Ko e Tuʻi Lelei Fakaʻosi ʻo ʻIsilelí

NAʻE taʻu valu pē ʻa Siosaia ʻi heʻene hoko ko e tuʻi ki he matakali ʻe ua ʻo ʻIsileli ʻi he tongá. ʻOku fuʻu kei siʻi ʻeni ki ha tokotaha ke ne tuʻi. Ko ia ʻi he kamataʻangá naʻe tokoni kiate ia ha kakai matuʻotuʻa ki hono puleʻi ʻa e fonuá.

ʻI he hoko ʻa Siosaia ko e tuʻí ʻo feʻunga mo e taʻu ʻe fitu naʻá ne kamata ke kumi kia Sihova. Naʻá ne muimui ki he ngaahi faʻifaʻitakiʻanga ʻo e ngaahi tuʻi lelei ʻo hangē ko Tēvita, Sihosafate, mo Hesekaia. Pea, ʻi heʻene kei talavoú, naʻe fai ai ʻe Siosaia ha meʻa ʻi he loto-toʻa.

Kuo fuoloa ʻa e mātuʻaki kovi ʻa e tokolahi taha ʻo e kau ʻIsilelí. Naʻa nau lotu ki he ngaahi ʻotua loi. Naʻa nau punou ki he ngaahi ʻaitoli. Ko ia naʻe ʻalu atu ʻa Siosaia mo ʻene kau tangata ʻo kamata ke fakaʻauha ʻa e lotu loí mei he fonuá. Ko e ngāue lahi ʻaupito ʻeni koeʻuhi he ko e kakai tokolahi naʻa nau lotu ki he ngaahi ʻotua loi. ʻOku lava ke ke sio heni kia Siosaia mo ʻene kau tangatá ʻoku nau fakaʻauha ʻa e ngaahi ʻaitolí.

ʻI he hili pē iá, naʻe ʻai ʻe Siosaia ha kau tangata ʻe toko tolu ke nau tokangaʻi hono monomono ʻa e temipale ʻo Sihová. Naʻe tānaki ha paʻanga mei he kakaí pea ʻoange ia ki he kau tangata ko ʻení ke totongiʻaki ʻa e ngāue ke faí. Lolotonga ʻo ʻenau ngāue ʻi he temipalé, naʻe maʻu ai ʻe he taulaʻeiki lahi ko Hilikaia ha meʻa mahuʻinga ʻaupito. Ko e tohi ko ia ʻo e lao naʻe fekau ʻe Sihova kia Mosese ke ne hikí ʻi he taimi fuoloa ʻaupito ki muʻa atu ia. Naʻe mole ia ʻi ha ngaahi taʻu lahi.

Naʻe ʻave ʻa e tohí kia Siosaia, pea naʻá ne kole ke lau ange kiate ia. Pea ʻi heʻene fanongó, naʻe lava ai ke ʻilo ʻe Siosaia naʻe ʻikai tauhi ʻe he kakaí ʻa e lao ʻa Sihová. Naʻá ne ongoʻi loto-mamahi ʻaupito ʻo fekauʻaki mo e meʻa ko ʻení, pea ko ia naʻá ne hae hono kofú, ʻo hangē pē ko ia ʻokú ke sio ki ai ʻi hení. Naʻá ne pehē: ‘ʻOku ʻita ʻa Sihova kiate kitautolu, koeʻuhi he naʻe ʻikai ke tauhi ʻe heʻetau ngaahi tamaí ʻa e ngaahi lao naʻe hiki ʻi he tohi ko ʻení.’

Naʻe fekau ʻe Siosaia ki he taulaʻeiki lahi ko Hilikaiá ke ne feinga ke ʻilo pe ko e hā ʻe fai ʻe Sihova kiate kinautolú. Naʻe ʻalu ʻa Hilikaia ki he fefine ko Hūlita, ʻa ia ko ha palōfita fefine, ʻo ʻeke ki ai. Naʻe ʻoange ʻe Hūlita ki ai ʻa e pōpoaki ko ʻeni meia Sihova ke foki mo ia kia Siosaia: ‘ʻE tautea ʻa Selusalema mo hono kakai kotoa pē koeʻuhi kuo nau lotu ki he ngaahi ʻotua loi pea kuo fonu ʻa e fonuá ʻi he faikovi. Ka koeʻuhi ko koe, ʻe Siosaia, kuó ke fai ʻa ia ʻoku lelei, ʻe ʻikai ke hoko ʻa e tautea ia ko ʻení kaeʻoua ke ke toki mate.’