Naʻe Tuʻumaʻu ʻa e Laʻaá

SIO kia Siōsiua. ʻOkú ne pehē: ‘Laʻā, tuʻumaʻu!’ Pea naʻe tuʻumaʻu ʻa e laʻaá. Naʻe tuʻu ʻi he langí ʻi he ʻaho kakato. Ko Sihova naʻá ne ʻai ʻeni ke hokó! Ka tau vakai ange pe ko e hā naʻe fiemaʻu ai ʻe Siōsiua ʻa e laʻaá ke kei ulo ai pē.

ʻI he kamata ʻa e ngaahi tuʻi kovi ʻe toko nima ʻi he fonua ko Kēnaní ke tauʻi ʻa e kau Kipioné, naʻe fekau ʻe he kau Kipioné ha tangata ke ʻalu kia Siōsiua ʻo kole tokoni. Naʻá ne pehē: ‘Haʻu vave kiate kimautolu! Fakahaofi kimautolu! Ko e ngaahi tuʻi kotoa ʻo e fonua moʻungá kuo nau haʻu ke faitau mo hoʻomou kau sevānití.’

Naʻe ʻalu atu leva ʻa Siōsiua mo ʻene kau tangata taú hono kotoa. ʻI he poó kotoa naʻa nau laka atu. ʻI heʻenau aʻu ki Kipioné, naʻe ilifia ʻa e kau sōtia ʻa e ngaahi tuʻi ʻe toko nimá pea nau kamata ke hola. Pea naʻe toki ʻomi leva ʻe Sihova ha fuʻu ʻuha maka mei he langí, pea naʻe lahi ange ʻa e kau sōtia naʻe mate ʻi he ʻuha maká ʻiate kinautolu naʻe tāmateʻi ʻe he kau tangata tau ʻa Siōsiuá.

Naʻe sio ʻa Siōsiua ʻe vave ʻa e tō ʻa e laʻaá. Pea ʻe fakapoʻuli, pea ʻe tokolahi ʻa e hao ʻi he kau sōtia ʻa e ngaahi tuʻi kovi ʻe toko nimá. Ko e ʻuhinga eni naʻe lotu ai ʻa Siōsiua kia Sihova peá ne toki pehē: ‘Laʻā, tuʻumaʻu!’ Pea ʻi he hokohoko atu ʻa e ulo ʻa e laʻaá, naʻe malava leva ʻa e kau ʻIsilelí ke fakaʻosi mo ikuna ʻa e taú.

Naʻe ʻi ai mo e ngaahi tuʻi kovi kehe ʻi Kēnani ʻa ia naʻa nau fehiʻa ʻi he kakai ʻa e ʻOtuá. Naʻe feʻunga mo e meimei taʻu ʻe ono kia Siōsiua mo ʻene kau taú ke nau ikunaʻi ai ʻa e ngaahi tuʻi ʻe toko 31 ʻi he fonuá. ʻI he ʻosi ʻa e meʻá ni, naʻe ʻai ʻe Siōsiua ke vahevahe ʻa e fonua ko Kēnaní ki he ngaahi matakali naʻe kei fiemaʻu kiate kinautolu ha feituʻu ke nofo aí.

Hili ha ngaahi taʻu lahi, pea naʻe mate ʻa Siōsiua ʻi hono taʻu 110. ʻI heʻene kei moʻuí pea mo hono ngaahi kaungāmeʻá, naʻe kei talangofua ai pē ʻa e kakaí kia Sihova. Ka ʻi he mate ʻa e kau tangata leleí ni, naʻe kamata leva ʻa e kakaí ke fai ʻa e ngaahi meʻa ʻoku kovi pea nau tō ai ki he faingataʻa. Ko e taimi ʻeni naʻe fuʻu fiemaʻu ai ʻa e tokoni ʻa e ʻOtuá kiate kinautolú.