LĒSONI 9
Naʻe ʻIkai Tuku ʻe Selemaia ʻEne Lea Fekauʻaki mo Sihová
Ko e hā naʻe ʻita ai ʻa e kakaí kia Selemaiá?
Naʻe fakahaofi ʻe Sihova ʻa Selemaia
ʻI he taimi ʻe niʻihi ʻoku fakakataʻaki kitautolu ʻe he kakaí pe ʻita mai kia kitautolu ʻi he taimi ʻoku tau talanoa ai kia kinautolu ʻo fekauʻaki mo Sihová. ʻOku ʻai ʻe he meʻá ni ke tau loto ke tuku ʻetau talanoa fekauʻaki mo e ʻOtuá. Kuó ke faʻa ongoʻi pehē?— ʻOku tala mai ʻe he Tohi Tapú kiate kitautolu fekauʻaki mo ha kiʻi talavou naʻe ʻofa kia Sihova ka naʻá ne meimei tuku ʻene lea fekauʻaki mo iá. Ko hono hingoá ko Selemaia. Tau ako lahi angé fekauʻaki mo ia.
ʻI he taimi naʻe kei siʻi ai ʻa Selemaiá, naʻe tala ʻe Sihova ki ai ke ne fakatokanga ki he kakaí ke tuku ʻenau fai koví. Naʻe faingataʻa ʻaupito eni kia Selemaia pea naʻá ne ilifia. Naʻá ne tala ange kia Sihova: ‘ʻOku ʻikai ke u ʻiloʻi ʻa e meʻa ke leaʻakí. Ko ha tamasiʻi pē au.’ Ka naʻe tala ange ʻe Sihova: ‘ʻOua ʻe ilifia. Te u tokoniʻi koe.’
Ko ia naʻe kamata ke fakatokanga ʻa Selemaia ki he kakaí ʻe tauteaʻi kinautolu kapau heʻikai ke nau liliu. ʻOkú ke fakakaukau naʻe fai ʻe he kakaí ʻa e meʻa naʻe tala ange ʻe Selemaiá?— ʻIkai. Naʻa nau fakakataʻaki ia naʻa mo ʻenau ʻita ʻaupito ai. Naʻe aʻu ʻo loto ʻa e niʻihi ke tāmateʻi ia! ʻOkú ke pehē naʻe ongoʻi fēfē ʻa Selemaia?— Naʻe ilifia peá ne pehē: ‘Heʻikai te u toe lea fekauʻaki pea mo Sihova.’ Ka naʻá ne foʻi moʻoni?— ʻIkai, naʻe ʻikai ke pehē ia. Naʻá ne ʻofa lahi ʻaupito kia Sihova naʻe ʻikai lava ai ke tuku ʻene lea fekauʻaki mo iá. Pea koeʻuhí ko e ʻikai ke foʻi ʻa Selemaiá, naʻe fakahaofi ia ʻe Sihova.
Ko e fakatātaá, ʻi he taimi ʻe taha naʻe lī ʻe ha kau tangata kovi ʻa Selemaia ki ha fuʻu luo naʻe fonu pelepela. Naʻe ʻikai ke ʻi ai haʻane meʻakai pe vai. Naʻe loto ʻa e kau tangatá ke tuku pē ai ʻa Selemaia ke mate. Ka ʻi he tokoni ʻa Sihová naʻá ne hao!
Ko e hā ʻe lava ke ke ako meia Selemaiá?— Neongo naʻe ilifia ʻa Selemaia ʻi he taimi ʻe niʻihi, naʻe ʻikai ke tuku ʻene lea fekauʻaki mo Sihová. ʻI hoʻo talanoa fekauʻaki mo Sihová, ʻe fakakataʻaki nai koe ʻe he kakaí pe ʻita atu kia koe. Te ke ongoʻi mā nai pe aʻu ʻo ilifia. Kae ʻoua ʻaupito ʻe tuku ʻa e lea fekauʻaki mo Sihová. Te ne tokoniʻi maʻu pē koe, ʻo hangē ko ʻene tokoniʻi ʻa Selemaiá.