Ko Tēvita mo Kolaite

NAʻE toe haʻu ʻa e kau Filisitiá ke faitau mo e kau ʻIsilelí. Ko e ngaahi taʻokete ʻe toko tolu ʻo Tēvitá naʻa nau ʻi he kau tau ʻa Saulá. Ko ia ʻi he ʻaho ʻe taha naʻe tala ange ʻe Sese kia Tēvita: ‘Toʻo ha uite mo ha foʻi mā ʻo ʻave ki ho ngaahi tokouá. Vakai pe ʻoku nau fēfē.’

ʻI he aʻu atu ʻa Tēvita ki he ʻapitanga taú, naʻá ne lele ki he laine taú ke vakai ki hono ngaahi tokouá. Naʻe haʻu ʻa e fuʻu saiāniti Filisitia ko Kolaiaté ʻo ne fakakataʻaki ʻa e kau ʻIsilelí. Naʻá ne fai ʻeni ʻi he pongipongi mo e efiafi kotoa pē ʻo feʻunga mo e ʻaho ʻe 40. Naʻá ne kaila: ‘Fili ha taha ʻo hoʻomou kau tangatá ke ma tau. Kapau ʻe mālohi ia peá ne tāmateʻi au, te mau hoko ko hoʻomou kau pōpula. Ka ʻo kapau te u mālohi mo tāmateʻi ia, te mou hoko ko ʻemau kau pōpula. ʻOku ou poleʻi atu ke fili mai ha taha ke ma tau.’

Naʻe ʻeke ʻe Tēvita ki he kau sōtia ʻe niʻihi: ‘Ko e hā ʻe maʻu ʻe he tangata ko ia te ne tāmateʻi ʻa e Filisitiá mo fakatauʻatāinaʻi ʻa e kau ʻIsilelí mei he meʻa fakamaá ni?’

Naʻe pehē ʻe ha sōtia: ‘ʻE ʻoange ʻe Saula ki he tangata ko iá ha koloa lahi. Pea te ne ʻoange ki ai mo hono ʻofefiné ke hoko ko hono uaifi.’

Ka naʻe ilifia kotoa ʻa e kau ʻIsilelí ia ʻia Kolaiate koeʻuhi ko hono fuʻu lahí. Naʻe lōloa ange ʻi he fute ʻe 9 (ʻa ia ko e meimei mita ia ʻe 3), pea naʻe ʻi ai mo ʻene sōtia ʻe taha naʻá ne toʻo ʻene paá.

Naʻe ʻalu leva ha kau sōtia ʻo tala ki he tuʻi ko Saulá, ʻoku loto ʻa Tēvita ke tau mo Kolaiate. Ka naʻe tala ʻe Saula kia Tēvita: ‘Heʻikai lava ke ke tau mo e Filisitia ko ʻení. ʻOkú ke kei tamasiʻi, ka ko ha sōtia ia talu mei heʻene kei siʻi.’ Naʻe tali ange ʻe Tēvita: ‘Naʻá ku tāmateʻi ha pea mo ha laione naʻá na ʻave ʻa e fanga sipi ʻa ʻeku tamaí. Pea ʻe hoko ʻa e Filisitiá ni ʻo hangē ko e taha ʻo kinaua. ʻE tokoniʻi au ʻe Sihova.’ Ko ia naʻe pehē ʻe Saula: ‘ʻAlu, pea ʻofa ke kau ʻa Sihova mo koe.’

Naʻe ʻalu atu ʻa Tēvita ʻi he veʻe vaitafé peá ne toʻo ha foʻi maka molemole ʻe nima, peá ne faʻo ia ki heʻene kató. Peá ne toki toʻo leva ʻene makatā peá ne ʻalu atu ke tau mo e saiānití. ʻI he vakai mai ki ai ʻa Kolaiaté, naʻe ʻikai te ne meimei tui ki ai. Naʻá ne fakakaukau ʻe fuʻu faingofua ke tāmateʻi ʻa Tēvita.

Naʻe pehē ʻe Kolaiate: ‘Haʻu kiate au, pea te u foaki ho sinó ke kai ʻe he manupuná mo e fanga manú.’ Ka naʻe pehē ʻe Tēvita: ‘ʻOkú ke haʻu kiate au mo e heletā, mo e ongo tao, ka ko au ʻoku ou ʻalu kiate koe mo e huafa ʻo Sihová. ʻI he ʻahó ni ʻe tuku koe ʻe Sihova ki hoku ongo nimá pea te u tāmateʻi koe.’

Pea naʻe lele atu ʻa Tēvita kia Kolaiate. Naʻá ne toʻo ha foʻi maka mei heʻene kató, ʻo ʻai ia ki he makataá, peá ne tolongi atu ia ʻaki hono iví kotoa. Naʻe ʻalu hangatonu atu pē ʻa e foʻi maká ki he ʻulu ʻo Kolaiaté, peá ne tō leva ʻo mate! ʻI he vakai ʻa e kau Filisitiá kuo mate ʻa ʻenau fuʻu toʻá, naʻa nau tafoki kotoa ʻo lele. Naʻe tulimui atu ʻa e kau ʻIsilelí kiate kinautolu pea naʻa nau ikuna ʻa e taú.