Akoʻi Hoʻo Fānaú
Naʻe ʻIkai Foʻi ʻa Selemaia
KUÓ KE loto-siʻi ʻi ha taimi peá ke ongoʻi foʻi?—a ʻOku ongoʻi pehē pē mo e tokolahi. Naʻe ongoʻi pehē ʻa e talavou ko Selemaiá. Kae kehe, naʻe ʻikai te ne fakaʻatā ʻa e meʻa naʻe leaʻaki mo fai ʻe he niʻihi kehé ke ne foʻi ai. Tau lāulea angé ki he founga naʻe hoko ai ʻa Selemaia ko ha tokotaha makehe ki he ʻOtuá, neongo naʻá ne ongoʻi foʻi.
Ki muʻa ke fanauʻi ʻa Selemaiá, ko e ʻOtua moʻoní, ʻa Sihova, naʻá ne fili ia ke hoko ko ha palōfita ke ne fakatokanga ki he kakaí naʻe ʻikai te nau fakahōifuaʻi ʻa e ʻOtuá. ʻOkú ke ʻilo ʻa e meʻa naʻe tala ʻi he ngaahi taʻu ki mui ange ʻe Selemaia kia Sihová?— “ʻOku ʻikai te u poto ʻi he lea: he ko e tamasiʻi pe au.”
ʻOkú ke pehē ko e hā ʻa e tali ʻa Sihova kia Selemaiá?— ʻI ha founga anga-ʻofa kae papau, naʻá ne pehē: “ʻOua te ke pehe ko e tamasiʻi koe: he te ke ʻalu kiate kinautolu kotoa ʻoku ou tuku atu koe ki ai, pea ko e meʻa kotoa te u fekauʻi ai koe, te ke leaʻaki. ʻOua te ke manavahe.” Ko e hā hono ʻuhingá? “ʻOku ou ʻiate koe ke fai ho fakahaofi,” ko e folofola ia ʻa Sihová.—Selemaia 1:4-8.
Hangē ko ia naʻe fakahaaʻi ki muʻá, naʻe hoko ki mui ʻa Selemaia ʻo loto-siʻi. Naʻe hoko ení he naʻe manukiʻi ia ko ʻene tauhi ki he ʻOtuá. ‘Ko e tokotaha kotoa ʻoku nau kataʻi au ʻi he ʻaho kotoa pē mo fakakata ʻaki au,’ ko ʻene leá ia. Ko ia naʻá ne fakakaukau ke fakafisi. “ʻE ʻikai te u toe hueʻekina [ʻa Sihova], pea ʻe ʻikai te u toe lea ʻi hono huafa,” ko ʻene leá ia. Ka naʻá ne foʻi moʻoni?
‘ʻI hoku lotó,’ ko e lea ia ʻa Selemaiá, ‘ko e folofola ʻa Sihová naʻe hange ko e afi vela kuo loki ʻi hoku huí, pea ʻoku ou fiu ʻi he fakamaʻumaʻú.’ (Selemaia 20:7-9) Neongo naʻe ilifia ʻa Selemaia ʻi he taimi ʻe niʻihi, ko ʻene ʻofa kia Sihová naʻe ʻikai ai te ne foʻi. Sio angé ki he founga hono maluʻi ʻo Selemaia koeʻuhi ko e ʻikai te ne foʻí.
Naʻe tala ʻe Sihova kia Selemaia ke ne fakatokanga ki he kakaí ʻe fakaʻauha ʻa Selusalema kapau heʻikai ke nau tafoki mei honau ʻalunga koví. ʻI hono ʻoatu ʻe Selemaia ʻa e fakatokanga ko iá, naʻe ʻita ʻa e kakaí ʻo nau pehē: “Ko e tautea totonu ʻo e tangata ni ko e mate.” Kae kehe, naʻe kōlenga ʻa Selemaia ke nau “fakaongo ki he leʻo ʻo Sihova.” Peá ne pehē leva: ‘ʻOku totonu ke mou ʻilo kapau te mou tāmateʻi au, ʻoku mou tāmateʻi ha tangata tonuhia, he naʻe fekau mai au ʻe he ʻOtuá ke u lea kia kimoutolu.’ ʻOkú ke ʻiloʻi ʻa e meʻa naʻe hoko aí?—
ʻOku pehē ʻe he Tohi Tapú: “Pea tali ʻa e houʻeiki mo e kakai kotoa ki he kau taulaʻeiki mo e kau palofita, ʻOku ʻikai totonu ke tautea ʻa e tangata ni ʻaki ʻa e mate; he kuo ne lea kiate kitautolu ʻi he huafa ʻo Sihova ko hotau ʻOtua.” Ko ia ʻi he ʻikai tuku ʻe Selemaia ʻa ʻene manavaheé ke ʻai ia ke ne foʻí, naʻe maluʻi ia ʻe Sihova. Sio angé he taimí ni ki he meʻa naʻe hoko kia ʻUlaia, ko e palōfita ʻe taha ʻa Sihova, ʻa ia naʻá ne fai ʻa e meʻa kehe ʻaupito.
‘Naʻe toutou kikite ʻa ʻUlaia ki Selusalema ʻaki ʻa e lea naʻe leaʻaki ʻe Selemaiá,’ ko e lau ia ʻa e Tohi Tapú. Ka ʻi he houhau ʻa Tuʻi Sihoiakimi ʻia ʻUlaiá, ʻokú ke ʻilo ʻa e meʻa naʻá ne faí?— Naʻá ne ilifia, ʻo ne foʻi ʻi hono fai ʻa e finangalo ʻo e ʻOtuá, peá ne hola ki ʻIsipite. Ko ia naʻe fekauʻi atu ʻe he tuʻí ha kau tangata ke puke ia mei ai ʻo fakafoki mai. ʻI heʻenau fai iá, ʻokú ke ʻilo ʻa e meʻa naʻe fai ʻe he tuʻi kovi ko iá?— Naʻá ne tāmateʻi ʻa ʻUlaia ʻaki ha heletā!—Selemaia 26:8-24.
Ko e hā te ke pehē ai naʻe maluʻi ʻe Sihova ʻa Selemaia kae ʻikai ko ʻUlaiá?— Sai, naʻe ilifia nai ʻa Selemaia, ʻo hangē pē ko ʻUlaiá, ka naʻe ʻikai ke fakafisi ʻa Selemaia ʻo hola mei heʻene tauhi kia Sihová. Naʻe ʻikai te ne foʻi. Ko e hā ʻa e lēsoni te ke pehē ʻe lava ke tau ako mei he faʻifaʻitakiʻanga ʻa Selemaiá?— ʻI he taimi ʻe niʻihi ʻe faingataʻa nai ke tau fai ʻa e ngaahi meʻa ʻoku folofolaʻaki ʻe he ʻOtuá, ka ʻoku totonu maʻu pē ke tau falala mo talangofua kiate ia.
[Fakamatala ʻi lalo]
a Kapau ʻokú ke lautohi mo e fānaú, ko e kohí ʻoku fakamanatu atu ai ke kiʻi mālōlō pea fakahanga ʻa e fehuʻí kiate kinautolu.
Fehuʻi:
○ Ko e hā ʻa e ngāue naʻe fili ʻe he ʻOtuá maʻa Selemaiá?
○ Ko e hā naʻe ongoʻi ai ʻe Selemaia ʻokú ne foʻí?
○ Ko e hā naʻe maluʻi ai ʻa Selemaia kae ʻikai ko ʻUlaiá?
○ Ko e hā kuó ke ako mei he faʻifaʻitakiʻanga ʻa Selemaiá?
[Fakatātā ʻi he peesi 25]