Ko Tāniela ʻi he ʻAna ʻo e Fanga Laioné

ʻOIAUĒ! ʻOku ngali faingataʻaʻia lahi ʻa Tāniela. Ka ʻoku ʻikai ke fai ʻe he fanga laioné ha meʻa kiate ia! ʻOkú ke ʻilo hono ʻuhingá? Ko hai naʻá ne tuku ki heni ʻa Tāniela mo e fanga laione kotoa ko ʻení? Tau sio angé.

Naʻe hoko ʻa e tangata naʻe hingoa ko Talaiasi ko e tuʻi ʻo Pāpilone. Naʻá ne saiʻia ʻaupito ʻia Tāniela koeʻuhi he naʻe anga-ʻofa mo poto ʻa Tāniela. Naʻe fili ʻe Talaiasi ʻa Tāniela ke hoko ko ha pule lahi ia ʻi hono puleʻangá. Naʻe ʻai ʻe he meʻá ni ʻa e kau tangata kehe ʻi he puleʻangá ke nau meheka ai kia Tāniela, pea ko e meʻa ʻeni naʻa nau faí.

Naʻa nau ʻō kia Talaiasi ʻo pehē: ‘ʻE tuʻi, kuo mau loto-taha, ʻoku totonu ke ke faʻu ha lao ʻo pehē ke ʻoua ʻe lotu ha taha ki ha ʻotua pe ki ha tangata ka ko koe pē, ʻe tuʻi, ʻo feʻunga mo e ʻaho ʻe 30. Ka ʻi ai ha taha ʻe talangataʻa, pea lī ia ki he fanga laioné.’ Naʻe ʻikai ke ʻilo ʻe Talaiasi ʻa e ʻuhinga naʻe fiemaʻu ai ʻe he kau tangatá ni ke fokotuʻu ʻa e lao ko ʻení. Ka naʻá ne fakakaukau ko ha fakakaukau lelei ia, ko ia naʻá ne fekau ke tohi ʻa e laó. Pea ko e lao naʻe ʻikai ke lava ke toe liliu ia.

ʻI hono ʻilo ʻe Tāniela ʻo fekauʻaki mo e laó, naʻá ne ʻalu ki hono ʻapí ʻo lotu, ʻo hangē pē ko ia naʻá ne fai maʻu pē. Naʻe ʻilo ʻe he kau tangata koví ʻe ʻikai ke tuku ʻe Tāniela ʻene lotu kia Sihová. Naʻa nau fiefia, koeʻuhi naʻe ngalingali ʻoku lavameʻa ʻa ʻenau fakaangaanga ke tāmateʻi ʻa Tānielá.

ʻI hono ʻilo ʻe Tuʻi Talaiasi ʻa e ʻuhinga naʻe fiemaʻu ai ʻe he kau tangatá ni ke faʻu ʻa e laó, naʻá ne fuʻu loto-mamahi ʻaupito. Ka naʻe ʻikai te ne toe lava ke liliu ʻa e laó, ko ia kuo pau ke ne fekau ke lī ʻa Tāniela ki he ʻana ʻo e fanga laioné. Ka naʻe tala ʻe he tuʻí kia Tāniela: ‘ʻOku ou ʻamanaki ʻe fakahaofi koe ʻe ho ʻOtuá, ʻa ia ʻokú ke tauhi ki aí.’

Naʻe fuʻu loto-mamahi ʻa Talaiasi pea naʻe ʻikai malava ke ne mohe ʻi he pō ko iá. ʻI he pongipongi hono hokó naʻá ne lele ki he ʻana ʻo e fanga laioné. Ko ia ʻena ʻokú ke sio ki aí. Naʻá ne kalanga: ‘ʻE Tāniela, ko e sevāniti ʻa e ʻOtua moʻui! Kuo malava ʻe he ʻOtua ʻokú ke tauhi ki aí ke ne fakahaofi koe mei he fanga laioné?’

Naʻe tali ange ʻe Tāniela: ‘Naʻe fekau ʻe he ʻOtuá ʻene ʻāngelo ke ne tāpuni ʻa e ngutu ʻo e fanga laioné ke ʻoua naʻa nau fakalaveaʻi au.’

Naʻe fiefia ʻaupito ʻa e tuʻí. Naʻá ne fekau ke toʻo hake ʻa Tāniela mei he ʻaná. Pea naʻá ne fekau ke ʻomai ʻa e kau tangata kovi naʻa nau fiemaʻu ke tāmateʻi ʻa Tānielá ʻo lī kinautolu ki he fanga laioné. Naʻa mo e ki muʻa ke nau aʻu ki lalo ʻi he ʻaná, naʻe hapo pē kinautolu ʻe he fanga laioné ʻo ngungu honau ngaahi huí.

Naʻe tohi leva ʻa Tuʻi Talaiasi ki he kakai kotoa pē ʻi hono puleʻangá: ‘ʻOku ou tuʻutuʻuni ke fakaʻapaʻapa ʻa e tokotaha kotoa pē ki he ʻOtua ʻo Tānielá. ʻOkú ne fai ha ngaahi mana lahi. Kuó ne fakahaofi ʻa Tāniela mei hano kai ʻe he fanga laioné.’