Ko e Tamasiʻi ko Sīsuú ʻi he Temipalé

SIO ki he tamasiʻi ʻoku talanoa mo e kau tangata matuʻotuʻa ko ʻení. Ko e kau faiako kinautolu ʻi he temipale ʻo e ʻOtuá ʻi Selusalema. Pea ko e tamasiʻí ko Sīsū ia. Kuó ne tupu ʻeni ʻo lahilahi hake. Kuó ne taʻu 12 ʻeni.

ʻOku ʻohovale ʻa e kau faiakó ʻi he ʻilo lahi ʻa Sīsū ʻo kau ki he ʻOtuá mo e ngaahi meʻa kuo tohi ʻi he Tohitapú. Ka ko e hā ʻoku ʻikai ke ʻi heni ai ʻa Siosefa mo Melé? ʻOkú na ʻi fē kinaua? Tau vakai ange.

ʻI he taʻu taki taha naʻe ʻomai ʻe Siosefa hono fāmilí ki Selusalema ki ha kātoanga makehe naʻe ui ko e Lakaatu. Ko ha fononga mamaʻo mei Nāsaleti ki Selusalema. Naʻe ʻikai ke ʻi ai ha motokā ia ʻa ha taha, pea naʻe ʻikai ke ʻi ai ha ngaahi lēlue ia. Naʻe ʻikai ke ʻi ai ha ngaahi meʻa pehē ia ʻi he ngaahi ʻaho ko iá. Ko e tokolahi taha ʻo e kakaí naʻa nau ʻalu lalo pē, pea naʻe feʻunga mo e ʻaho ʻe tolu nai pea toki aʻu ki Selusalema.

Kuo tokolahi eni ʻa e fāmili ʻo Siosefá. Ko ia naʻe ʻi ai ʻa e ngaahi tokoua mo e tuofāfine iiki ange ʻo Sīsū ke fai ha tokanga ki ai. ʻI he taʻu ko ʻení naʻe ʻosi mavahe ʻa Siosefa mo Mele mo ʻena fānaú ʻo foki ʻi he fononga mamaʻo ki Nāsaleti. Naʻá na fakakaukau ʻoku haʻu ʻa Sīsū mo e niʻihi kehe naʻa nau fonongá. Ka ʻi heʻenau mālōlō ʻi he efiafí, naʻe ʻikai te na sio kia Sīsū. Naʻá na kumi ia ki honau ngaahi kāingá mo e ngaahi kaungāmeʻá, ka naʻe ʻikai ke ʻi ai ia mo kinautolu! Ko ia naʻá na toe foki ki Selusalema ke kumi kiate ia.

Faifai atu pē pea naʻá na ʻilo ʻa Sīsū mo e kau faiakó. Naʻá ne fakafanongo kiate kinautolu mo ʻeke ha ngaahi fehuʻi. Pea naʻe ofo ʻa e kakai kotoa pē ʻi he poto ʻo Sīsuú. Ka naʻe pehē ʻe Mele: ‘Tama, ko e hā kuó ke fai pehē ai kiate kimauá? Ko hoʻo tamaí mo au kuó ma hohaʻa ʻaupito ʻo feinga ke kumi koe.’

Naʻe tali ange ʻe Sīsū: ‘Ko e hā naʻá mo kumi ai aú? Naʻe ʻikai koā te mo ʻilo te u ʻi he fale ʻo ʻeku Tamaí?’

ʻIo, naʻe saiʻia ʻa Sīsū ke ʻi ha feituʻu ʻe lava ke ne ako ai ʻo kau ki he ʻOtuá. ʻIkai ko e faʻahinga ongoʻi ia ʻoku totonu ke tau maʻu foki? ʻI Nāsaleti, naʻe ʻalu ʻa Sīsū ki he ngaahi fakataha ke lotú ʻi he uike taki taha. Koeʻuhi ko ʻene tokanga maʻu ai pē, naʻá ne ako ʻa e ngaahi meʻa lahi mei he Tohitapú. ʻAi ke tau hangē ko Sīsū mo muimui ki heʻene faʻifaʻitakiʻangá.