Naʻe Fafanga ʻe Sīsū ʻa e Kakai Tokolahi

NAʻE hoko ha meʻa fakalilifu. Naʻe toki ʻosi atu hono tāmateʻi ʻa Sione ko e Faipapitaisó. Naʻe ʻikai ke saiʻia ʻiate ia ʻa Helotiasi, ko e uaifi ʻo e tuʻí. Pea naʻá ne malava ke ʻai ʻa e tuʻí ke ne tuʻusi ʻa e ʻulu ʻo Sioné.

Naʻe fuʻu loto-mamahi ʻa Sīsū ʻi heʻene fanongo ʻo kau ki he meʻá ni. Naʻá ne ʻalu pē ia tokotaha ki ha feituʻu naʻe ʻikai ke ʻi ai ha kakai. Ka naʻe muimui pē ʻa e kakaí ʻiate ia. ʻI he sio ʻa Sīsū ki he fuʻu kakaí, naʻá ne fakaʻofaʻia ʻiate kinautolu. Ko ia naʻá ne tala kiate kinautolu ʻo kau ki he puleʻanga ʻo e ʻOtuá, peá ne fakamoʻui honau niʻihi ʻoku mahakí.

ʻI he efiafi ko iá naʻe haʻu kiate ia ʻene kau ākongá ʻo pehē kiate ia: ‘ʻOku mei poʻuli, pea ko e feituʻu ʻikai nofoʻi ʻeni. Fekau ʻa e kakaí ke nau ō ʻo fakatau haʻanau meʻakai mei he ngaahi kolo ofi maí.’

Naʻe tali ange ʻe Sīsū: ‘ʻE ʻikai fiemaʻu ke nau ō. Mou ʻoange kiate kinautolu ha meʻa ke nau kai.’ Naʻe hanga ʻa Sīsū kia Filipe ʻo ne ʻeke: ‘Te tau fakatau mei fē ha meʻakai feʻunga ke fafangaʻaki ʻa e kakai kotoa ko ʻení?’

Naʻe tali ange ʻe Filipe: ‘ʻE fiemaʻu ha paʻanga lahi ʻaupito ke fakatauʻaki ha meʻakai ke feʻunga mo e tokotaha kotoa pē.’ Pea lea hake ʻa ʻAnitelū: ‘Ko e tamasiʻi ko ʻeni ʻokú ne toʻo ʻetau meʻakaí, ʻokú ne maʻu ha foʻi mā ʻe nima mo e mataʻiika ʻe ua. Ka heʻikai ke feʻunga ia ki he kakaí hono kotoa.’

Naʻe pehē ange ʻe Sīsū: ‘Tala ki he kakaí ke nau tangutu hifo ki he musié.’ Peá ne fakamālō ki he ʻOtuá koeʻuhi ko e meʻakaí, pea kamata ke ne pakipaki ia. Ko hono hokó, naʻe tufotufa ʻe he kau ākongá ʻa e mā mo e ika ki he kakai kotoa. Ko e kau tangata ʻe toko 5,000, taʻelau ki ai ʻa e laui afe ʻo e kakai fefine mo e fānau. Naʻa nau kai kotoa pē ʻo nau mākona. Pea ʻi hono tānaki ʻe he kau ākongá ʻa e toengá, naʻe fonu ʻa e kato ʻe 12!

Naʻe ʻai leva ʻe Sīsū ʻa ʻene kau ākongá ke nau heka ki he vaká ʻo kolosi atu ʻi he Tahi ko Kālelí. ʻI he lolotonga ʻo e pō ko iá naʻe tō ha afā lahi, pea lī ʻe he peaú ʻa e vaká ki hē mo ē. Naʻe ilifia lahi ʻaupito ʻa e kau ākongá. Pea ʻi he vaeuapoó, naʻa nau sio ki ha tokotaha ʻoku luelue mai kiate kinautolu ʻi he fukahi vaí. Naʻa nau kaila ʻi he ilifia, koeʻuhi naʻe ʻikai te nau ʻilo pe ko e hā ʻoku nau sio ki aí.

Naʻe pehē ʻe Sīsū: ‘ʻOua ʻe ilifia. Ko au pē ia!’ Naʻe ʻikai pē te nau tui ki ai. Ko ia naʻe pehē ange ʻe Pita: ‘ʻEiki, kapau ko koe moʻoni pē ia, tala mai ke u ʻalu atu ʻi he fukahi vaí kiate koe.’ Naʻe tali ange ʻe Sīsū: ‘Haʻu!’ Pea tuʻu atu ʻa Pita ʻo ʻalu atu ʻi he fukahi vaí! Peá ne hoko ʻo ilifia pea kamata ke ne fakangalo hifo, ka naʻe fakahaofi ia ʻe Sīsū.

Ki mui mai, naʻe toe fafangaʻi ʻe Sīsū ha kakai ʻe toko laui afe. ʻI he taimi ko ʻení naʻá ne fafangaʻaki ia ʻa e foʻi mā ʻe fitu mo e fanga kiʻi ika siʻi pē. Pea naʻe toe lahi feʻunga pē ki he tokotaha kotoa pē. ʻIkai ko e meʻa fakaofo ʻa e anga ʻo e tokanga ʻa Sīsū ki he kakaí? ʻI heʻene pule ko e tuʻi ʻa e ʻOtuá ʻe ʻikai ke toe fiemaʻu ke tau hohaʻa ki ha meʻa ʻe taha!