Naʻe Tokoni ha Kiʻi Taʻahine ki ha Tangata Maʻu Mafai

ʻOKÚ KE ʻilo pe ko e hā ʻoku leaʻaki ʻe he kiʻi taʻahine ko ʻení? ʻOkú ne fakamatala ki he fefiné ʻo kau ki he palōfita ʻa Sihova ko ʻIlaisa, pea mo e ngaahi meʻa fakaofo naʻe tokoniʻi ia ʻe Sihova ke ne faí. ʻOku ʻikai ke ʻilo ʻa e fefiné ia ʻo kau kia Sihova koeʻuhi he ʻoku ʻikai ko ha ʻIsileli ia. Ko ia, tau sio ange pe ko e hā naʻe ʻi he ʻapi ai ʻo e fefiné ʻa e kiʻi taʻahine ko ʻení.

Ko ha fefine Sīlia ia. Ko hono husepānití ko Neamani, ko e ʻeikitau ia ʻo e kau tau Sīliá. Naʻe puke pōpula ʻe he kau Sīliá ʻa e kiʻi taʻahine ʻIsileli ko ʻení, pea ʻomai ia ki he uaifi ʻo Neamaní ke hoko ko ʻene sevāniti.

Naʻe puke ʻa Neamani ʻi ha mahaki kovi ko e kilia. Ko e mahaki ko ʻení ʻokú ne lava ke ʻai ha kakano ʻo ha taha ke ngangana. Ko e meʻa eni naʻe tala ange ʻe he kiʻi taʻahiné ki he uaifi ʻo Neamaní: ‘ʻOku ou fakaʻamu ʻe lava ʻe hoku ʻeikí ke ʻalu ki he palōfita ʻa Sihova ʻi ʻIsileli. Te ne fakamoʻui ia mei he kiliá.’ Ki mui ai naʻe fakahā ʻeni ki he husepāniti ʻo e fefiné.

Naʻe fuʻu fiemaʻu ʻaupito ʻe Neamani ke fakamoʻui ia; ko ia naʻá ne fili ke ʻalu ki ʻIsileli. ʻI heʻene aʻu ki aí, naʻá ne ʻalu ki he fale ʻo ʻIlaisá. Naʻe fekau ʻe ʻIlaisa ʻene sevānití ke ʻalu ʻo tala kia Neamani ke ʻalu ki he Vaitafe Sioataní ʻo kaukau tuʻo fitu ai. Naʻe ʻai ʻe he meʻá ni ʻa Neamani ke ʻita lahi ʻaupito ai, peá ne pehē: ‘Ko e ngaahi vaitafe ʻi homau fonuá ʻoku lelei ange ia ʻi ha vaitafe ʻi ʻIsilelí!’ ʻI he ʻosi pē ʻene leaʻaki ʻení, naʻe ʻalu leva ʻa Neamani.

Ka naʻe tala ange ʻe ha taha ʻo ʻene kau sevānití: ‘Tangataʻeiki, kapau ʻe tala atu ʻe ʻIlaisa ke ke fai ha meʻa ʻoku faingataʻa, te ke fai ia. Ko e hā ʻoku ʻikai te ke lava ai ke ke kaukau ʻo hangē ko ʻene leá?’ Naʻe fanongo ʻa Neamani ki heʻene sevānití pea naʻe ʻalu ʻo uku tuʻo fitu ʻi he Vaitafe Sioataní. ʻI heʻene fai ʻení, naʻe hoko ʻo lelei ʻa hono kakanó mo moʻui lelei!

Naʻe fiefia ʻaupito ʻa Neamani. Naʻá ne foki kia ʻIlaisa ʻo tala kiate ia: ‘Kuo u ʻilo pau ʻi he taimí ni ko e ʻOtua ʻo ʻIsilelí ko e ʻOtua moʻoní pē ia ʻi he māmaní kātoa. Ko ia, kātaki, ʻo tali ʻa e meʻaʻofa ko ʻení meiate au.’ Ka naʻe tali ange ʻe ʻIlaisa: ‘ʻIkai, heʻikai te u tali ia.’ Naʻe ʻilo ʻe ʻIlaisa ʻe hala kiate ia ke ne tali ʻa e meʻaʻofá koeʻuhi he ko Sihova ia naʻá ne fakamoʻui ʻa Neamaní. Ka naʻe fiemaʻu ʻe he sevāniti ʻa ʻIlaisa ko Kēhesi ke ne maʻu ʻa e meʻaʻofá.

Ko ia, ko e meʻa ʻeni naʻe fai ʻe Kēhesí. ʻI he hili ʻa e ʻalu ʻa Neamaní, naʻe tulimui atu ʻa Kēhesi kiate ia. Pea pehē ʻe Kēhesi: ‘Kuo fekau au ʻe ʻIlaisa ke fakahā kiate koe ʻokú ne fiemaʻu ha konga ʻo hoʻo meʻaʻofá ke ʻave ki hono ngaahi kaungāmeʻa naʻa nau toki ʻaʻahi mai.’ Ko hono moʻoní, ko e loi pē ʻeni ia. Ka naʻe ʻikai ke ʻilo ia ʻe Neamani ko e loi ʻeni; ko ia naʻá ne ʻoange ʻa e konga ʻo e meʻaʻofá kia Kēhesi.

ʻI he foki ʻa Kēhesi ki ʻapí, naʻe ʻilo ʻe ʻIlaisa ʻa e meʻa kuó ne faí. Naʻe tala ia ʻe Sihova kiate ia. Ko ia naʻá ne pehē: ‘Koeʻuhi ko hoʻo fai ʻa e meʻa ʻoku kovi ko ʻení, ʻe hoko ʻa e kilia naʻe ʻia Neamaní kiate koe.’ Pea naʻe hoko pē ʻeni ʻi he taimi pē ko iá!

Ko e hā ʻoku tau ako mei he ngaahi meʻa kotoa ko ʻení? ʻUluaki, ke tau hangē ko e kiʻi taʻahiné ʻo talanoa ʻo fekauʻaki mo Sihova. ʻE lahi ʻa e lelei ʻe maʻu mei ai. Ko hono uá, ʻoku totonu ke ʻoua te tau loto-mahikihiki ʻo hangē naʻe ʻuluaki ʻi ai ʻa Neamaní, ka ʻoku totonu ke tau talangofua ki he kau sevāniti ʻa Sihová. Pea ko hono tolú, ʻoku totonu ke ʻoua te tau loi ʻo hangē ko ia naʻe fai ʻe Kēhesí. ʻIkai ʻoku lahi ʻa e meʻa te tau ako mei hono lau ʻa e Tohitapú?