Naʻe ʻIkai Ilifia ʻa Tēvita

Ko e hā hoʻo meʻa te ke fai ʻi he taimi ʻokú ke ilifia aí?— Mahalo pē te ke ʻalu kia mami mo teti ki ha tokoni. Ka ʻoku toe ʻi ai ʻa e tokotaha ʻe lava ke ne tokoniʻi koe. ʻOku mālohi ange ia ʻi ha toe taha pē. ʻOkú ke ʻiloʻi ko hai ia?— ʻIo, ko Sihova ko e ʻOtuá. Tau lāulea angé ki ha kiʻi talavou ʻi he Tohi Tapú ko hono hingoá ko Tēvita. Naʻá ne ʻiloʻi ʻe tokoniʻi maʻu pē ia ʻe Sihova, ko ia ai naʻe ʻikai ke ne ilifia.

ʻI he taimi naʻe kei pēpē ai ʻa Tēvitá, naʻe akoʻi ia ʻe heʻene ongo mātuʻá ke ʻofa kia Sihova. Naʻe tokoni eni kia Tēvita ke ʻoua ʻe ilifia naʻa mo e taimi naʻe hoko ai kiate ia ha ngaahi meʻa fakailifiá. Naʻá ne ʻiloʻi ko Sihova naʻe hoko ko hono Kaumeʻa pea te Ne tokoniʻi ia. ʻI he taimi ʻe taha, naʻe tokangaʻi ai ʻe Tēvita ʻa e fanga sipí, naʻe haʻu ai ha fuʻu laione ʻo ʻūtaki ʻa e sipí! ʻOkú ke ʻilo ʻa e meʻa naʻe fai ʻe Tēvitá? Naʻá ne tuli ʻa e laioné pea ngalingali naʻá ne tāmateʻi ia ʻaki hono ongo nimá! Pea hili iá ʻi he taimi naʻe ʻohofi ai ʻe ha pea ʻa e fanga sipí naʻe toe tāmateʻi ia ʻe Tēvita! ʻOkú ke fakakaukau ko hai naʻá ne tokoniʻi ʻa Tēvitá?— ʻIo, ko Sihova.

Naʻe toe ʻi ai ha taimi naʻe makehe ange ai ʻa e toʻa ʻa Tēvitá. Ko e kau ʻIsilelí naʻa nau tau mo e kakai naʻe ui ko e kau Filisitia. Ko e taha ʻi he kau sōtia Filisitiá ko ha fuʻu tangata lōloa, ko ha saianiti! Ko hono hingoá ko Kolaiate. Naʻe fakakataʻaki ʻe he saianiti ko ení ʻa e kau sōtia ʻIsilelí mo Sihova. Naʻe poleʻi ʻe Kolaiate ʻa e kau sōtia ʻIsilelí ke ō mai ke nau tau. Ka naʻe ilifia ʻaupito ʻa e kotoa ʻo e kau ʻIsilelí ke tau mo ia. ʻI he taimi naʻe fanongo ai ʻa Tēvita ki aí, naʻá ne tala ange kia Kolaiate: ‘Te u tau au mo koe! ʻE tokoni mai ʻa Sihova kiate au pea te u ikunaʻi koe!’ ʻOkú ke fakakaukau naʻe toʻa ʻa Tēvita?— ʻIo, naʻe toʻa ʻaupito. ʻOkú ke fieʻilo ki he meʻa naʻe hokó?

Naʻe toʻo ʻe Tēvita ʻene makataá mo e foʻi maka molemole ʻe nima, pea naʻá ne ʻalu atu ke faitau mo e saianití. ʻI he taimi naʻe sio ai ʻa Kolaiate ki he kiʻi tamasiʻi ko Tēvitá, naʻá ne fakakataʻaki ʻa Tēvita. Ka naʻe tala ange ʻe Tēvita kiate ia: ‘ʻOkú ke haʻu kiate au mo e heletā, ka ʻoku ou ʻalu atu mo e huafa ʻo Sihová!’ Naʻá ne ʻai leva ha foʻi maka ki heʻene makataá, peá ne lele ʻo tukuange hangatonu atu ia kia Kolaiate. Naʻe tau ʻa e foʻi maká ʻi he laʻe ʻo Kolaiaté! Naʻe tō ʻa e fuʻu saianití ki he kelekelé ʻo mate! Naʻe ilifia ʻaupito ʻa e kau Filisitiá pea nau hola kotoa. Naʻe lava fēfē ha kiʻi tamasiʻi hangē ko Tēvitá ke ne ikunaʻi ha fuʻu saianiti?— Naʻe tokoniʻi ia ʻe Sihova, pea ʻoku mālohi lahi ange ʻa Sihova ʻi he fuʻu saianiti ko iá!

Ko e hā ʻe lava ke ke ako mei he talanoa kia Tēvitá?— ʻOku mālohi lahi ange ʻa Sihova ʻi ha toe taha pē. Pea ko ho Kaumeʻá ia. Ko ia ai ʻi he taimi pē te ke ongoʻi ilifia aí, manatuʻi, ko Sihova te ne tokoniʻi koe ke ke hoko ʻo toʻa!