Ko e Kau Sipai ʻe Toko 12

SIO ki he fuaʻiʻakau ʻoku haʻamo ʻe he ongo tangatá ni. Sio ki he lalahi ʻo e fuhinga kālepí. ʻOku fiemaʻu ai ha ongo tangata ke na haʻamo ia ʻaki ha vaʻakau. Pea sio ki he fuaʻi fikí mo e pomikānité. Ko e ʻomai nai mei fē ʻa e ngaahi fuaʻiʻakau fakaʻofoʻofa ko ʻení? Mei he fonua ko Kēnaní. Manatuʻi, ko Kēnani ʻa e feituʻu naʻe nofo ai ʻa ʻĒpalahame, ʻAisake mo Sēkope ʻi he taimi ʻe taha. Ka koeʻuhi ko e honge ʻi ai naʻe hiki ai ʻa Sēkope mo hono fāmilí ki ʻIsipite. Ka ʻi he ʻosi ha taʻu ʻe 216 mei ai, naʻe taki atu leva ʻe Mōsese ʻa e kau ʻIsilelí ke foki ki Kēnani. Naʻa nau aʻu ki he feituʻu ʻi he toafá naʻe ui ko Kētesi.

Naʻe nofo ʻa e kakai kovi ʻi he fonua ko Kēnaní. Ko ia naʻe fekau atu ʻe Mōsese ha kau sipai ʻe toko 12, pea fakahā kiate kinautolu: ‘Vakai pe ko e hā ʻa e tokolahi ʻo e kakai ʻoku nofo aí pea mo honau mālohí. Vakai pe ʻoku lelei ʻa e kelekelé ke fai ai ha ngoue. Pea manatuʻi ke ʻomai ha fuaʻiʻakau.’

ʻI he foki mai ʻa e kau sipaí ki Kētesí, naʻa nau tala kia Mōsese: ‘Ko e fonua lelei moʻoni.’ Pea ke fakapapauʻi iá naʻa nau fakahā ange kia Mōsese ʻa e ngaahi fuaʻiʻakau. Ka naʻe pehē ʻe he toko 10 ʻo e kau sipaí: ‘Ko e kakai ʻoku nau nofo aí ʻoku lalahi mo mālohi. ʻE tāmateʻi kitautolu ʻo kapau te tau feinga ke maʻu ʻa e fonuá.’

Naʻe ilifia ʻa e kau ʻIsilelí ʻi heʻenau fanongo ki he meʻá ni. Naʻa nau pehē: ‘Naʻe mei lelei ange ke mau mate ʻi ʻIsipite pe ʻi he toafá ni. Te tau mate ʻi he taú, pea ʻe puke pōpula ʻa hotau ngaahi uaifí mo ʻetau fānaú. Tau fili ha taki foʻou ke fetongi ʻa Mōsese, pea ke tau foki ki ʻIsipite!’

Ka naʻe falala ʻa e ongo sipai ʻe toko ua kia Sihova, peá na feinga ke fakafiemālieʻi ʻa e kakaí. Ko hona hingoá ko Siōsiua mo Kēlepi. Naʻá na pehē: ‘ʻOua te mou ilifia. ʻOku kau ʻa Sihova mo kitautolu. ʻE faingofua pē ke tau maʻu ʻa e fonuá.’ Ka naʻe ʻikai ke tokanga ki ai ʻa e kakaí. Naʻe aʻu ʻo nau loto ke tāmateʻi ʻa Siōsiua mo Kēlepi.

Naʻe ʻai ʻe he meʻá ni ke ʻita lahi ʻa Sihova, peá ne tala kia Mōsese: ‘Heʻikai ke hū ha taha kuo taʻu 20 pe lahi ange ki he fonua ko Kēnaní. Kuo nau mamata ʻi he ngaahi mana naʻá ku fai ʻi ʻIsipité pea ʻi he toafá, ka ʻoku teʻeki ai pē ke nau falala kiate au. Ko ia te nau hē holo pē ʻi he toafá ʻi he taʻu ʻe 40 kaeʻoua kuo mate ʻa e tokotaha fakamuimuí. Ko Siōsiua pē mo Kēlepi te na hū atu ki he fonua ko Kēnaní.’