Ko ha Tangata Naʻe ʻIkai ke Ilifia

SIO ki he kakai ʻoku nau fakakataʻaki ʻa e tangata talavou ko ʻení. ʻOkú ke ʻilo pe ko hai ia? Ko Selemaia ʻeni. Ko e palōfita mahuʻinga ʻaupito ia ʻa e ʻOtuá.

ʻI he hili pē ko ia ʻa e kamata ʻa Tuʻi Siosaia ke fakaʻauha ʻa e ngaahi ʻaitolí mei he fonuá, naʻe fakahā ʻe Sihova kia Selemaia ke hoko ko ʻEne palōfita. Kaekehe, naʻe fakakaukau ʻa Selemaia ia ʻokú ne fuʻu kei siʻi ke hoko ko ha palōfita. Ka naʻe pehē ʻe Sihova te Ne tokoni kiate ia.

Naʻe tala ʻe Selemaia ki he kau ʻIsilelí ke tuku ʻenau fai ʻa e ngaahi meʻa ʻoku koví. Naʻá ne pehē: ‘ʻOku loi ʻa e ngaahi ʻotua ʻoku lotu ki ai ʻa e kakai ʻo e ngaahi puleʻangá.’ Ka ko e kau ʻIsileli tokolahi naʻa nau saiʻia ange ʻi heʻenau lotu ki he ngaahi ʻaitolí ʻi haʻanau lotu ki he ʻOtua moʻoni ko Sihová. ʻI hono fakahā ʻe Selemaia ki he kakaí ʻe tautea kinautolu ʻe he ʻOtuá koeʻuhi ko ʻenau ngaahi faikoví, naʻa nau kataʻi pē ia.

Naʻe ʻosi atu ha ngaahi taʻu. Naʻe mate ʻa Siosaia, pea ʻi he ʻosi mei ai ha māhina ʻe tolu naʻe hoko hono foha ko Sihoiakimí ko e tuʻi. Naʻe kei hoko atu pē hono tala ʻe Selemaia ki he kakaí: ‘ʻE fakaʻauha ʻa Selusalema ʻo kapau ʻe ʻikai te mou liliu hoʻomou ngaahi founga koví.’ Naʻe puke ʻe he kau taulaʻeikí ʻa Selemaia mo nau kaila: ‘ʻOku totonu ke tāmateʻi koe ʻi hoʻo leaʻaki ʻa e ngaahi meʻa ko ʻení.’ Pea nau tala ki he kau pilinisi ʻo ʻIsilelí: ‘ʻOku totonu ke tāmateʻi ʻa Selemaia, he kuó ne tala ʻe fakaʻauha hotau koló.’

Ko e hā ʻa e meʻa naʻe toki fai ʻe Selemaiá? Naʻe ʻikai ke ilifia ia! Naʻá ne tala kiate kinautolu hono kotoa: ‘Ko e fekau mai au ʻe Sihova ke u leaʻaki ʻa e ngaahi meʻa ko ʻení kiate kimoutolu. Kapau ʻe ʻikai te mou liliu hoʻomou ngaahi founga koví, ʻe fakaʻauha ʻe Sihova ʻa Selusalema. Ka ke mou ʻilo ʻa e meʻa ko ʻení: Kapau te mou tāmateʻi au, ko hoʻomou tāmateʻi ia ha tangata kuo ʻikai te ne fai ha hala.’

Naʻe tuku ʻe he kau pilinisí ʻa Selemaia ke moʻui pē, ka naʻe ʻikai ke liliu ʻa e kau ʻIsilelí mei heʻenau ngaahi founga koví. Ki mui mai ai, naʻe haʻu ʻa Nepukanesa, ko e tuʻi ʻo Pāpiloné, ʻo tauʻi ʻa Selusalema. Pea naʻe ʻai leva ʻe Nepukanesa ʻa e kau ʻIsilelí ko ʻene kau sevāniti. Naʻá ne ʻave ʻa e toko laui afe ki Pāpilone. Fakakaukau ange pe te ke ongoʻi fēfē ʻi hano ʻave koe ʻe ha kakai kehe mei ho fonuá ki ha fonua kehe!