Naʻe Taaʻi ʻe Mōsese ʻa e Maká

NAʻE ʻosi atu ʻa e ngaahi taʻu​—⁠taʻu ʻe 10, taʻu ʻe 20, taʻu ʻe 30, taʻu ʻe 39! Pea naʻe kei ʻi he toafá pē ʻa e kau ʻIsilelí. Ka ʻi he ngaahi taʻu kotoa ko ʻení naʻe kei tokangaʻi pē ʻe Sihova ʻa ʻene kakaí. Naʻá ne fafanga kinautolu ʻaki ʻa e meʻakai ko e mana. Naʻá ne taki kinautolu ʻi he lolotonga ʻo e ʻahó ʻaki ha konga ʻao, pea taki ʻaki ha pou afi ʻi he poʻulí. Pea ʻi he ngaahi taʻú ni kotoa naʻe ʻikai ke mahae honau valá pe mamahi honau vaʻé.

Naʻa nau aʻu ki he ʻuluaki māhina ʻo e taʻu hono 40 talu mei heʻenau mavahe mei ʻIsipité. Naʻe toe ʻapitanga pē ʻi Kētesi ʻa e kau ʻIsilelí. Ko e feituʻu ʻeni naʻa nau ʻi ai pea ʻalu atu ai ʻa e kau sipai ʻe toko 12 ki he fonua ko Kēnaní he meimei taʻu ʻe 40 ki muʻa. Naʻe mate ʻi Kētesi ʻa e tuofefine ʻo Mōsese ko Meliame. Pea hangē pē ko ia naʻe hoko ʻi muʻá, naʻe toe ʻi ai pē ʻa e faingataʻa.

Naʻe ʻikai maʻu ʻe he kakaí ha vai. Ko ia naʻa nau lāunga kia Mōsese: ‘Naʻe mei lelei ange ke mau mate. Ko e hā naʻá ke ʻomai ai kimautolu mei ʻIsipite ki he feituʻu faingataʻa ko ʻeni ʻa ia ʻoku ʻikai ke tupu ai ha meʻa? ʻOku ʻikai ha uite, pe fiki, pe kālepi, pe ha pomikānite. Pea naʻa mo e vai ke inú ʻoku ʻikai.’

ʻI he ʻalu ʻa Mōsese mo ʻĒlone ki he tāpanekalé ke lotú, naʻe tala ʻe Sihova kia Mōsese: ‘Fakatahatahaʻi ʻa e kakaí. Pea ʻi muʻa ʻiate kinautolu kotoa lea ki he maka ko ená. ʻE tafe mai mei ai ha vai feʻunga ki he kakaí pea mo ʻenau fanga manú kotoa.’

Ko ia naʻe fakatahaʻi ʻe Mōsese ʻa e kakaí, peá ne pehē: ‘Fanongo, ʻa kimoutolu ʻoku ʻikai haʻamou falala ki he ʻOtuá! Te u ʻoatu mo ʻĒlone ha vai mei he maká ni maʻamoutolu?’ Pea naʻe toki taaʻi tuʻo ua ʻe Mōsese ʻa e maká ʻaki hono tokotokó, pea naʻe tafe mālohi mai ʻa e vai mei he maká. Naʻe ʻi ai ʻa e vai feʻunga ki he kakaí mo e fanga manú kotoa ke nau inu.

Ka naʻe ʻita ʻa Sihova kia Mōsese mo ʻĒlone. ʻOkú ke ʻilo pe ko e hā hono ʻuhingá? Ko hono ʻuhingá he naʻe pehē ʻe Mōsese mo ʻĒlone te na ʻomi ʻa e vai mei he maká. Ka ko hono moʻoní ko Sihova ia naʻá ne ʻomai ʻa e vaí. Pea koeʻuhi ko e ʻikai ke tala ʻe Mōsese mo ʻĒlone ʻa e moʻoni ʻo fekauʻaki mo e meʻá ni, naʻe pehē ʻe Sihova te ne tautea kinaua. Naʻá ne pehē: ‘Heʻikai te mo taki ʻeku kakaí ki Kēnani.’

Naʻe ʻikai ke fuʻu fuoloa pea naʻe mavahe leva ʻa e kau ʻIsilelí mei Kētesi. ʻOsi ha taimi siʻi naʻa nau aʻu ki he Moʻunga ko Hoa. ʻI heni, ʻi he funga moʻungá, naʻe mate ai ʻa ʻĒlone. Naʻe taʻu 123 ia ʻi heʻene maté. Naʻe loto-mamahi ʻaupito ʻa e kau ʻIsilelí, pea ʻi he ʻaho ʻe 30 naʻe nofo ʻa e kakaí kotoa ʻo tangi koeʻuhi ko ʻĒlone. Naʻe hoko hono foha ko ʻEliesá ko e taulaʻeiki lahi hono hoko ʻi he puleʻanga ʻo ʻIsilelí.