Naʻe Talangofua Maʻu Pē ʻa Sīsū

ʻOku faingofua maʻu pē ke talangofua ki hoʻo ongo mātuʻá?— ʻOku faingataʻa ʻi he taimi ʻe niʻihi. Naʻá ke ʻiloʻi naʻe talangofua ʻa Sīsū kia Sihova mo ʻene ongo mātuʻá?— ʻE lava ke tokoniʻi koe ʻe heʻene faʻifaʻitakiʻangá ke talangofua ki hoʻo ongo mātuʻá neongo ʻoku ʻikai ko ha meʻa faingofua. Tau ako lahi angé fekauʻaki mo e meʻá ni.

Ki muʻa ke haʻu ʻa Sīsū ki māmaní, naʻá ne nofo mo ʻene Tamaí, ʻa Sihova, ʻi hēvani. Ka ko Sīsū foki naʻe ʻi ai ʻene ongo mātuʻa ʻi heni ʻi māmani. Ko hona hingoá ko Siosifa mo Mele. ʻOkú ke ʻiloʻi naʻe anga-fēfē ʻena hoko ko ʻene ongo mātuʻá?—

Naʻe ʻomai ʻe Sihova ʻa e moʻui ʻa Sīsuú mei hēvani ʻo tuku ia ʻi he manava ʻo Melé kae lava ke ʻaloʻi mo moʻui ʻi he māmaní. Ko ha mana eni! Naʻe tupu ʻa Sīsū ʻi he manava ʻo Melé ʻo hangē pē ko e tupu ʻa e fanga kiʻi pēpeé ʻi he manava ʻenau faʻeé. Hili ʻa e māhina ʻe hiva mei ai, naʻe ʻaloʻi ʻa Sīsū. Ko e founga eni naʻe hoko ai ʻa Mele mo hono husepānití ʻa Siosifa ko e ongo mātuʻa ʻa Sīsū ʻi heni ʻi he māmani.

ʻI he taimi naʻe taʻu 12 ai ʻa Sīsuú, naʻá ne fai ʻa e meʻa naʻe fakahaaʻi atu ai ʻa e lahi ʻene ʻofa ki heʻene tamai ko Sihová. Naʻe hoko eni ʻi he taimi naʻe fononga mamaʻo ai ʻa Sīsū mo hono fāmilí ki Selusalema ki he Pāsová. ʻI heʻenau foki ki ʻapí, naʻe fiu kumi ʻe Siosifa mo Mele ʻa Sīsū. ʻOkú ke ʻiloʻi ʻa e feituʻu naʻe ʻi aí?—

Naʻe foki fakavave ʻa Siosifa mo Mele ki Selusalema ʻo kumi holo ʻa Sīsū. Naʻá na hohaʻa ʻaupito koeʻuhí naʻe ʻikai ke na maʻu ia. Ka ʻi he ʻosi ʻa e ʻaho ʻe tolu mei ai naʻá na maʻu ia ʻi he Temipalé! ʻOkú ke ʻiloʻi ʻa e ʻuhinga naʻe ʻi he temipalé ai ʻa Sīsuú?— Koeʻuhí ko e feituʻu ia ʻe lava ke ako ai fekauʻaki mo ʻene Tamaí ʻa Sihova. Naʻá ne ʻofa kia Sihova mo loto ke ako ki he founga ke fakafiefiaʻi ai iá. Naʻa mo e taimi naʻá ne tupu hake ai ʻo fuʻu tangatá, naʻe talangofua maʻu pē ʻa Sīsū kia Sihova. Naʻe talangofua ʻa Sīsū naʻa mo e taimi naʻe faingataʻa ai kiate iá pea iku ki haʻane faingataʻaʻia. Naʻe toe talangofua ʻa Sīsū kia Siosifa mo Mele?— ʻIo, ʻoku pehē ʻe he Tohi Tapú naʻá ne talangofua.

Ko e hā ʻe lava ke ke ako mei he faʻifaʻitakiʻanga ʻa Sīsuú?— ʻOku fiemaʻu ke ke talangofua ki hoʻo ongo mātuʻá naʻa mo e taimi ʻoku faingataʻa aí. ʻE lava ke ke fai ia?—