Ko e ʻUhinga Naʻe Pau ke Hola Ai ʻa Tēvitá

ʻI HE ʻosi hono tāmateʻi ʻe Tēvita ʻa Kolaiaté, naʻe ʻomai ʻa Tēvita kia Saula ʻe he ʻeikitau ʻo e kau ʻIsilelí ko ʻĀpina. Naʻe fiefia ʻaupito ʻa Saula ʻia Tēvita. Naʻá ne fokotuʻu ia ko e ʻeikitau pea naʻe toe ʻave foki ia ʻo nofo ʻi he fale ʻo e tuʻí.

Ki mui mai, ʻi he foki mai ʻa e kau taú mei heʻenau tau mo e kau Filisitiá, naʻe hiva ʻa e kau fefiné: ‘Kuo tāmateʻi ʻe Saula ʻa e toko afe, ka ko e toko mano ʻa Tēvita.’ Naʻe hanga ʻe he meʻa ko ʻení ʻo ʻai ʻa Saula ke meheka, koeʻuhi kuo ʻoange ʻa e lāngilangi lahi ange kia Tēvita ʻia Saula. Ka naʻe ʻikai ke meheka ʻa e foha ia ʻo Saula ko Sionatané. Naʻá ne fuʻu ʻofa ʻaupito ʻia Tēvita pea naʻe ʻofa pehē foki mo Tēvita ʻia Sionatane. Ko ia naʻá na fetalaʻofaʻaki te na hoko maʻu ai pē ko e ongo kaungāmeʻa.

Ko Tēvitá ko e tokotaha tā haʻape lelei, pea naʻe saiʻia ʻaupito ʻa Saula ʻi he ngaahi fasi naʻá ne taá. Ka ʻi he ʻaho ʻe taha naʻe ʻai ʻe he meheká ʻa Saula ke ne fai ha meʻa ʻoku kovi ʻaupito. ʻI he lolotonga tā ʻe Tēvita ʻa e haʻapé, naʻe toʻo ʻe Saula ʻene taó ʻo ne veloʻiʻaki ia ʻa Tēvita mo ne pehē: ‘Te u veloʻi ʻa Tēvita ki he holisí ʻaki ʻa e taó!’ Ka naʻe kalo ʻa Tēvita ia, pea ʻikai ke tau ai ʻa e taó. Ki mui ai naʻe toe hokaʻi ʻe Saula ʻa Tēvita ʻaki ʻa e taó kae hala pē. Ko ia naʻe ʻilo leva ʻe Tēvita kuo pau ke ne tokanga ʻaupito.

ʻOkú ke manatuʻi ʻa e talaʻofa naʻe fai ʻe Saulá? Naʻá ne pehē te ne ʻoange hono ʻofefiné ke hoko ko e uaifi ia ʻo e tangata te ne tāmateʻi ʻa Kolaiaté. Faifai atu pē pea naʻe toki tala ange ʻe Saula kia Tēvita ʻe lava ke ne mali mo hono ʻofefine ko Maikale, ka kuo pau ke ne ʻuluaki tāmateʻi ʻa e toko 100 ʻo e ngaahi fili ko e kau Filisitia. Fakakaukau ange ki ai! Naʻe ʻamanaki moʻoni ʻa Saula ʻe tāmateʻi ʻe he kau Filisitiá ʻa Tēvita. Ka naʻe ʻikai, pea ko ia naʻe ʻave ai ʻe Saula hono ʻofefiné ke hoko ko e uaifi ʻo Tēvita.

ʻI he ʻaho ʻe taha naʻe tala ai ʻe Saula kia Sionatane mo e kotoa ʻo ʻene kau sevānití ʻokú ne fiemaʻu ke tāmateʻi ʻa Tēvita. Ka naʻe lea ange ʻa Sionatane ki heʻene tamaí: ‘ʻOua te ke fakalaveaʻi ʻa Tēvita. Kuo teʻeki ai ke ne faihala kiate koe. Ka ʻi he meʻa kotoa kuó ne faí ko ha tokoni lahi ia kiate koe. Naʻe mei mole ʻene moʻuí ʻi heʻene tau mo Kolaiaté, pea ʻi hoʻo vakai ki aí naʻá ke fiefia ʻi he meʻa naʻá ne faí.’

Naʻe fanongo ʻa Saula ki hono fohá, pea naʻá ne talaʻofa kiate ia heʻikai te ne fakalaveaʻi ʻa Tēvita. Naʻe toe fakafoki mai ʻa Tēvita, pea naʻe toe ngāue ʻi he fale ʻo Saulá ʻo hangē pē ko ia ʻi muʻa atú. Kaekehe, ʻi he ʻaho ʻe taha, lolotonga ʻa e tā ʻe Tēvita ha ngaahi fasi, naʻe toe veloʻi ʻe Saula ʻaki ʻene taó ʻa Tēvita. Naʻe kalo ʻa Tēvita ia, pea naʻe tuʻu ʻa e tao ʻi he holisí. Ko hono tuʻo tolu ʻeni! Naʻe ʻilo leva ʻe Tēvita kuo pau ke ne hola!

ʻI he pō ko iá naʻe ʻalu ʻa Tēvita ki hono fale ʻoʻona. Ka naʻe fekau atu ʻe Saula ha kau tangata ke tāmateʻi ia. Naʻe ʻilo ʻe Maikale ʻa e palani ʻa ʻene tamaí. Ko ia naʻá ne tala ki hono husepānití: ‘Kapau heʻikai te ke ʻalu ʻi he poó ni, te ke mate ʻapongipongi.’ ʻI he pō ko iá naʻe tokoni ʻa Maikale kia Tēvita ke hola ʻi he matapā sioʻatá. ʻI ha taʻu nai ʻe fitu naʻe pau ke toitoi holo ʻa Tēvita koeʻuhi naʻa maʻu ia ʻe Saula.