Ko e Kau Kipione Poto

NAʻE mateuteu ʻa e ngaahi kolo lahi ʻi Kēnaní ke tauʻi ʻa ʻIsileli. Naʻa nau fakakaukau te nau ikuna. Ka naʻe ʻikai ke fakakaukau pehē ʻa e kakai ʻi he kolo ofi mai ai ko Kipioné. Naʻa nau tui ko e ʻOtuá ʻokú ne tokoni ki he kau ʻIsilelí, pea heʻikai te nau fie tau mo e ʻOtuá. Ko ia ʻokú ke ʻilo pe ko e hā ʻa e meʻa naʻe fai ʻe he kau Kipioné?

Naʻa nau fakakaukau ke ʻai ke hangē pē ʻoku nau nofo ʻi ha feituʻu mamaʻo ʻaupitó. Ko ia naʻe ʻai ʻe ha niʻihi ʻo e kau tangatá ha ngaahi vala mahaehae mo e ngaahi senitolo motuʻa. Naʻa nau fakaheka ki heʻenau ngaahi ʻasí ha ngaahi tangai mahaehae, mo ha ngaahi foʻi mā kuo pakupaku. Pea nau toki ʻalu atu kia Siōsiua ʻo nau pehē: ‘Kuo mau haʻu mei ha fonua mamaʻo, koeʻuhi ko ʻemau fanongo ʻi homou ʻOtua lahi ko Sihová. Kuo mau fanongo ʻi he ngaahi meʻa kotoa naʻá ne fai maʻamoutolu ʻi ʻIsipité. Ko ia naʻe fakahā ʻe homau kau takí ke teuteu ha meʻakai ki he fonongá pea ke mau haʻu ʻo lea kiate kimoutolu ʻo pehē: “Ko kimautolú ko hoʻomou kau sevāniti. Talaʻofa mai heʻikai te mou faitau mo kimautolu.” Kuo mou vakai mai kuo mahaehae homau valá ʻi heʻemau fononga mamaʻó pea kuo motuʻa mo pakupaku ʻa ʻemau maá.’

Naʻe tui ʻa Siōsiua mo e kau taki kehé ki he kau Kipioné. Ko ia naʻa nau talaʻofa heʻikai te nau faitau mo kinautolu. Ka ʻi he ʻosi pē ha ʻaho ʻe tolu naʻa nau toki ʻilo ʻoku nofo ofi mai pē ʻa e kau Kipioné.

Naʻe ʻeke ʻe Siōsiua kiate kinautolu: ‘Ko e hā naʻa mou tala mai ai ko hoʻomou haʻu mei he fonua mamaʻo?’

Naʻe tali ange ʻe he kau Kipioné: ‘Naʻa mau fai ʻeni koeʻuhi he naʻe fakahā mai kiate kimautolu naʻe talaʻofa ʻe Sihova ko homou ʻOtuá te ne foaki ʻa e fonua kotoa ko Kēnaní kiate kimoutolu. Ko ia naʻa mau ilifia naʻa mou tāmateʻi kimautolu.’ Ka naʻe tauhi pē ʻe he kau ʻIsilelí ʻenau talaʻofá, pea naʻe ʻikai te nau tāmateʻi ʻa e kau Kipioné. Ka naʻa nau ʻai kinautolu ko ʻenau kau sevāniti.

Naʻe ʻita ʻa e tuʻi ʻo Selusalemá koeʻuhi ko e fakamelino ʻa e kau Kipioné mo ʻIsilelí. Ko ia naʻá ne pehē ki ha ngaahi tuʻi kehe ʻe toko fā: ‘Mou haʻu ʻo tokoniʻi au ke tauʻi ʻa Kipione.’ Pea ko e meʻa ia naʻe fai ʻe he ngaahi tuʻi ko ʻeni ʻe toko nimá. Naʻe fakapotopoto nai ʻa e kau Kipioné ʻi heʻenau fakamelino mo ʻIsilelí, ʻa ia kuo hoko ia ke ne ʻai ʻa e ngaahi tuʻi ko ʻení ke faitau mo kinautolu? Te tau vakai ange ki ai.