Naʻá Ne Loto ke Tokoni

KUÓ KE ʻiloʻi ha taha naʻe puke lahi?— Naʻá ke fakaʻamu ange naʻe lava ke ke fai ha meʻa ke tokoni kiate ia?— Fēfē kapau ko ʻene haʻú mei ha fonua kehe pe ko ha lotu kehe? Te ke kei loto pē ke tokoni kiate ia ke ne sai?— Ko ha kiʻi taʻahine naʻe nofo ʻi he fonua ko ʻIsilelí ʻi he meimei taʻu ʻe 3,000 kuo maliu atú naʻá ne loto pehē. Tau talanoa angé ki he meʻa naʻe hoko he taimi ko iá.

ʻOku faʻa fai ʻa e fetauʻaki ʻi he vahaʻa ʻo ʻIsileli ʻi he kuonga muʻá, ʻa ia ʻoku nofo ai ʻa e taʻahiné mo e fonua ofi mai ko Sīliá. (1 Tuʻi 22:1) ʻI he ʻaho ʻe taha ʻoku haʻu ai ʻa e kau Sīliá ki ʻIsileli ʻo nau taki pōpula ʻa e kiʻi taʻahiné. ʻOku ʻave ia ki Sīlia, ʻa ia ʻokú ne hoko ai ko e sevāniti ʻa e uaifi ʻo Neamani, ko e ʻeiki-tau Sīliá. ʻOku maʻu ʻe Neamani ha mahaki kovi ʻoku ui ko e kiliá, ʻa ia ʻoku lava ke ʻauʻaunga ai ha kakano ʻo ha taha.

ʻOku tala ange ʻe he taʻahine sevānití ki he uaifi ʻo Neamaní ʻa e founga ʻe lava ke fakamoʻui ai ʻa hono husepānití. ʻOkú ne pehē: ‘Ka ne ʻi Samelia ʻa Neamani, ʻe fakamaʻa ia ʻe he palōfita ʻa Sihova ko ʻIlaisá.’ Sai, ko e founga ʻo e talanoa ʻa e taʻahine sevānití fekauʻaki mo ʻIlaisá ʻokú ne ʻai ke tui ʻa Neamani ʻe malava moʻoni ʻe he palōfitá ke fakamoʻui ia. Ko ia ʻi he loto ki ai ʻa Peni-hetati, ko e Tuʻi Sīliá, ʻoku fai ai ʻe Neamani mo hano kau tauhi ʻa e fononga lōloa ʻi he kilomita nai ʻe 150 ke kumi kia ʻIlaisa.

ʻUluakí, ʻoku nau ʻalu kia Siholame, ko e tuʻi ʻIsilelí. ʻOku nau fakahaaʻi kiate ia ʻa e tohi ʻa Peni-hetati ʻoku kole ai ha tokoni kia Neamani. Ka naʻe ʻikai ke tui ʻa Siholame ia kia Sihova pe ko e palōfita ko ʻIlaisá. ʻOku fakakaukau ʻa Siholame ia ko e feinga ʻa Peni-hetatí ke tau mo ia. ʻI he fanongo ki he meʻá ni ʻa ʻIlaisá, ʻokú ne tala ange kia Tuʻi Siholame: “Tuku ke ne haʻu kiate au.” ʻOku loto ʻa ʻIlaisa ke fakahāhā ʻa e mālohi ʻo e ʻOtuá ke fakamoʻui ʻa Neamani mei hono mahaki palakuú.—2 Tuʻi 5:1-8.

ʻI he aʻu ʻa Neamani ki he fale ʻo ʻIlaisá mo ʻene fanga hōsí mo e ngaahi salioté, ʻoku fekau atu ʻe ʻIlaisa ha talafekau ke ne tala kiate ia: “ʻAlu, ʻo kaukau tuʻo fitu ʻi Sioatani, pea te ke moʻui.” ʻOku ʻita heni ʻa Neamani. ʻOkú ne ʻamanekina ʻe haʻu ʻa ʻIlaisa ʻo tākalo hono nimá ʻi hono kiliá ke mole. ʻI hono kehé, ʻokú ne sio pē ki he talafekau ko ení! Ko ia ʻoku tafoki ai ʻa Neamani ʻi he ʻita ʻo kamata ke foki ki ʻapi.—2 Tuʻi 5:9-12.

Ko e hā naʻá ke mei faí kapau ko e taha koe ʻo e kau sevāniti ʻa Neamaní?— Sai, ʻoku ʻeke ange ʻe he kau sevānití kiate ia: ‘Ka ne ko e meʻa lahi kuo tala atu ʻe ʻIlaisa ke ke faí, ʻikai kuó ke fai ia? Ko ia ko e hā ʻoku ʻikai te ke fai ai ʻa e meʻa faingofua ko ení—ko e kaukau pē peá ke moʻui?’ ʻOku fanongo ʻa Neamani kia kinautolu. ʻOkú ne “ʻalu hifo, ʻo [kamata] uku tuʻo fitu ʻi Sioatani, . . . pea [ʻoku] foki mai hono kakano, ʻo hange ko e kakano ʻo ha tamasiʻi.”

ʻOku foki ʻa Neamani kia ʻIlaisa ʻo ne pehē: “Vakai kuo u ʻilo ʻoku ʻikai ha ʻotua ʻi mamani katoa, ka ʻi Isileli pe.” ʻOkú ne talaʻofa kia ʻIlaisa heʻikai ʻaupito te ne toe “fai feilaulau . . . ki ha ʻotua kehe, ka kia Sihova pe.”—2 Tuʻi 5:13-17.

Te ke saiʻia ke tokoniʻi ha taha ke ne ako fekauʻaki mo Sihova pea mo e meʻa ʻe lava ke ne faí, ʻo hangē ko ia naʻe fai ʻe he kiʻi taʻahiné?— ʻI he taimi naʻe ʻi māmani ai ʻa Sīsuú, naʻe tui ha tangata kilia kiate ia peá ne pehē: ‘Kapau ʻokú ke loto moʻoni ke tokoniʻi au, te ke lava.’ ʻOkú ke ʻiloʻi ʻa e tali ʻa Sīsuú?— “ʻOku ou loto pe.” Pea naʻe fakamoʻui ia ʻe Sīsū, ʻo hangē tofu pē ko hono fakamoʻui ʻe Sihova ʻa Neamaní.—Mātiu 8:2, 3.

ʻOkú ke ʻilo fekauʻaki mo e māmani foʻou ʻe fakatupu ʻe Sihova ʻa ia ʻe moʻui lelei ai pea malava ke moʻui taʻengata ʻa e kakai kotoa pē?— (2 Pita 3:13; Fakahā 21:3, 4) Ko e moʻoni, te ke loto ke talanoa ki he niʻihi kehé fekauʻaki mo e ngaahi meʻa fakaofo ko ení!