai mei he maká. ʻI he ʻuhinga ko ʻení naʻe pehē ai ʻe Sihova heʻikai te ne tuku kinaua ke hū ki Kēnani.

Ko ia ʻi ha ngaahi māhina siʻi pē hili ʻa e mate ʻa ʻĒloné, naʻe tala ʻe Sihova kia Mōsese: ‘ʻAve ʻa Siōsiua, pea fokotuʻu ia ʻi muʻa ʻia ʻEliesa ko e taulaʻeikí pea mo e kakaí. Pea ʻi muʻa ʻiate kinautolu kotoa, tala ki he taha kotoa pē ko Siōsiua ʻa e taki foʻou.’ Naʻe fai ʻe Mōsese ʻo fakatatau mo e lea ʻa Sihová, ʻo hangē ko ia ʻokú ke sio ki ai ʻi he fakatātā.

Pea naʻe toki tala ʻe Sihova kia Siōsiua: ‘Ke ke mālohi, pea ʻoua te ke ilifia. Te ke taki ʻa e kau ʻIsilelí ki he fonua ko Kēnani ʻa ia naʻá ku talaʻofa kiate kinautolú, pea te u kau mo koe.’

Ki mui mai, naʻe tala ʻe Sihova kia Mōsese ke ne kaka ki he tumutumu ʻo e Moʻunga ko Nepó ʻi he fonua ko Mōapé. Naʻe lava ʻa Mōsese ke sio mei ai ʻo laka atu ʻi he Vaitafe Sioataní ki he fonua fakaʻofoʻofa ko Kēnaní. Naʻe pehē ʻe Sihova: ‘Ko e fonua ʻeni naʻá ku talaʻofa ke foaki ki he fānau ʻa ʻĒpalahame, ʻAisake, mo Sēkopé. Kuó u tuku ke ke sio ki ai, ka heʻikai te u tuku ke ke hū atu ki ai.’

ʻI he funga Moʻunga ko Nepó naʻe mate ai ʻa Mōsese. Naʻe taʻu 120 hono motuʻá. Naʻá ne kei mālohi pē, pea naʻe kei lelei pē ʻene sió. Naʻe loto-mamahi ʻaupito ʻa e kakaí mo tangi koeʻuhi ko e mate ʻa Mōsesé. Ka naʻa nau fiefia ʻi he hoko ʻa Siōsiua ko honau taki foʻoú.