Ko e Ongo Fefine Loto-Toʻa

ʻI HE taimi naʻe tō ai ʻa e kau ʻIsilelí ki he faingataʻá, naʻa nau tangi hake kia Sihova. Naʻe tali ʻe Sihova ʻaki ʻene ʻomai ha kau taki loto-toʻa ke tokoniʻi kinautolu. ʻOku ui ʻi he Tohitapú ʻa e kau taki ko ʻení ko e kau fakamaau. Ko Siōsiua ʻa e ʻuluaki fakamaaú, pea ko e niʻihi ʻo e kau fakamaau ki mui aí ko ʻOtenili, ʻEhuti mo Samikā. Ka ko e toko ua ʻo e kakai naʻe tokoni ki ʻIsilelí ko e ongo fefine ko Tēpola mo Siaili.

Ko Tēpolá ko e palōfita fefine ia. Naʻe ʻoange ki ai ʻe Sihova ha fakamatala ʻo fekauʻaki mo e kahaʻú, peá ne toki tala ki he kakaí ʻa e meʻa naʻe leaʻaki ʻe Sihová. Naʻe toe hoko foki ʻa Tēpola ko e fakamaau. Naʻá ne nofo ʻi he fuʻu lalo paame ʻi he fonua moʻungá, pea naʻe haʻu kiate ia ʻa e kakaí ke maʻu tokoni ki heʻenau ngaahi palopalemá.

ʻI he taimi ko ʻení ko Siapini naʻe tuʻi ʻi Kēnaní. Naʻe ʻi ai ʻene ngaahi saliote tau ʻe 900. Ko ʻene kau taú naʻe fuʻu malohi pea ko ia ai, naʻe fakamālohiʻi ʻa e tokolahi ʻo e kau ʻIsilelí ke nau hoko ko e kau sevāniti ʻa Siapini. Ko e pule ʻi he kau tau ʻa e tuʻi ko Siapiní naʻe ui ko Sīsela.

ʻI he ʻaho ʻe taha naʻe kole ʻa Tēpola kia Fakamaau Pēlake ke haʻu, peá ne fakahā ange kiate ia: ‘Kuo pehē ʻe Sihova: “ʻAve ʻa e kau tangata ʻe toko 10,000 pea taki kinautolu ki he Moʻunga Tēpoá. Te u ʻoatu ai ʻa Sīsela kiate koe. Pea te u ʻai ke ke ikunaʻi ia mo ʻene kau taú.”’

Naʻe tala ange ʻe Pēlake kia Tēpola: ‘Te u ʻalu ʻo kapau te ke ʻalu mo au.’ Naʻe ʻalu pē mo Tēpola, ka naʻá ne pehē kia Pēlake: ‘Heʻikai te ke ongoongolelei ʻi he ikuná, koeʻuhi he ʻe tuku ʻe Sihova ʻa Sīsela ki he nima ʻo ha fefine.’ Pea ko e meʻa ʻeni naʻe hokó.

Naʻe ʻalu hifo ʻa Pēlake mei he Moʻunga Tēpoá ke fakafetaulaki ki he kau sōtia ʻa Sīselá. Naʻe fakafokifā kuo ʻai ʻe Sihova ha tāfea, pea naʻe melemo ai ʻa e tokolahi ʻo e kau sōtia ʻa e filí. Ka naʻe hifo ʻa Sīsela mei heʻene salioté ʻo hola.

Naʻe ʻikai ke fuoloa kuo aʻu atu ʻa Sīsela ki he tēniti ʻo Siailí. Naʻe fakaafeʻi ia ʻe Siaili ke hū ange, peá ne ʻoange haʻane huʻakau. Naʻe ʻai ai ia ke ne fiemohea, pea naʻe ʻikai ke fuoloa naʻá ne mohe maʻu. Pea naʻe toʻo leva ʻe Siaili ha foʻi pine ʻo e tēnití ʻo tukiʻi he ʻulu ʻo e tangata koví ni. ʻI he haʻu ki mui ange ai ʻa Pēlake, naʻe fakahā ange ʻe Siaili ʻa Sīsela kuo ʻosi mate! Ko ia ʻoku lava ke ke sio naʻe hoko ʻo moʻoni ʻa e meʻa naʻe leaʻaki ʻe Tēpolá.

Faifai atu pē pea naʻe tāmateʻi foki mo e Tuʻi ko Siapiní, pea naʻe toe melino ʻa e kau ʻIsilelí ʻi ha vahaʻa taimi.